എല്ലാവരെയും ഞെട്ടിച്ച് ദുബായ് ഭരണാധികാരി... ഉയര്‍ന്ന ജീവിതച്ചെലവിനെക്കുറിച്ച് പരാതിപ്പെട്ട അല്‍ മസ്‌റൂഇയെന്ന സ്വദേശി വയോധികന് ജോലിയും വീടും നല്‍കി
ഉയര്‍ന്ന ജീവിതച്ചെലവിനെക്കുറിച്ച് പരാതിപ്പെട്ട അല്‍ മസ്‌റൂഇയെന്ന സ്വദേശി വയോധികന് ജോലിയും വീടും നല്‍കി ഏവരെയും ഞെട്ടിച്ചിരിക്കുകയാണ് ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം. ദിവസങ്ങള്‍ക്കു മുമ്ബ്, അജ്മാന്‍ റേഡിയോയിലെ 'അല്‍ റാബിയ വല്‍ നാസ്' എന്ന ലൈവ് പരിപാടിയിലേയ്ക്ക് വിളിച്ചാണ് അലി റഷീദ് അല്‍ മസ്‌റൂഈ ഉയര്‍ന്ന ജീവിതച്ചെലവിനെക്കുറിച്ച് പരാതിപ്പെട്ടത്. പ്രതിമാസം 13,000 ദിര്‍ഹം നല്‍കി ജീവിക്കാന്‍ തനിക്ക് സാധിക്കുന്നില്ലെന്നായിരുന്ന മസ്‌റൂഈയുടെ പരാതി.
തുടര്‍ന്ന് അടുത്ത 24 മണിക്കൂറിനുള്ളില്‍, ഇദ്ദേഹത്തിനും കുടുംബത്തിനും ജീവിക്കാന്‍ ആവശ്യമായ എല്ലാ സഹായങ്ങളും എത്തിച്ചുനല്‍കാന്‍ ഷെയ്ഖ് മുഹമ്മദ് ഉത്തരവിടുകയായിരുന്നു. കാലതാമസം കൂടാതെ തീരുമാനം നടപ്പാക്കാനായിരുന്നു ഉത്തരവ്. സാമൂഹിക വികസന മന്ത്രാലയത്തില്‍ സാമൂഹിക ഗവേഷകന്‍ എന്ന തസ്തികയിലാണ് ഈ വയോധികന് ജോലി നല്‍കിയത്. ഇതിന് ഉത്തരവിട്ട യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന് അദ്ദേഹം ഹൃദയം നിറഞ്ഞ കൃതജ്ഞത രേഖപ്പെടുത്തി.
ട്വിറ്ററില്‍ പോസ്റ്റ് ചെയ്ത വിഡിയോയില്‍ ഷെയ്ഖ് മുഹമ്മദിനെയും യുഎഇയെയും അദ്ദേഹം പ്രകീര്‍ത്തിച്ചു. 'എനിക്കിപ്പോള്‍ വലിയ സന്തോഷവും അഭിമാനവും തോന്നുന്നു. വീടും ജോലിയും നന്മയും തന്നെ ഷെയ്ഖ് മുഹമ്മദിനോട് ഞാനേറെ കടപ്പെട്ടിരിക്കുന്നു. ഈ രാജ്യത്തെ എല്ലാവര്‍ക്കും സേവനം ചെയ്യാന്‍ എനിക്ക് അവസരം ലഭിച്ചിരിക്കുന്നു'അല്‍ മസ്‌റൂഇ പറഞ്ഞു. എന്നാല്‍ റേഡിയോയിലേക്കു വിളിച്ച വയോധികനെ പരിഹസിച്ചതിന് അവതാരകനെ റേഡിയോ സ്‌റ്റേഷനില്‍ നിന്നു പുറത്താക്കാന്‍ അജ്മാന്‍ കിരീടാവകാശി ഷെയ്ഖ് അമ്മാര്‍ ബിന്‍ ഹുമൈദ് അല്‍ നുഐമി ഉത്തരവിട്ടിരുന്നു.
അവശ്യ സാധനങ്ങളുടെ വില വര്‍ധനവിനെ കുറിച്ചാണ് അലി റഷീദ് അല്‍ മസ്‌റൂഈ എന്ന വയോധികന് പരാതിപ്പെട്ടത്. തനിക്ക് താമസിക്കാന്‍ നല്ലൊരു വീടും ജീവിക്കാന്‍ വരുമാനവുമില്ലാത്തതും അദ്ദേഹം തുറന്നു പറഞ്ഞു. ഇതേക്കുറിച്ച് അറിഞ്ഞ ഷെയ്ഖ് മുഹമ്മദ് അദ്ദേഹത്തിന് ആവശ്യമായ എല്ലാ സഹായവും ചെയ്തു കൊടുക്കാന്‍ ഉത്തരവിട്ടതിനു പിന്നാലെ മന്ത്രിസഭാ യോഗത്തില്‍ പങ്കെടുക്കാന്‍ ക്ഷണിക്കുകയയും ചെയ്തു. ഇന്നലെ രാവിലെ ചേര്‍ന്ന മന്ത്രിസഭാ യോഗത്തില്‍ മസ്‌റൂഇ പങ്കെടുത്തു. കുറഞ്ഞ വരുമാനക്കാര്‍ക്ക് അടുത്ത മൂന്ന് വര്‍ഷത്തേയ്ക്ക് 11 ബില്യന്‍ ദിര്‍ഹം(1100 കോടി രൂപ) വകയിരുത്താനും ഇന്നലെ രാവിലെ ചേര്‍ന്ന മന്ത്രിസഭാ യോഗത്തില്‍ തീരുമാനമായി. യുഎഇയിലെ എല്ലാവര്‍ക്കും സുസ്ഥിരതയുള്ളതും അഭിമാനകരവുമായ ജീവിതം ഉറപ്പുവരുത്തുന്നതിന് ദേശീയ മാധ്യമങ്ങളെ ഉപയോഗപ്പെടുത്തണമെന്നും ഷെയ്ഖ് മുഹമ്മദ് പറഞ്ഞു.
https://www.facebook.com/Malayalivartha
