രാത്രി 11 മുതല്‍ രാവിലെ 6 വരെ ഉണ്ടായിരുന്ന യാത്രാ നിയന്ത്രണം കൂടി നീക്കിയതോടെ നഗരത്തില്‍ വീണ്ടും തിരക്ക്. ഷോപ്പിങ് മാളുകളിലും ഭക്ഷണശാലകളിലും 12 വയസ്സില്‍ താഴെയുള്ളവര്‍ക്കും 60നു മുകളിലുള്ളവര്‍ക്കും ഏര്‍പ്പെടുത്തിയ വിലക്കുകളും നീക്കിയിരുന്നു. യാത്രാനിയന്ത്രണം നീക്കിയതോടെ ഇതര എമിറേറ്റുകളില്‍ നിന്നുള്ളവര്‍ സംഘമായി എത്തിത്തുടങ്ങി.

കാറില്‍ മൂന്നുപേരുടെ യാത്രയ്ക്കാണ് അനുമതിയെങ്കിലും കുടുംബാംഗങ്ങള്‍ ഒന്നിച്ചുള്ള യാത്രയ്ക്കു വിലക്ക് ഇല്ല. മെട്രോ സര്‍വീസും പഴയതുപോലെയായി.
മാര്‍ച്ച് 26 മുതലുളള നിയന്ത്രണങ്ങളാണ് ഒഴിവാക്കിയത്. ബീച്ചുകളും ക്ലബുകളും സജീവമായി. വിപണിയും ഉണര്‍ന്നുവെങ്കിലും സുരക്ഷാ മുന്‍കരുതലിലാണ് ഇപ്പോഴും നഗരം. ആള്‍ക്കൂട്ടമുള്ളിടത്ത് സാമൂഹിക അകലം ഓര്‍മിപ്പിച്ച് സുരക്ഷാ ഉദ്യോഗസ്ഥര്‍ എത്തുന്നു.

ദുബായ് ഫ്രെയിം, സ്‌കീ ദുബായ്, തീം പാര്‍ക്കുകള്‍ എന്നിവിടങ്ങളില്‍ തിരക്കുണ്ട്. മ്യൂസിയങ്ങളും തിയറ്ററുകളും തുറന്നിട്ടുണ്ട്. ഷാര്‍ജയിലും ഷോപ്പിങ് മാളുകളും വാണിജ്യ കേന്ദ്രങ്ങളും ജിമ്മുകളും തുറന്നു. എന്നാല്‍ അബുദാബിയില്‍ പ്രവേശിക്കാന്‍ വിലക്ക് ഉണ്ട്.
അതേ സമയം ,വന്ദേഭാരത് മിഷന്‍ വിമാനങ്ങള്‍ക്കുപുറമേ യഥേഷ്ടം ചാര്‍ട്ടേഡ് വിമാനങ്ങളും പറന്നുതുടങ്ങിയതോടെ ചില ദിവസങ്ങളില്‍ വേണ്ടത്ര യാത്രക്കാരില്ല എന്നത് സംഘാടകരെയും പ്രതിസന്ധിയിലാക്കുകയാണ്. ഇതോടെ സംഘാടകരെ സഹായിക്കാന്‍ ഇടനിലക്കാരായി ട്രാവല്‍ ഏജന്‍സികള്‍തന്നെ രംഗത്തിറങ്ങി. ഓരോ ദിവസവും രണ്ടോ മൂന്നോ സീറ്റുകള്‍ ഒഴിവുണ്ടെന്ന് കാണിച്ച് ഏതാനും ട്രാവല്‍ ഏജന്‍സികള്‍ വാട്സാപ്പ് സന്ദേശങ്ങളും വ്യാപകമായി പ്രചരിപ്പിക്കുന്നു.

വിവിധ സാമൂഹിക-സാംസ്‌കാരിക കൂട്ടായ്മകളാണ് നാട്ടിലേക്ക് ചാര്‍ട്ടേഡ് വിമാനങ്ങള്‍ക്കായി മുന്നിട്ടിറങ്ങുന്നത്. ഇതിനായി ഏതെങ്കിലും ട്രാവല്‍ ഏജന്റുമാരുടെ സഹായവും അവര്‍ തേടുന്നു. ചില ഏജന്‍സികള്‍ മുന്‍കൂട്ടിത്തന്നെ ചാര്‍ട്ടേഡ് വിമാനങ്ങള്‍ പറത്താനുള്ള അനുമതി വാങ്ങിച്ചിരുന്നു.

എന്നാല്‍, ഏതെങ്കിലും സംഘടനകളുടെ മേല്‍വിലാസത്തിലാവണം യാത്ര സംഘടിപ്പിക്കേണ്ടതെന്നതിനാല്‍ ട്രാവല്‍ ഏജന്‍സികളും സംഘടനകളും തമ്മില്‍ ധാരണയിലെത്തുന്നതാണ് പതിവ്. ചില സംഘടനകളാകട്ടെ വിമാനക്കമ്പനികളുമായി നേരിട്ടുതന്നെ ഇടപാടുകളും നടത്തുന്നു. അതെന്തായാലും പഞ്ചായത്ത് തലത്തിലുള്ള കൂട്ടായ്മകള്‍വരെ എല്ലാ ഗള്‍ഫ് നാടുകളില്‍നിന്നുമായി ചാര്‍ട്ടേഡ് വിമാനങ്ങള്‍ ഏര്‍പ്പെടുത്തിയിരുന്നു. പെട്ടെന്ന് നിരവധി വിമാനങ്ങള്‍ ഇത്തരത്തില്‍ എത്തിയതോടെ അത്യാവശ്യക്കാര്‍ക്കെല്ലാം പെട്ടെന്നുതന്നെ യാത്രചെയ്യാനുള്ള വഴി തുറന്നു.

അതിനിടെ യു.എ.ഇ. പഴയനിലയിലേക്ക് മാറുന്നുവെന്ന പ്രഖ്യാപനവും പ്രചാരണവും വന്നതോടെ പലരും യാത്രകള്‍ മാറ്റിവെച്ചിട്ടുണ്ട്. മിക്കവരും കുടുംബങ്ങളെ നാട്ടിലേക്കയച്ച് യു.എ.ഇ. യില്‍ത്തന്നെ പിടിച്ചുനില്‍ക്കാനുള്ള പ്രയത്‌നത്തിലാണ്. നാട്ടിലേക്ക് പോയാല്‍ എപ്പോള്‍ തിരിച്ചെത്താനാവും എന്നതിലെ അനിശ്ചിതത്വവും കുറെപ്പേരുടെ യാത്ര മാറ്റിവെക്കാന്‍ കാരണമായി.

ഇതൊക്കെ കാരണമാണ് ആദ്യനാളുകളിലെ തിരക്കും സമ്മര്‍ദവും നാട്ടിലേക്കുള്ള ടിക്കറ്റിനുവേണ്ടി ഇപ്പോള്‍ ഇല്ലാതാവാന്‍ കാരണം. ഇതോടെ ചാര്‍ട്ടേഡ് വിമാനങ്ങള്‍ക്കായി മുന്നിട്ടിറങ്ങിയവരും അല്‍പ്പം പ്രയാസത്തിലായി. തുടര്‍ന്നാണ് യാത്രക്കാരെ പിടിക്കാന്‍ ട്രാവല്‍ ഏജന്‍സികളും രംഗത്തിറങ്ങിയത്.