കോഴിക്കോട് വിമാനത്താവളത്തില്‍ എയര്‍ ഇന്ത്യ വിമാനത്തിന്റെ എന്‍ജിന്‍ പൊട്ടിതകര്‍ന്നു
കോഴിക്കോട് വിമാനത്താവളത്തില്‍ നിയന്ത്രണംവിട്ടു റണ്‍വേയില്‍നിന്നു തെന്നിമാറിയ എയര്‍ ഇന്ത്യ വിമാനത്തിന്റെ ചക്രവും എന്‍ജിനും പൊട്ടിത്തെറിച്ചതോടെ വിമാനത്താവളം ആശങ്കയിലാഴ്ന്നു. ഇന്നലെ രാവിലെ പതിനൊന്നരയോടെ ദുബായിലേക്ക് യാത്രതിരിച്ച വിമാനമാണ് അപകടത്തില്‍പെട്ടത്. വിമാനത്താവളത്തില്‍ വലിയ വിമാനങ്ങളുടെ സാധ്യത പരിശോധിക്കുന്നതിന്റെ ഭാഗമായി ഡിജിസിഎ ഉദ്യോഗസ്ഥര്‍ പരിശോധന നടത്തുന്ന സമയത്തുതന്നെയായിരുന്നു അപകടം. 172 യാത്രക്കാരാണ് വിമാനത്തിലുണ്ടായിരുന്നത്. അവസരോചിതമായി ഇടപെട്ട പൈലറ്റ്, വിമാനം റണ്‍വേയിലേക്ക് എത്തിച്ചു നിര്‍ത്തിയതോടെ ഒഴിവായതു വന്‍ ദുരന്തം. യാത്രക്കാരെ സുരക്ഷിതരായി പുറത്തിറക്കി.
ദുബായിലേക്കു യാത്രതിരിക്കാന്‍ റണ്‍വേയിലേക്കു പോയ എഐ 937 വിമാനം ടേക് ഓഫ് ചെയ്യുന്നതിനു തൊട്ടുമുന്‍പ് വിമാനത്തില്‍നിന്നു ശബ്ദമുണ്ടായി. എന്‍ജിനില്‍ ഒന്നു കേടായെന്ന വിവരം പൈലറ്റ് എയര്‍ ട്രാഫിക് കണ്‍ട്രോള്‍ വിഭാഗത്തെ അറിയിച്ചു. വിമാനം മുന്നോട്ടു കുതിക്കുന്നതിനിടെ യന്ത്രഭാഗങ്ങള്‍ തകര്‍ന്നു ചെറുഭാഗങ്ങളായി റണ്‍വേയിലേക്കു വീണുകൊണ്ടിരുന്നു. വിമാനത്തിന്റെ നിയന്ത്രണം വലതുവശത്തെ എന്‍ജിനിലേക്കു മാറ്റിയതിനൊപ്പം ഇടതുവശത്തേക്കു തെന്നിയ വിമാനം റണ്‍വേ പരിധിവിട്ടു പുറത്തേക്കുനീങ്ങി. വശങ്ങളില്‍ റണ്‍വേ കാണാന്‍ സ്ഥാപിച്ച ലൈറ്റുകളിലൂടെയും ചെറിയ തറകളിലൂടെയും കയറിയിറങ്ങിയതോടെ വിമാനത്തിന്റെ ഇടതുവശത്തെ ചക്രങ്ങളില്‍ ഉള്‍ഭാഗത്തേതു പൊട്ടിത്തെറിച്ചു.
വലത്തോട്ടു മാറ്റാനായതിനാല്‍ വിമാനം റണ്‍വേയുടെ മധ്യത്തിലെത്തിച്ചു നിര്‍ത്താന്‍ പൈലറ്റിനു കഴിഞ്ഞു. അപകടമുണ്ടായാല്‍ രക്ഷാപ്രവര്‍ത്തനം നടത്താന്‍ അഗ്‌നിശമന സേനയും ആംബുലന്‍സുകളും മറ്റും ഈ സമയത്തിനകം വിമാനത്തിനു ചുറ്റും നിരന്നു. പിന്നീട്, ടാക്‌സി ബേയിലൂടെ ഏപ്രണില്‍ എത്തിച്ച് യാത്രക്കാരെ സുരക്ഷിതരായി പുറത്തിറക്കി. റണ്‍വേയില്‍ ചിതറിയ യന്ത്രഭാഗങ്ങള്‍ വൃത്തിയാക്കാന്‍ റണ്‍വേ ഒന്നര മണിക്കൂര്‍ അടച്ചിട്ടു. പിന്നീടാണു വിമാന സര്‍വീസുകള്‍ ആരംഭിച്ചത്. അപകടത്തില്‍പെട്ട വിമാനത്തിലെ യാത്രക്കാരെ മറ്റൊരു വിമാനമെത്തിച്ച് കൊണ്ടുപോകുമെന്ന് എയര്‍ ഇന്ത്യ അധികൃതര്‍ അറിയിച്ചു.
https://www.facebook.com/Malayalivartha
