രാജസ്ഥാനില്‍ ടോങ്ക് ജില്ലയില്‍നിന്നു കാണാതായ ആറുവയസ്സുകാരിയെ കൊല്ലപ്പെട്ട നിലയില്‍ ശനിയാഴ്ച കണ്ടെത്തി. പെണ്‍കുട്ടി ബലാത്സംഗത്തിന് ഇരയായതായി വ്യക്തമാക്കിയ പോലീസ്, ബലാത്സംഗത്തിന് ഇരയാക്കിയതിനുശേഷം, കുട്ടി യൂണിഫോമിനൊപ്പം ധരിച്ചിരുന്ന ബെല്‍റ്റ് കൊണ്ട് കഴുത്തു ഞെരിച്ച് കൊലപ്പെടുത്തുകയായിരുന്നു എന്ന് വെളിപ്പെടുത്തി.

പെണ്‍കുട്ടിയുടെ മൃതദേഹം പൊലീസ് കണ്ടെടുത്തത് ഖേതാഡി ഗ്രാമത്തിലെ കുറ്റിക്കാട്ടില്‍ നിന്നാണ്. സ്ഥലത്താകെ രക്തം കട്ടപിടിച്ചു കിടപ്പുണ്ടായിരുന്നു. സമീപത്തുനിന്ന് മദ്യക്കുപ്പികളും പലഹാരങ്ങളും കണ്ടെടുത്തു.

സ്‌കൂളില്‍ കായിക ദിനമായിരുന്ന ശനിയാഴ്ച വൈകുന്നേരം മൂന്നു മണിയായിട്ടും കുട്ടി തിരിച്ചെത്താതായതോടെ ബന്ധുക്കള്‍ തിരച്ചില്‍ ആരംഭിച്ചു. ഞായറാഴ്ച രാവിലെ ഖേതാഡി ഗ്രാമത്തിലെ കുറ്റിക്കാട്ടില്‍നിന്ന് പെണ്‍കുട്ടിയുടെ മൃതദേഹം കണ്ടെത്തിയതോടെ വന്‍ ജനാവലിയാണ് പൊലീസിനെതിരെ പ്രതിഷേധവുമായി ഇറങ്ങിയത്. പ്രതികള്‍ക്കായി വ്യാപകമായ തിരച്ചില്‍ ആരംഭിച്ചതായി എസ്പി ആദര്‍ശ് സിദ്ദു അറിയിച്ചു.