നാട്ടിലേക്ക് മടങ്ങാന്‍ ആഗ്രഹിക്കുന്ന പ്രവാസികള്‍ക്ക് ആശ്വാസമായി വന്ദേ ഭാരത് മിഷന്റെ നാലാംഘട്ട വിമാനങ്ങളുടെ ഷെഡ്യൂളെത്തിയെങ്കിലും ആശങ്കകള്‍ ബാക്കി
കോവിഡ് വ്യാപനം ശക്തമായതോടെയാണ് പ്രവാസികളെ നാട്ടിലെത്തിക്കാന്‍ കേന്ദ്രസര്‍ക്കാര്‍ വന്ദേഭാരത് മിഷന്‍ ആരംഭിച്ചത് .അതോടൊപ്പം തന്നെ പല വിവാദങ്ങളും തലപൊക്കുകയും ചെയ്തു . നാട്ടിലേക്ക് മടങ്ങാന്‍ ആഗ്രഹിക്കുന്ന പ്രവാസികള്‍ക്ക് ആശ്വാസമായി വന്ദേ ഭാരത് മിഷന്റെ നാലാംഘട്ട വിമാനങ്ങളുടെ ഷെഡ്യൂളെത്തിയെങ്കിലും ആശങ്ക ബാക്കിയാണ്. റിയാദ്, ജിദ്ദ, ദമ്മാം എന്നിവിടങ്ങളില്‍ നിന്ന് കേരളത്തിലെ വിമാനത്താവളങ്ങളിലേക്ക് ജൂലൈ മൂന്ന് മുതല്‍ 10 വരെയുള്ള നിര്‍ദിഷ്ട 11 വിമാന സര്‍വിസുകളില്‍ സീറ്റുറപ്പിക്കാനെന്താണ് വഴിയെന്ന് തലപുകക്കുകയാണ് ഇന്ത്യന്‍ എംബസിയില്‍ രജിസ്റ്റര്‍ ചെയ്ത് നാടണയാന്‍ കാത്തിരിക്കുന്നവര്‍. ഈ വിമാനങ്ങളിലേക്കുള്ള ലിസ്റ്റില്‍ ഇടംപിടിക്കാന്‍ എന്താണ് ചെയ്യേണ്ടത് എന്ന് ചോദിക്കുന്നവര്‍ നിരവധിയാണ്. അര്‍ഹതയുള്ളവര്‍ തഴയപ്പെടുകയും അനര്‍ഹര്‍ കയറിപ്പോകുകയും ചെയ്യുന്നു എന്ന ആരോപണം പുകഞ്ഞുനില്‍ക്കുന്ന പശ്ചാത്തലത്തിലാണ് ഈ ആശങ്ക. രോഗികളും വിസ തീര്‍ന്നവരും പ്രായാധിക്യമുള്ളവരുമടക്കം അത്യാവശ്യമായി നാട്ടില്‍ പോകേണ്ടവര്‍ക്ക് അവരുടെ അര്‍ഹത തെളിവുസഹിതം എംബസിയെ ബോധ്യപ്പെടുത്താനാവാത്തതാണ് പ്രശ്‌നം.
