യുഎഇ താമസ വീസയുള്ളവര്‍ക്കും രാജ്യത്തേയ്ക്ക് പ്രവേശനം നിരോധിച്ചതോടെ ‌ഇന്ത്യയിൽ നിന്നടക്കമുള്ള പ്രവാസികളുടെ പ്രതീക്ഷകൾക്ക് തിരിച്ചടിയായി മാറിയിരിക്കുകയാണ്. യുഎഇ താമസ വീസയുള്ള നൂറുകണക്കിന് പേർ അവധിയാഘോഷിക്കാനും മറ്റു അടിയന്തര ആവശ്യങ്ങൾക്കും ഇന്ത്യയിലും മറ്റു വിദേശ രാജ്യങ്ങളിലുമാണ് കഴിഞ്ഞുപോരുന്നത്. പുതിയ വീസ നിയമം പ്രാബല്യത്തിൽ വന്നതോടെ ഇവർക്കൊക്കെ രണ്ടാഴ്ചത്തേയ്ക്ക് യുഎഇയിൽ തിരിച്ചു വരാൻ സാധിക്കില്ല. എന്നാൽ തന്നെയും നിർഭാഗ്യവശാൽ കോവിഡ്–19 കൂടുതൽ വ്യാപാകമായാൽ ഇത് ചുരുങ്ങിയത് ഒരു മാസത്തോളം നീളാനും സാധ്യതയുണ്ട്.

യുഎഇയിലെ കെട്ടിട നിർമാണ കമ്പനികൾ, ഗ്രോസറി, കഫ്റ്റീരിയ, സൂപ്പർമാർക്കറ്റ് തുടങ്ങിയവകളിലും ജോലി ചെയ്യുന്ന തുച്ഛ വരുമാനക്കാരിൽ ഒട്ടുമിക്ക പ്രവാസികളും ഇപ്പോൾ അവധിക്കായി നാട്ടിലാണ് കഴിഞ്ഞുപോരുന്നത്. ഇവരുടെ വരവ് മുടങ്ങുന്നത് ജോലിയും വീസയും നഷ്ടപ്പെടാനും ഇടയാക്കുന്നതായിരിക്കും. എന്നാൽ, വീസാ കാലാവധിയുടെ കാര്യത്തിൽ യുഎഇ–ഇന്ത്യാ അധികൃതരുടെ ഭാഗത്ത് നിന്ന് ഇടപെടലുകളുണ്ടാകുമെന്ന പ്രതീക്ഷയും പുലർത്തിപ്പോരുകയാണ്. നാട്ടിൽ വെറുതെയിരിക്കുമ്പോഴുള്ള ചെലവുകൾ താങ്ങാനാകാത്തതും പ്രവാസി ഇന്ത്യക്കാർക്ക് നൽകിവരുന്ന നഷ്ടം വലിയ പ്രശ്നമാകുകായും ചെയ്യും. ഇവരോടൊപ്പം ബിസിനസ് ആവശ്യാർഥം ഇന്ത്യയിലുള്ളവരും പ്രതിസന്ധിയിലാണ്.

അതോടൊപ്പം തന്നെ വ്യാഴാഴ്ച ഉച്ചയ്ക്ക് യുഎഇ സമയം 12നാണ് വിദേശികൾക്ക് യുഎഇയിലേയ്ക്കുള്ള പ്രവേശനം തടഞ്ഞത്. ഇന്നലെ അധികൃതർ ഇൗ അറിയിപ്പ് പുറത്തുവിട്ടയുടൻ തന്നെ വിമാന ടിക്കറ്റ് കരസ്ഥമാക്കി ഇവിടെയെത്തിയവരും നിരവധിയാണ്. അതേസമയം, കോവിഡ് –19 ബാധിത രാജ്യങ്ങളിൽ നിന്ന് യുഎഇയിലെത്തുന്നവര്‍ ചുരുങ്ങിയത് 14 ദിവസം സ്വന്തം താമസ സ്ഥലങ്ങളിൽ ക്വാറന്റീനിൽ നിൽക്കാൻ അധികൃതർ നിർദേശിക്കുകയുണ്ടായി. എന്നാൽ, ലേബർ ക്യാംപുകളിലും മറ്റും താമസിക്കുന്ന ഒട്ടുമിക്ക പ്രവാസികൾക്കും ഇതെത്രമാത്രം നടപ്പിലാക്കാൻ കഴിയും എന്നതാണ് മറ്റൊരു പ്രശ്നം.