സൗദിയിൽ സ്വകാര്യ സ്ഥാപങ്ങളിലേക്കുള്ള പുതിയ റിക്രൂട്ട്മെന്‍ പ്രായപരിധി വ്യവസ്ഥയ്ക്ക് അംഗീകാരം. പുതിയ വ്യവസ്ഥ അനുസരിച്ച് 18 വയസിൽ താഴെയും അറുപത് വയസ്സിന് മുകളിലും ഉള്ളവരെ ഇനി മുതൽ റിക്രൂട്ട് ചെയ്യാനാവില്ല. തൊഴിൽ സാമൂഹിക ക്ഷേമ വകുപ്പാണ് അംഗീകാരം നൽകിയത്. 2016 പാസാക്കിയ റിക്രൂട്ട്മെന്റ് വ്യവസ്ഥയില്‍ വരുത്തിയ ഭേദഗതിയാണ് ഇപ്പോൾ അംഗീകരിച്ചത്. എന്നാൽ , ശാസ്ത്രജ്ഞര്‍, വിദഗ്ദ ഡോക്ടര്‍മാര്‍, ഉന്നത വിദ്യാഭ്യാസ രംഗത്തെ അധ്യാപകന്മാര്‍ എന്നിവർക്ക് പ്രായപരിധി ബാധകമല്ല.

പുതിയ ഭേദഗതി പ്രകാരം സ്വദേശികൾക്കായി മാറ്റിവച്ച ജോലികളിൽ വിദേശികളെ റിക്രൂട്ട് ചെയ്യാൻ പാടില്ല. സ്വദേശവത്കരണം നടപ്പിലാക്കിയ ശേഷം മാത്രമെ വിദേശികളെ ജോലിക്കെടുക്കാൻ പാടുള്ളു

അതേസമയം ശമ്പളം നല്‍കാതിരിക്കല്‍, ബിനാമി ബിസിനസ്സ്, തൊഴിലാളികളെ മറ്റു സ്ഥാപനങ്ങളില്‍ ജോലി ചെയ്യാൻ അനുവദിക്കല്‍ തുടങ്ങിയ നിയമ ലംഘനങ്ങള്‍ നടത്തുന്ന സ്ഥാപനങ്ങളുടെ വിസ അപേക്ഷകള്‍ നിരസിക്കാന്‍ മന്ത്രാലയത്തിനു അധികാരമുണ്ടായിരിക്കും.

തൊഴിലുടമ കേസില്‍ ഉള്‍പ്പെട്ട  സാഹചര്യത്തിലും സ്ഥാപനം നടത്തിക്കൊണ്ടുപോകാൻ കഴിയാതിരിക്കല്‍, മൂന്ന് മാസം ശമ്പളം നല്‍കാതിരിക്കല്‍ തുടങ്ങിയ ഘട്ടങ്ങളില്‍ മന്ത്രാലയത്തിനു ഇടപെട്ട് തൊഴിലാളികളെ മറ്റു സ്ഥാപനങ്ങളിലേക്കുമാറ്റാന്‍ അധികാരമുണ്ടായിരിക്കും.