പ്രവാസികൾക്ക് ആശ്വാസകരമായ നടപടിക്ക് എല്ലാം അനുകൂലമായി എത്തിയിരിക്കുകയാണ്. വിസ വിസ വിതരണം ഓണ്‍ലൈന്‍ വഴി ആക്കുന്ന കാര്യം കുവൈത്തിന്റെ പരിഗണയിലുണ്ടെന്ന റിപ്പോർട്ടുകളാണ് പുറത്തുവരുന്നത്. കുടുംബ, വിനോദ സഞ്ചാര സന്ദര്‍ശക വിസ വിതരണം ഓണ്‍ലൈന്‍ വഴി ആക്കുന്ന കാര്യം താമസകാര്യ വിഭാഗത്തിന്റെ സജീവ പരിഗണയിലാണ്.

ഇത് സംബന്ധിച്ച് പ്രവാസികൾക്ക് അനുകൂലമായ തീരുമാനം ഉടൻ തന്നെ പ്രതീക്ഷിക്കാവുന്നതാണ്. കാരണം വിസ വിതരണവുമായി ബന്ധപ്പെട്ട താമസകാര്യ വകുപ്പ് ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് അഹമ്മദ് അല്‍-നവാഫിന് സമര്‍പ്പിച്ച നിര്‍ദ്ദേശങ്ങളില്‍ ഓണ്‍ലൈന്‍ സംവിധാനം നടപ്പാക്കണമെന്ന നിര്‍ദ്ദേശവും ഉണ്ടെന്നാണ് ലഭിക്കുന്ന സൂചനകൾ.

യോഗ്യതയുള്ള പ്രവാസികള്‍ക്ക് ജവാസാത്തുകളില്‍ പോകാതെ ഓണ്‍ലൈന്‍ വഴി കുടുംബ, വിനോദ സഞ്ചാര വിസക്ക് അപേക്ഷിക്കാവുന്ന സംവിധാനമാണ് പരിഗണനയിലുള്ളത്. മാത്രമല്ല, കുടുംബ സന്ദര്‍ശന വിസയും വിനോദ സഞ്ചാര വിസയും അനുവദിക്കുന്നതിന് പുതിയ മെക്കാനിസം നടപ്പാക്കുമെന്ന് ആഭ്യന്തര മന്ത്രാലയത്തിലെ താമസകാര്യ വിഭാഗം അറിയിച്ചിരുന്നു.

ഇതിന്റെ ഭാഗമായി കഴിഞ്ഞ തിങ്കളാഴ്ച മുതല്‍ വിസ വിതരണം താല്‍ക്കാലികമായി നിര്‍ത്തിയിട്ടുമുണ്ട്.എന്നാൽ എന്ത് പുതിയ മെക്കാനിസമാണ് നടപ്പാക്കുന്നതെന്ന വ്യക്തതയൊന്നും ഇക്കാര്യത്തിൽ വന്നിട്ടില്ല. എന്നാൽ കുവൈത്തില്‍ സ്ഥിരതാമസക്കാരായ വിദേശികള്‍ക്ക് മൂന്നുമാസ കാലാവധിയുള്ള ഫാമിലി, ടൂറിസ്റ്റ് വിസിറ്റ് വിസ ലഭിക്കാന്‍ നിലവിലെ നിയമപ്രകാരം 250 ദീനാര്‍ ആണ് കുറഞ്ഞ ശമ്പളം. ഇതു വര്‍ധിപ്പിക്കണമെന്ന നിര്‍ദേശവും താമസകാര്യ വകുപ്പ് മുന്നോട്ടു വെച്ചിട്ടുണ്ട്.

ജീവിത പങ്കാളി, മക്കള്‍ എന്നിവരെ സന്ദര്‍ശന വിസയില്‍കൊണ്ട് വരാന്‍ കുറഞ്ഞത് 300 ദീനാറും മാതാപിതാക്കളെ കൊണ്ടുവരാന്‍ കുറഞ്ഞത് 600 ദീനാറും ആക്കി വര്‍ധിപ്പിക്കാനാണു ശിപാര്‍ശ.ഈ നിർദ്ദേശം പ്രവാസികൾക്ക് കനത്ത തിരിച്ചടിയാകും എന്ന കാര്യത്തതിൽ ഒരു സംശയവും വേണ്ട. കോവിഡിനുശേഷം വളരെ പരിമിതമായ തോതിലാണ് കുടുംബസന്ദര്‍ശന വിസ അനുവദിച്ചിരുന്നത്. ഇതും പുതിയ നീക്കത്തിന്റെ സൂചനകളായി കണക്കുകൂട്ടാവുന്നതാണ്.