മദ്യലഹരിയിൽ വാഹനമോടിച്ച് നിരവധി അപകടങ്ങൾ വരുത്തിവെച്ച സംഭവത്തിൽ പ്രശസ്ത സിനിമാ നിരൂപകനും യൂട്യൂബറുമായ അശ്വന്ത് കോക്കിന്റെ അറസ്റ്റു രേഖപ്പെടുത്തി പോലീസ് ജാമ്യത്തിൽ വിട്ടയച്ചു. തിങ്കളാഴ്ച വൈകിട്ടോടെ കോഴിക്കോട്ട് വെച്ചായിരുന്നു സംഭവം. അപകടത്തിന് പിന്നാലെ കസ്റ്റഡിയിലെടുത്ത അശ്വന്തിനെ വൈദ്യപരിശോധനക്കായി പൊലീസ് ബീച്ച് ആശുപത്രിയിൽ എത്തിച്ചു. പരിശോധനയ്ക്ക് ശേഷം മടങ്ങവെ, സിനിമ റിവ്യൂ നടത്തുമ്പോൾ കാണിക്കുന്ന സ്വതസിദ്ധമായ ശൈലിയിലാണ് മാധ്യമങ്ങളോട് ഇയാൾ പ്രതികരിച്ചത്.

'ദിസ് ഈസ് അപ് ടു ദ് ഓഫിസർ ആൻഡ് നോട്ട് ടു മീ, കേരള പൊലീസ് ഈസ് ഡൂയിങ് ദേർ ഡ്യൂട്ടി' എന്നായിരുന്നു മാധ്യമപ്രവർത്തകരുടെ ചോദ്യങ്ങളോട് അശ്വന്ത് കോക്കിന്റെ മറുപടി. സംഭവസമയം മദ്യപിച്ചിരുന്നോ എന്ന ചോദ്യത്തിന് 'ദാറ്റ്സ് കേരള പൊലീസ് ..., ഞാൻ പറയില്ല' എന്ന് പരിഹാസത്തോടെ ഇയാൾ പ്രതികരിക്കുകയും ചെയ്തു. ആശുപത്രിയിൽ എത്തിച്ചപ്പോഴും ലഹരി കെട്ടുവിടാതെയുള്ള പെരുമാറ്റമാണ് അശ്വന്തിൽ നിന്ന് ഉണ്ടായത്.

തിങ്കളാഴ്ച വൈകിട്ട് ഏഴരയോടെ കോഴിക്കോട് എരഞ്ഞിപ്പാലത്തിന് സമീപം കൊട്ടാരം റോഡിൽ വെച്ചാണ് അപകട പരമ്പരകൾക്ക് തുടക്കമാകുന്നത്. അശ്വന്ത് സഞ്ചരിച്ചിരുന്ന ഥാർ വാഹനം റോഡരികിൽ നിർത്തിയിട്ടിരുന്ന കാറിലേക്ക് ഇടിച്ചു കയറുകയായിരുന്നുവെന്നാണ് പരാതിക്കാരൻ ആരോപിക്കുന്നത്. ഇതുകൂടാതെ, ഭിന്നശേഷിക്കാരൻ സഞ്ചരിച്ച ഇരുചക്രവാഹനത്തിലും ഥാർ ഇടിച്ചതായി ആരോപണമുണ്ട്.

അപകടമുണ്ടാക്കിയ ശേഷം വാഹനം നിർത്തിയിടാതെ പോകാനാണ് അശ്വന്ത് ശ്രമിച്ചത്. എന്നാൽ ഇത് ശ്രദ്ധയിൽപ്പെട്ട നാട്ടുകാർ വാഹനം തടഞ്ഞു നിർത്തുകയായിരുന്നു. നാട്ടുകാർ തടഞ്ഞുവെച്ചിട്ടും തുടക്കത്തിൽ വാഹനത്തിൽ നിന്ന് പുറത്തിറങ്ങാൻ ഇയാൾ കൂട്ടാക്കിയില്ല. തുടർന്ന് വിവരമറിഞ്ഞ് പൊലീസ് സംഭവസ്ഥലത്തേക്ക് എത്തുകയായിരുന്നു.

സ്ഥലത്തെത്തിയ പൊലീസിനോടും മദ്യലഹരിയിൽ കാലുറക്കാതെ ആടിനിന്ന അശ്വന്ത് തട്ടിക്കയറി. പൊലീസ് ഉദ്യോഗസ്ഥർ ദൃശ്യങ്ങൾ പകർത്തിയതോടെ, 'എന്റെ വീഡിയോ എടുക്കുവാണോ സാറേ' എന്ന് ചോദിച്ച് അശ്വന്ത് കയർക്കുകയായിരുന്നു. 'അടിക്കണോ നീ, ഉണ്ടോ, ഉണ്ടോ?' എന്ന് പൊലീസുകാരന് നേരെ ചോദിച്ച് ഇയാൾ ആക്രമണ രീതിയിൽ പെരുമാറി.