അനിശ്ചിതാവസ്ഥ തുടരുന്നു... സഞ്ചാരികളെ സ്വാഗതം ചെയ്ത് ദുബായ്... കാത്തിരിപ്പ് അവസാനിക്കാതെ ഇന്ത്യ
കോവിഡ് എന്ന മഹാമാരി ദുരന്തം വിതച്ച നാളുകളായിരുന്നു ഗള്ഫ് മേഖലയില് കഴിഞ്ഞപോയത്. പൂര്ണ്ണമായും അതില് നിന്നും മുക്തമായിട്ടില്ലെങ്കില് പോലും അതിജീവനത്തിനായുള്ള തയ്യാറെടുപ്പുകള് തുടങ്ങിക്കഴിഞ്ഞു വിവിധ രാജ്യങ്ങള്. ദുബൈയും പുതിയ ജീവിതത്തിലേക്ക് കുതിക്കുകയാണ് . ദുബൈയിലേക്ക് സഞ്ചാരികള് ഇന്നുമുതല് എത്തിത്തുടങ്ങും. വിവിധ രാജ്യങ്ങളിലെ സഞ്ചാരികള്ക്കാണ് ദുബൈ വിമാനത്താവളം ഇന്നുമുതല് സ്വാഗതമോതുന്നത്. എന്നാല്, ഇന്ത്യയില് നിന്നുള്ള സര്വിസില് അനിശ്ചിതാവസ്ഥ തുടരുന്നതിനാല് മലയാളികള് അടക്കമുള്ള പ്രവാസികള്ക്ക് ഇതിന്റെ ഗുണം ലഭിക്കില്ല. 50ഓളം രാജ്യങ്ങളില് നിന്നുള്ള യാത്രക്കാരാണ് എത്തുന്നത്. യൂറോപ്, ആഫ്രിക്ക എന്നീ ഭൂഖണ്ഡങ്ങള്ക്കുപുറമെ ഏഷ്യയില് നിന്നുള്ള ശ്രീലങ്ക, പാകിസ്താന്, ബംഗ്ലാദേശ് എന്നീ രാജ്യങ്ങളിലെ സഞ്ചാരികളെയും യു.എ.ഇയില് എത്തിക്കും.
യാത്രയുടെ 96 മണിക്കൂര് മുമ്പ് നടത്തിയ പരിശോധന ഫലവുമായാണ് യാത്രക്കാര് എത്തേണ്ടത്. കോവിഡ് നെഗറ്റിവ് സര്ട്ടിഫിക്കറ്റ് ഉള്ളവര്ക്ക് ക്വാറന്റീന് നിര്ബന്ധമില്ല. എന്നാല്, നാട്ടില് പരിശോധന നടത്താത്തവര്ക്ക് ദുബൈ വിമാനത്താവളത്തില് പരിശോധന സൗകര്യമുണ്ട്. ഇതില് പോസിറ്റിവായാല് ക്വാറന്റീനില് കഴിയേണ്ടിവരും. എല്ലാ സഞ്ചാരികളെയും സ്വാഗതം ചെയ്യുന്നുവെന്ന് ദുബൈ ജനറല് ഡയറക്ടറേറ്റ് ഓഫ് റസിഡന്സി ആന്ഡ് ഫോറിനേഴ്സ് അഫയേഴ്സ് (ജി.ഡി.ആര്.എഫ്.എ) ഡയറക്ടര് ജനറല് മേജര് ജനറല് മുഹമ്മദ് അഹ്മദ് അല് മറി പറഞ്ഞു. സാമ്പത്തിക പ്രവര്ത്തനങ്ങള് പുനരാരംഭിക്കുന്നതിനുള്ള പ്രധാന നടപടിയാണ് ദുബൈ വിമാനത്താവളങ്ങളിലൂടെ വിമാന സര്വിസുകള് പുനരാരംഭിക്കുന്നത്.
അവരുടെ രണ്ടാമത്തെ രാജ്യമായ യു.എ.ഇയില് എല്ലാവിധ സുരക്ഷ ക്രമീകരണങ്ങളും ഒരുക്കിയിട്ടുണ്ടെന്നും അദ്ദേഹം പറഞ്ഞു.ദുബൈ വിമാനത്താവളങ്ങളിലെ പങ്കാളികളുമായി സഹകരിച്ച് എല്ലാ യാത്രക്കാരെയും സ്വാഗതം ചെയ്യാന് ദുബൈ ഒരുങ്ങിയതായി പോര്ട്ട്സ് അഫയേഴ്സ് ജനറല് ഡയറക്ടര് അസിസ്റ്റന്റ് ബ്രിഗേഡിയര് തലാല് അഹ്മദ് അല് ഷാന്കിതി വ്യക്തമാക്കി. വിമാനങ്ങള് പുനരാരംഭിച്ചശേഷം യാത്രക്കാരുടെ എണ്ണത്തില് വര്ധനവുണ്ടായി. ഇത് സാമ്പത്തിക, നിക്ഷേപ മേഖലകള്ക്ക് ഉത്തേജനം നല്കുമെന്നും ടൂറിസം മേഖലക്ക് കൂടുതല് പ്രതീക്ഷ നല്കുമെന്നും അദ്ദേഹം പറഞ്ഞു.
ദുബൈയില് തിരിച്ചെത്തുന്നവര്ക്ക് സ്വാഗതമോതി പാസ്പോര്ട്ടില് പുതിയ സ്റ്റിക്കര് പതിച്ചുനല്കും. 'നിങ്ങളുടെ രണ്ടാം വീട്ടിലേക്ക്ഊ ഷ്മള സ്വാഗതം'എന്ന ലേബലാണ് പാസ്പോര്ട്ടില് പതിക്കുന്നത്. ദുബൈ ജനറല് ഡയറക്ടറേറ്റ് ഓഫ് റസിഡന്സി ആന്ഡ് ഫോറിനേഴ്സ് അഫയേഴ്സിന്റെ സ്റ്റിക്കറാണ് പാസ്പോര്ട്ടിന്റെ പുറംചട്ടയില് പതിച്ചുനല്കുന്നത്.
"
https://www.facebook.com/Malayalivartha
