ഈ കള്ളന്‍ അങ്ങനെയാണ്. ജനങ്ങളെ ഒന്നും ചെയ്യില്ല. പോലീസുകാരെ മാത്രം തിരഞ്ഞുപിടിച്ച് കൊള്ളയടിക്കുന്ന 20കാരനായ കള്ളനെ അവസാനം മുംബയില്‍ നിന്നും പോലീസ് പിടികൂടി. കമല്‍ജിത്ത് സിംഗ് എന്ന യുവകള്ളനെയാണ് പോലീസ് പിടികൂടിയത്. കല്‍ചൗക്കിയിലെ പോലീസ് ഹെഡ് ക്വാര്‍ട്ടേഴ്‌സില്‍ നടന്ന മോഷണപരമ്പരയിലാണ് ഇയാള്‍ പിടിയിലായത്. പോലീസുകാരുടെ വീട്ടിലും ഹെഡ്ക്വാര്‍ട്ടേഴ്‌സിലും സുരക്ഷയ്ക്ക് ആരും ഉണ്ടാകില്ലെന്ന കണക്കുകൂട്ടലിലാണ് ഇയാള്‍ മോഷണം നടത്തുന്നതെന്ന് പോലീസ് പറഞ്ഞു.

ബുധനാഴ്ച്ച ഒരു പോലീസുകാരന്റെ വീട്ടില്‍ നിന്നും 60 ഗ്രാം സ്വര്‍ണവും 2800 രൂപയും ഇയാള്‍ മോഷ്ടിച്ചു. ഇതിന് പിന്നാലെ മറ്റ് രണ്ട് പോലീസുകാരുടെ വീട്ടില്‍ കയറുമ്പോഴാണ് പിടിയിലായത്. ചെറുപ്രായത്തില്‍ തന്നെ നിരവധി മോഷണങ്ങള്‍ കമല്‍ജിത്ത് നടത്തിയതായി വഡല പോലീസ് അറിയിച്ചു. 15ഓളം പോലീസുകാരുടെ വീടുകളിലാണ് ഇയാള്‍ മോഷണം നടത്തിയതെന്നും പോലീസ് വ്യക്തമാക്കി. 

നേരത്തേ ഇയാളെ പോലീസ് അറസ്റ്റ് ചെയ്‌തെങ്കിലും ജാമ്യത്തില്‍ ഇറങ്ങി വീണ്ടും മോഷണം ആരംഭിക്കുകയായിരുന്നു. ബൈക്കുള പോലീസ് സ്‌റ്റേഷനിലെ കോണ്‍സ്റ്റബിളിന്റെ വീട്ടില്‍ നിന്ന് മോഷണം നടത്തിയതിനാണ് അന്ന് പിടിയിലായത്. സര്‍വീസ് തോക്കും 30 തിരകളും പണവും ആയിരുന്നു അന്ന് മോഷ്ടിച്ചത്. ഇതിന് ശേഷം ജാമ്യത്തില്‍ ഇറങ്ങി വീണ്ടും ആറ് മോഷണങ്ങള്‍ നടത്തി.