സ്‌കോളര്‍ഷിപ്പോടെ അമേരിക്കയില്‍ ഉന്നത പഠനം നടത്തുകയായിരുന്ന മിടുക്കിയുടെ മരണം കൊലപാതകമാണെന്ന് ബന്ധുക്കള്‍. ഉത്തര്‍പ്രദേശിലെ ബുലന്ദ്ശഹറില്‍ പൂവാല ശല്യത്തില്‍നിന്ന് രക്ഷപ്പെടാന്‍ ശ്രമിക്കവെയാണ് പത്തൊമ്പതുകാരിക്ക് ജീവന്‍ നഷ്ടമായത്. ദാദ്രി ജില്ലയിലെ സുദീക്ഷാ ഭതിയാണ് ബുലന്ദ്ഷഹറിന് സമീപത്തുണ്ടായിരുന്ന അപകടത്തില്‍ തല്‍ക്ഷണം മരിച്ചത്. ഒരു ബന്ധുവിനൊപ്പം സ്‌കൂട്ടറില്‍ വരുമ്ബാേഴായിരുന്നു അപകടം. ബന്ധു പരിക്കേറ്റ് ആശുപത്രിയിലാണ്. സുധീക്ഷ ഈമാസം ഇരുപതിന് അമേരിക്കയിലേക്ക് മടങ്ങിപ്പോകാനിരിക്കുകയായിരുന്നു.

സ്‌കൂട്ടറില്‍ വരികയായിരുന്ന സുധീക്ഷയെ പൂവാലന്മാര്‍ മോശം കമന്റുകളുമായി ബൈക്കില്‍ പിന്തുടര്‍ന്നു. ഇതിനിടെ ബൈക്ക് സ്‌കൂട്ടറില്‍ തട്ടി അപകടമുണ്ടാവുകയായിരുന്നു എന്നാണ് ബന്ധുക്കള്‍ ആരോപിക്കുന്നത്. വളരെ പാവപ്പെട്ട കുടുംബത്തിലെ അംഗമായിരുന്ന സുധീക്ഷയ്ക്ക് പന്ത്രണ്ടാം ക്‌ളാസില്‍ ഉയര്‍ന്ന മാര്‍ക്കുലഭിച്ചതോടെയാണ് അമേരിക്കയില്‍ സ്‌കോളര്‍ഷിപ്പോടെ ഉന്നത പഠനത്തിനുളള അവസരം ലഭിച്ചത്. 3.80കോടിയുടെ സ്‌കോളര്‍ഷിപ്പായിരുന്നു ലഭിച്ചത്. ബുലന്ദ്ശഹറില്‍ പൂവാല ശല്യത്തില്‍നിന്ന് രക്ഷപ്പെടാന്‍ ശ്രമിക്കവെ അപകടത്തില്‍ യുവതി മരിച്ച സംഭത്തില്‍ സര്‍ക്കാറിനെതിര കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധിയും രംഗത്തെത്തി. ഉത്തര്‍ പ്രദേശില്‍ നിയമത്തെ ആര്‍ക്കും പേടിയില്ലെന്നും സ്ത്രീകള്‍ അരക്ഷിതരെന്നും പ്രിയങ്ക ട്വീറ്റ് ചെയ്തു. സ്ത്രീകളോടുള്ള അക്രമണത്തെ സര്‍ക്കാര്‍ വിലകുറച്ചു കാണുകയാണ്, അതാണ് സംസ്ഥാനത്ത് നിരന്തരം സ്ത്രീകള്‍ക്കെതിരെ ആക്രമങ്ങളുണ്ടാവാന്‍ കാരണമെന്നും പ്രിയങ്ക കൂട്ടിച്ചേര്‍ത്തു. സുധീക്ഷയുടെ മരണത്തെക്കുറിച്ച് അന്വേഷണം നടത്തണമെന്നും ഉത്തരവാദികളായവരെ അറസ്റ്റുചെയ്യണമെന്നും ആവശ്യപ്പെട്ട് ബി എസ് പി നേതാവ് മായാവതി രംഗത്തെത്തിയിട്ടുണ്ട്. എന്നാല്‍ പൊലീസ് ഇക്കാര്യത്തില്‍ പ്രതികരിച്ചിട്ടില്ല.