സിനിമയില്‍ അഭിനയിക്കണമെന്ന് ആഗ്രഹമില്ലാത്തവരായി ആരുമില്ല.കുട്ടിക്കാലം മുതലെ ചിലര്‍ അത് ആഗ്രഹിക്കുന്നു. എന്നാന്‍ തന്റെ ആഗ്രഹം പൂവണിഞ്ഞതിന്റെ സന്തോഷത്തിലാണ് ഒരു മലയാളി പ്രവാസി. അബുദാബിയില്‍ സിവില്‍ എഞ്ചിനിയറായി ജോലി ചെയ്യുന്ന കൊല്ലം സ്വദേശിയായ പ്രവാസി പിങ്കു പിള്ളയ്ക്കാണ് ഈ ഭാഗ്യം ലഭിച്ചത്.

തന്റെ 13 ാം വയസ്സില്‍ ഒരു സീരിയലില്‍ അഭിനയിക്കാന്‍ അവസരവും ലഭിച്ചു. എന്നാല്‍ പഠിത്തം ആദ്യമെന്ന് വീട്ടുകാരുടെ വിലക്കിന് മേല്‍ ആ സീരിയല്‍ മോഹം അടഞ്ഞു. എങ്കിലും സ്‌കൂളിലേയും കോളജിലേയും നാടകങ്ങളിലും സ്‌കിറ്റുകളിലും പിങ്കു തന്റെ അഭിനയം തുടര്‍ന്നു. ആല്‍ബങ്ങളും ഡോക്യുമെന്ററികളും ചെയ്തു. ഇതിനിടയിലും വിവിധ സിനിമാ പ്രവര്‍ത്തകരെ കണ്ട് ചാന്‍സ് അന്വേഷിച്ച് നടക്കാന്‍ തുടങ്ങി.

അവസാനം ജീവിതം ഒരു വലിയ ചോദ്യ ചിഹ്നമായി മുന്നിലെത്തിയപ്പോള്‍ 2003 ല്‍ പിങ്കു പ്രവാസ ലോകത്തേക്ക് പറന്നു. എന്നാലും തന്റെ സ്വപ്‌നങ്ങളെയും പിങ്കു കൂടെ കൂട്ടിയിരുന്നു. ചെറിയ ചില വേദികളില്‍ നാടകവും സ്‌കിറ്റുമൊക്കെയായി അരങ്ങു തകര്‍ത്തു ജീവിതം മുന്നോട്ട് കൊണ്ടു പോയി. ഇതിനിടയില്‍ കല്ല്യാണവും കഴിച്ചു.

രണ്ട് കുട്ടികളുടെ അച്ഛനുമായി. കഴിഞ്ഞ വര്‍ഷമാണ് ദുബായില്‍, സുരാജ് വെഞ്ഞാറമ്മൂട് നായകനാകുന്ന 'കുട്ടന്‍ പിള്ളയുടെ ശിവരാത്രി' എന്ന മലയാള സിനിമയുടെ ഓഡീഷന്‍ നടക്കുന്നുണ്ടെന്ന കാര്യം സുഹൃത്തുക്കളില്‍ നിന്നും അറിഞ്ഞത്. സുഹൃത്തുക്കളുടെ പ്രോത്സാഹനത്തില്‍ ഒഡീഷനില്‍ പങ്കെടുത്തു.

2000 ത്തിലധികം മലയാളി പ്രവാസികള്‍ ഓഡീഷനായി എത്തിച്ചേര്‍ന്നിരുന്നു. ഒടുവില്‍ ഈ രണ്ടായിരം പേരില്‍ നിന്നും അണിയറ പ്രവര്‍ത്തകര്‍ തിരഞ്ഞെടുത്തവരില്‍ പിങ്കുവിന്റെ പേരും ഉള്‍പ്പെട്ടു. മാത്രമല്ല മറ്റൊരു സര്‍െ്രെപസ് കൂടിയുണ്ടായി. ഇദ്ദേഹത്തിന്റെ മകന്‍ അര്‍ജ്ജുനും ചിത്രത്തില്‍ വേഷം ലഭിച്ചു.

ഇത് ഈ കുടുംബത്തിന് ഇരട്ടി സന്തോഷം നല്‍കുന്നു. മെയ് 11 നാണ് കുട്ടന്‍പിള്ളയുടെ ശിവരാത്രി റിലീസാവുന്നത്. ചിത്രത്തില്‍ സുരാജിന്റെ അടുത്ത ബന്ധുവിന്റെ വേഷമാണ് പിങ്കു കൈകാര്യം ചെയ്തിരിക്കുന്നത്.