ഗൾഫ് രാഷ്ട്രങ്ങളിൽ കൊറോണ പടരുന്ന സാഹചര്യത്തിൽ ഇതിനെതിരെ പടപൊരുതാൻ ശക്തമായ ജാഗ്രതാ നിർദ്ദേശങ്ങളാണ് പുലർത്തിപോരുന്നത്. ഇതിനോടകം തന്നെ ഇന്ത്യ ഉൾപ്പടെ നിരവധി രാജ്യങ്ങളുടെ വിമാന സർവീസുകൾ നിർത്തിവയ്ക്കുകയുണ്ടായി. എന്നാൽ ഇപ്പോഴിതാ ഏറെ നിർണായകമായ നീക്കമാണ് കുവൈറ്റ് മുന്നോട്ട് വച്ചിരിക്കുന്നത്. കുവൈത്ത് ടെലിവിഷന്‍ ചാനലില്‍ മലയാളികള്‍ക്കുവേണ്ടി തനി കോഴിക്കോടന്‍ ഭാഷയില്‍ കൊറോണ വൈറസ് വാര്‍ത്തകളും ബോധവത്കരണവും പ്രത്യക്ഷപ്പെട്ടതോടെ മലയാളികൾ തന്നെ അമ്പരന്നുപോയി. ഒരുപക്ഷെ ചരിത്രത്തിൽ ആദ്യമായിട്ടാണ് ഇത്തരത്തിൽ തനി കോഴിക്കോടൻ ഭാഷയിൽ വാർത്ത അവതരിപ്പിക്കുന്നത്. മലയാളികളെ ഏവരെയും അമ്പരപ്പിച്ച് മറിയം അല്‍ ഖബന്ദി എന്ന അവതാരിക ഏറെ ജനശ്രദ്ധ പിടിച്ചുപറ്റുകയുണ്ടായി.

ഇത് നമ്മക്ക് കിട്ടിയ ബല്യ ചാന്‍സാണ്...ഞ്ഞമ്മടെ കൂട്ടത്തില്‍ മലയാളം അറിയാത്തവര്‍ക്ക് ഇത് ട്രാന്‍സ്ലേറ്റ് ചെയ്ത്‌കൊടുക്കണം...മറിയം കുവൈത്ത് ടെലിവിഷന്‍ ചാനലിലൂടെ പറഞ്ഞ് തുടങ്ങിയത് ഇങ്ങനെയാണ്. ഇതോടൊപ്പം തന്നെ കുവൈത്ത് സര്‍ക്കാര്‍ നല്‍കിയ നിര്‍ദേശങ്ങളും കൊറോണ വൈറസ് ബാധിതരുടെ എണ്ണവും സ്വീകരിക്കേണ്ട മുന്‍കരുതലുകളും അടക്കമാണ് മറിയം അല്‍ ഖബന്ദി വിവരിക്കുന്നത്. നേരത്തേയും മലയാളത്തില്‍ വിവിധ പരിപാടികള്‍ അവതരിപ്പിച്ച് പകുതി മലയാളി കൂടിയായ മറിയം അല്‍ ഖബന്ദി പ്രവാസി മലയാളികളുടെ ശ്രദ്ധനേടിയിട്ടുണ്ട്.

അതേസമയം അബ്ദുള്ള അല്‍ ഖബന്ദി എന്ന കുവൈത്ത് സ്വദേശിയായ മറിയത്തിന്റെ പിതാവ് 1982-ലാണ് കോഴിക്കോട്ടുകാരിയായ ആയിഷാബി ഉമര്‍കോയയെ വിവാഹം കഴിക്കുന്നത്. 1987-ല്‍ ഇവര്‍ക്ക് ജനിച്ചതാണ് മറിയം അല്‍ ഖബന്ദി എന്ന ഇപ്പോഴത്തെ താരം. വിദ്യാഭ്യാസം പൂര്‍ണ്ണമായും കുവൈത്തില്‍ പൂര്‍ത്തിയാക്കിയ മറിയം അവിടുത്തെ ടെലിവിഷന്‍ ചാനലില്‍ കാലാവസ്ഥ വാര്‍ത്താ അവതാരകയായി മാറുകയായിരുന്നു. അതോടൊപ്പം തന്നെ കുവൈത്ത് സര്‍ക്കാര്‍ സ്‌കൂളിലെ സര്‍ക്കാര്‍ അധ്യാപിക കൂടിയാണ് അവര്‍. ഉമ്മ ആയിഷയില്‍ നിന്നാണ് ഒഴുക്കോടെ കോഴിക്കോടന്‍ മലയാളം പറയാന്‍ പഠിച്ചത് എന്നാണ് വ്യക്തമാക്കുന്നത്.