പറന്നുകൊണ്ടിരിക്കെ ശക്തമായ കുലുക്കത്തെ തുടര്‍ന്ന് എയര്‍ഇന്ത്യ വിമാനത്തിലെ മൂന്ന് യാത്രക്കാര്‍ക്ക് പരിക്കേറ്റു. വിമാനത്തിനുള്ളിലെ വിന്‍ഡോ പാനലിന്റെ ഒരു ഭാഗം ഇളകിവീണു. ശ്വാസതടസം അനുഭവപ്പെട്ട യാത്രക്കാരില്‍ ചിലര്‍ക്ക് ഓക്സിജന്‍ മാസ്ക് ധരിക്കേണ്ടിയും വന്നു. സാധാരണ ഇങ്ങനെ സംഭവിക്കുന്നത് വിമാനം ആകാശച്ചുഴിയില്‍ (എയര്‍ ഗട്ടര്‍)​ വീഴുന്പോഴാണ്. സംഭവത്തെ കുറിച്ച്‌ ഡയറക്ടര്‍ ജനറല്‍ ഒഫ് സിവില്‍ ഏവിയേഷന്‍ അന്വേഷണം തുടങ്ങി. ഇതേക്കുറിച്ച്‌ എയര്‍ഇന്ത്യ ഇതുവരെ പ്രതികരിച്ചിട്ടില്ല.

അമൃത്‌സറില്‍ നിന്ന് ഡല്‍ഹിയിലേക്ക് പോയ ബോയിംഗ് 787 ഡ്രീംലൈനര്‍ വിമാനത്തില്‍ ആയിരുന്നു സംഭവം നടന്നത്. 32,​000 അടി ഉയരത്തില്‍ പറന്നുകൊണ്ടിരിക്കെ ഏതാണ്ട് 15 മിനിട്ടോളം വിമാനത്തില്‍ ശക്തമായ കുലുക്കം അനുഭവപ്പെടുകയായിരുന്നു. സീറ്റ്ബെല്‍​റ്റ് ധരിക്കാതെ ഇരുന്ന യാത്രക്കാരിലൊരാള്‍ സീറ്റില്‍ നിന്ന് ഉയര്‍ന്ന് തല മുകളിലെ പാനലില്‍ ചെന്ന് ഇടിക്കുകയായിരുന്നു.

ഇദ്ദേഹത്തിന് സാരമായ പരിക്കുപറ്റി. 18- എ സീറ്റിലെ വിന്‍ഡോ പാനലാണ് ഇളകിവീണത്. പുറത്തെ വിന്‍ഡോ പാനലിന് കേട് സംഭവിക്കാത്തതിനാല്‍ ശക്തമായ കാറ്റ് ഉണ്ടായില്ല. വിമാനം കുലുങ്ങിയതോടെ യാത്രക്കാര്‍ പരിഭ്രാന്തരായി. ഉടന്‍ തന്നെ ചിലര്‍ക്ക് ഓക്സിജന്‍ മാസ്ക് ഘടിപ്പിച്ചു. 12 - യു സീറ്റിന് മുകളിലെ പാനലില്‍ വിള്ളല്‍ വീണു.

വിമാനം ഡല്‍ഹിയില്‍ ഇറക്കിയയുടന്‍ യാത്രക്കാര്‍ക്ക് അടിയന്തര ചികിത്സ നല്‍കുകയും ആശുപത്രിയിലേക്ക് മാറ്റുകയും ചെയ്തു. പരിക്ക് പറ്റിയ യാത്രക്കാരന് തലയില്‍ തുന്നലിടേണ്ടിവന്നു.