തുടർച്ചയായ രണ്ടു വർഷത്തിൽ പ്രളയത്തിനൊപ്പം ഒഴുകി പോയ ഒരു ആഘോഷമായിരുന്നു ഓണം. കഴിഞ്ഞ വർഷം ഓണത്തെ വരവേൽക്കാൻ തയ്യാറായിരുന്ന മലയാളികൾ വരവേറ്റത് കുത്തി ഒഴുകി എത്തിയ പ്രളയത്തെയായിരുന്നു. എന്നാലും അതിനെ അതി ജീവിക്കാൻ ശ്രമിക്കുന്നതിനോടൊപ്പം പലരും ഓണം ആഘോഷിക്കുകയും ചെയ്തു. മലയാളികൾക്ക് സമൃദ്ധിയുടെയും സന്തോഷത്തിന്റെയും വേളകളായിരുന്നു ഓണം. വീണ്ടും മാവേലിയെ കാത്തിരുന്ന മലയാളികൾ മറ്റൊരു പ്രകൃതി ദുരന്തത്തെ ആയിരുന്നു വരവേറ്റിരുന്നത്. ഓണം എന്നോർക്കുമ്പോൾ വരും തല മുറ പ്രളയത്തെ ഓർക്കേണ്ടുന്ന അവസ്ഥയാണ് ഇപ്പോൾ ഉള്ളത്. എങ്കിലും ഒരു കാലത്തെ കേരളീയർ ജാതി മത ഭേദമെന്യേ ആഘോഷിച്ചിരുന്ന ഓണം എല്ലാവർക്കും ഗൃഹാതുരത്വം ഉണർത്തുന്ന ഒന്ന് തന്നെയാണ്. മലയാളികൾ ഓണം ആഘോഷിക്കുമ്പോൾ അന്യ നാട്ടിലിരുന്നും ഓണം ആഘോഷമാക്കിയിരുന്ന പ്രവാസികൾ. പ്രവാസികളെ സംബന്ധിച്ച്‌ ഓണം അവർക്ക് സന്തോഷവും ഒപ്പം ദുഃഖവും നൽകുന്നു. ഓണം ആഘോഷിക്കുന്നതിന്റെ സന്തോഷമാണെങ്കിലും വേണ്ടപ്പെട്ടവരും ഉറ്റവരും അടുത്തില്ലല്ലോ എന്ന വിഷമം അവർ നേരിടും.

നമ്മളെല്ലാവരും നാട്ടില്‍ ഓണക്കോടിയും ഓണസദ്യയുമായി ആഘോഷിച്ചിരുന്നപ്പോൾ ഓണത്തെ ഓർമ്മകളില്‍ മാത്രം ആഘോഷിക്കുന്ന ഒരു കൂട്ടം പ്രവാസികൾ ഉണ്ട്. ഓണമായാലും വിഷുവായാലും എന്ത് ആഘോഷമാണെങ്കിലും പ്രിയപ്പെട്ടവർ അടുത്തില്ലാതെ ടെലിവിഷൻ ചാനലുകളിലും മറ്റും മാത്രം ഓണം ചുരുങ്ങി പോയ വ്യക്തികൾ. ഉണ്ടും ഉറങ്ങാതെയും അദ്ധ്വാനിച്ചും ഓണമെന്നല്ല മറ്റൊരു ആഘോഷത്തിലും ജനിച്ച നാട്ടിൽ വരാനാകാതെ ജീവിക്കുന്നവർ. ആ വിഷമം ഉണ്ടെങ്കിലും അത് മറന്ന് തങ്ങൾ ആയിരിക്കുന്ന നാട്ടിൽ അവർ ഓണത്തെ വരവേൽക്കും. ഫ്ളാറ്റുകളിലും ഓഫീസുകളിലും മറ്റും വളരെ ചെറിയ തോതിൽ ഓണം ആഘോഷിക്കും. എന്നാൽ പ്രവാസി മലയാളികൾക്ക് പലപ്പോഴും ഓണം എന്ന് പറയുന്നത് ഓർമ്മകളിൽ ഗൃഹാതുരത നിറക്കുന്ന ഒന്നായി മാറുന്നുണ്ട് . എങ്കിലും ചിലരെങ്കിലും നാട്ടിലുള്ളതിനേക്കാൾ നന്നായി ഓണം ആഘോഷിക്കുന്നവരായിരിക്കും. അത്തം മുതൽ തിരുവോണം വരെ പൂവിടാൻ ആവില്ലെങ്കിലും തിരുവോണ ദിവസമെങ്കിലും വലിയ പൂക്കളം കൂട്ടുകാരേയും അടുത്ത ഫ്ളാറ്റുകളില്‍ താമസിക്കുന്നവരേയും എല്ലാം ചേർത്ത് തയ്യാറാക്കാൻ ശ്രമിക്കുന്നവരും ഉണ്ട്.

കുടുംബമായും അല്ലാതെയും താമസിക്കുന്ന പ്രവാസി മലയാളികൾ എല്ലാവരും ഒത്തു ചേരുന്ന ഒരു ദിവസമാണ് തിരുവോണ ദിവസം. തിരുവോണ നാളിൽ കുടുംബമായി താമസിക്കുന്നവർ ഓണസദ്യ തയ്യാറാക്കി കൂട്ടുകാർക്കും പ്രിയപ്പെട്ടവർക്കും ഒപ്പം കഴിക്കുന്നു. നമ്മൾ നാട്ടില്‍ നമുക്ക് പ്രിയപ്പെട്ടവരെല്ലാം ചേരുമ്പോൾ അവിടെ പ്രവാസികൾക്കിടയിലും അത്തരമൊരു കൂട്ടായ്മക്ക് ഓണം വഴിയൊരുക്കുന്നു. നാട്ടില്‍ നിന്ന് മാറി താ മസിക്കുന്നവർക്ക് ഈ ഓണക്കാലത്ത് അതൊരുവലിയ ആശ്വാസമാണ്. പ്രവാസികൾക്കിടയിൽ വീടുകളിൽ മാത്രമല്ല ഓഫീസുകളിലും ഓണം ആഘോഷിക്കാറുണ്ട്. കേരളത്തിന്റെ സംസ്കാരം ലോകമെമ്പാടുമുള്ള മറ്റ് സംസ്കാരത്തില്‍പ്പെട്ടവർക്കും നമ്മുടെ നാടിന്റെ നന്മയും സ്നേഹവും എല്ലാം അന്യദേശക്കാർക്ക് കൂടി പകർന്ന് കൊടുക്കുകയാണ്. പ്രവാസികളുടെ ഓഫീസുകളിലും ഓണപ്പാട്ടും ഓണക്കളികളുമായി കുറച്ച് സമയമെങ്കിലും ഓണാഘോഷം നടക്കാറുണ്ട്.എന്നാൽ ഓണം ആഘോഷിക്കുന്നതിനോ ഓണത്തിന്‍റെ തിരക്കുകൾക്കിടയിൽ നിൽക്കുന്നതിനോ സമയമില്ലാത്ത ചിലരുമുണ്ട്. ഒരിക്കലും ആഘോഷങ്ങൾക്ക് സ്ഥാനമില്ലാത്തവർ . എവിടെയായിരുന്നാലും ഓണം നമ്മൾ ആഘോഷിക്കുക തന്നെ ചെയ്യും എന്ന ഒരു വാശിയാണ് ഓരോ പ്രവാസിക്കും. എങ്കിലും വേണ്ടപ്പെട്ടവരെ പിരിഞ്ഞിരിക്കുന്ന വേദനയും അവർക്കുണ്ട്.