അതിനായാല്‍ ലിസ്റ്റില്‍ അര്‍ഹമായ മുന്‍ഗണന നേടിയെടുക്കാന്‍ കഴിയുമെന്ന് അവരെല്ലാം കരുതുന്നു. ഗൂഗ്ള്‍ ഫോം ഉപയോഗിച്ചാണ് എംബസി രജിസ്‌ട്രേഷന്‍ നടത്തുന്നത്. ഇതില്‍ യാത്രയുടെ കാരണം രേഖപ്പെടുത്താന്‍ കോളം നല്‍കിയിട്ടുണ്ടെങ്കിലും അപേക്ഷകന്‍ നേരിടുന്ന പ്രശ്‌നത്തിന്റെ ഗൗരവം അധികൃതരെ ബോധ്യപ്പെടുത്താന്‍ അവസരമില്ല എന്നതാണ് പ്രശ്‌നം. പരിചയക്കാരായ സാമൂഹിക പ്രവര്‍ത്തകര്‍ വഴിയോ മറ്റോ എംബസി അധികൃതരെ ബോധിപ്പിക്കാന്‍ കഴിയുന്നവര്‍ക്ക് അവസരം ലഭിക്കുന്നുണ്ട്. സാമൂഹിക പ്രവര്‍ത്തകരെ പരിചയമില്ലാത്തവര്‍ എന്ത് ചെയ്യുമെന്ന ചോദ്യമാണ് ഇതോടെ ഉയരുന്നത്. നാലാംഘട്ട വിമാനങ്ങളുടെ ഷെഡ്യൂള്‍ പുറത്തുവന്നയുടന്‍ ഈ പ്രശ്‌നം ചൂണ്ടിക്കാട്ടിയാണ് പലരും മുന്നോട്ട് വന്നിരിക്കുന്നത്. രജിസ്റ്റര്‍ ചെയ്തിട്ട് ഒരുപാട് നാളായെന്ന് അവരില്‍ പലരും പറയുന്നു. രോഗബാധിതര്‍, വിസിറ്റ് വിസയുടെ കാലാവധി കഴിയാനടുത്തവര്‍, ജോലി നഷ്ടപ്പെട്ടവര്‍, ഫൈനല്‍ എക്‌സിറ്റിലുള്ളവര്‍, വിദ്യാര്‍ഥികള്‍ തുടങ്ങി നിരവധിയാളുകള്‍ ഇങ്ങനെ രജിസ്റ്റര്‍ ചെയ്ത് അനന്തമായി കാത്തിരിക്കുന്നവരിലുണ്ട്.
എംബസിയെ നേരിട്ട് സമീപിച്ച് അര്‍ഹത ബോധ്യപ്പെടുത്താനായാല്‍ എളുപ്പമായേനെ എന്ന് ഇവര്‍ പറയുന്നു. യാത്രക്ക് തിരഞ്ഞെടുത്താല്‍ എയര്‍ ഇന്ത്യ ടിക്കറ്റ് വാങ്ങലാണ് അടുത്ത പ്രശ്‌നം. ഈ കൊടും വേനലില്‍ എയര്‍ ഇന്ത്യ ഓഫിസുകള്‍ക്ക് മുന്നില്‍ ചെന്ന് ആറും ഏഴും മണിക്കൂര്‍ ക്യൂ നില്‍ക്കുന്നതിനെ കുറിച്ച് ആലോചിക്കാന്‍ പോലും കഴിയില്ലെന്ന് ആളുകള്‍ പറയുന്നു. വേനല്‍ കടുത്തിരിക്കുന്ന ഈ അവസരത്തില്‍ അങ്ങനെയുണ്ടായാല്‍ അതിനപ്പുറം നരകയാതന വേറെയുണ്ടാവില്ലെന്നും അവര്‍ ആശങ്കപ്പെടുന്നു. ഇന്ത്യന്‍ അംബാസഡര്‍ ഡോ. ഔസാഫ് സഈദ് രണ്ടാഴ്ച മുമ്പ് സാമൂഹിക പ്രവര്‍ത്തകരുമായി നടത്തിയ കൂടിക്കാഴ്ചയില്‍ ഇനി അത്തരം സാഹചര്യമുണ്ടാവില്ലെന്ന് ഉറപ്പുനല്‍കിയിരുന്നു. ഒരുസമയം ഒന്നില്‍ കൂടുതല്‍ വിമാനങ്ങളിലേക്കുള്ള ടിക്കറ്റ് വിതരണം നടത്തില്ലെന്നും അപ്പോള്‍ വലിയ ആള്‍ത്തിരക്കുണ്ടാവില്ലെന്നും അദ്ദേഹം പറയുന്നു. അത്തരത്തില്‍ ഒരു നിര്‍ദേശം എയര്‍ ഇന്ത്യക്ക് നല്‍കിയിട്ടുണ്ടെന്നും ഓണ്‍ലൈന്‍ ടിക്കറ്റിങ് സാധ്യത കൂടി പരിഗണിക്കാന്‍ ആവശ്യപ്പെട്ടിട്ടുണ്ടെന്നും അംബാസഡര്‍ നല്‍കിയ ഉറപ്പില്‍ വിശ്വസിക്കുകയാണ് ആളുകള്‍.
https://www.facebook.com/Malayalivartha
