ഗുരുതരാവസ്ഥയില്‍ പിറന്ന കേരളത്തിലെ ഏറ്റവും ഭാരം കുറഞ്ഞ നവജാതശിശു കാശ്വി'ക്ക് എറണാകുളം ലൂര്‍ദ് ആശുപത്രിയിലെ മെഡിക്കല്‍ സംഘം രക്ഷകരായി. നവജാത ശിശുരോഗവിദഗ്ധന്‍ ഡോ. റോജോ ജോയിയുടെ നേതൃത്വത്തില്‍ നൂതന ചികിത്സാരീതിയിലൂടെ കുഞ്ഞിന്റെ ജീവന്‍ സാധാരണനിലയിലെത്തിച്ചു. പൂര്‍ണ ആരോഗ്യത്തോടെ കുഞ്ഞും അമ്മയും ആശുപത്രി വിട്ടു.

ജനിച്ചപ്പോള്‍ ഒരു കൈപ്പത്തിയുടെ വലിപ്പം മാത്രമുണ്ടായിരുന്ന കുഞ്ഞിനു ഡിസ്ചാര്‍ജ് ചെയ്യുന്ന സമയത്ത് ഒന്നരക്കിലോഗ്രാം ഭാരം ഉണ്ടായിരുന്നു. മേയ് ഒന്നിനാണ് ഉത്തര്‍പ്രദേശ് സ്വദേശിയും ലൂര്‍ദ് ആശുപത്രിയിലെ ഓര്‍ത്തോപീഡിക് വിഭാഗം ഡിഎന്‍ബി മെഡിക്കല്‍ വിദ്യാര്‍ഥികൂടിയായ ഡോ. ദിഗ് വിജയ്യുടെ ഭാര്യ ശിവാങ്കി മാസം തികയാതെ പെണ്‍കുഞ്ഞിനു ജന്മം നല്‍കിയത്. അപ്പോള്‍ ഗര്‍ഭം ധരിച്ച് 23 ആഴ്ചയേ ആയിരുന്നുള്ളു.

സാധാരണനിലയില്‍ രണ്ടരക്കിലോഗ്രാം ഭാരം വേണ്ടിടത്ത് 380 ഗ്രാം മാത്രമായിരുന്നു കുഞ്ഞിന്റെ ഭാരം. അവയവങ്ങള്‍ക്കാകട്ടെ വേണ്ടത്ര വളര്‍ച്ച ഉണ്ടായിരുന്നില്ല. തനിയെ ശ്വാസോച്ഛ്വാസം ചെയ്യാന്‍ പ്രയാസം നേരിട്ട കുഞ്ഞിനു ഹൃദയസ്പന്ദനത്തിലും ഏറ്റക്കുറച്ചിലുകള്‍ ഉണ്ടായിരുന്നു.

ജീവന്‍ നഷ്ടപ്പെട്ടേക്കാവുന്ന അവസ്ഥയില്‍നിന്നാണ് കുഞ്ഞിനെ സാധാരണനിലയിലെത്തിച്ചത്. അത്യാധുനിക ചികിത്സാ സംവിധാനങ്ങളുളള അഡ്വാന്‍സ്ഡ് സെന്റര്‍ ഫോര്‍ നിയോനേറ്റല്‍ കെയര്‍ ഐസിയുവില്‍ കിടത്തിയായിരുന്നു പരിചരണങ്ങള്‍. 16 ദിവസത്തിനുശേഷം സ്വയം ശ്വാസമെടുക്കുന്ന നിലയിലേക്കു കുട്ടി എത്തി. തുടര്‍ന്നു നിയോനേറ്റല്‍ ഐസിയുവിലെ ബബിള്‍ സി പാപ്പിലും പിന്നീടു രണ്ടു മാസത്തോളം ഇന്‍ക്യുബേറ്ററിലും കഴിഞ്ഞു.

കഴിഞ്ഞ ഏഴിന് കുട്ടിയെ ഡിസ്ചാര്‍ജ് ചെയ്തു. നൂട്രീഷണല്‍ തെറാപ്പി, ഡെവലപ്പ്‌മെന്റ് സപ്പോര്‍ട്ടീവ് കെയര്‍, കംഗാരു മദര്‍ കെയര്‍ തുടങ്ങി നൂതന ചികിത്സാ രീതികളിലൂടെയാണ് കുഞ്ഞിന്റെ ജീവന്‍ സാധാരണ നിലയിലേക്ക് എത്തിച്ചതെന്നു ലൂര്‍ദ് പോസ്റ്റ് ഗ്രാജുവേറ്റ് ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ് ആന്‍ഡ് റിസെര്‍ച്ച് ഡയറക്ടര്‍ ഫാ. ഷൈജു അഗസ്റ്റിന്‍ തോപ്പില്‍ പത്രസമ്മേളനത്തില്‍ പറഞ്ഞു.

ഹൈദരാബാദിലായിരുന്നു ഇതിനുമുന്‍പ് ഇന്ത്യയിലെ ഏറ്റവും ഭാരകുറഞ്ഞ നവജാത ശിശു ജനിച്ചതായി റിപ്പോര്‍ട്ട് ചെയ്തത്. കാശ്വിയെക്കാള്‍ അഞ്ച് ഗ്രാം തൂക്കക്കുറവാണ് ആ കുഞ്ഞിന് ഉണ്ടായിരുന്നത്. പത്രസമ്മേളനത്തില്‍ ഡോ. പോള്‍ പുത്തൂരാന്‍, കുട്ടിയുടെ പിതാവ് ഡോ. ദിഗ് വിജയ്, ഡോ. റോജോ ജോയി, ഡോ. വര്‍ഗീസ് ചെറിയാന്‍ എന്നിവരും പങ്കെടുത്തു.