യുഎഇ സ്ഥാപിച്ച കാലം മുതൽ അതിന്റെ വികസനത്തിനും നിർമ്മാണത്തിനും പുരോഗതിക്കും ഇന്ത്യൻ സമൂഹം നൽകുന്ന സംഭാവന വളരെ വലുതാണെനന്ന് പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ. എല്ലാ മേഖലകളിലും ഇന്ത്യയിമായുള്ള ബന്ധം ദൃഢപ്പെടുത്തും.

അതിനായുള്ള പ്രവർത്തനങ്ങൾ കൂടുതൽ ശക്തപ്പെടുത്താൻ ആഗ്രഹിക്കുന്നുവെന്നും യുഎഇ പ്രസിഡന്റ് പറഞ്ഞു.ഇന്ത്യൻ പ്രധാനമന്ത്രി നരേന്ദ്ര മോദിയുടെ യുഎഇ ഹ്രസ്വസന്ദർശനത്തിനിടെ ആണ് അദ്ദേഹം ഇക്കാര്യം പറഞ്ഞത്. ഒപ്പം തന്നെ ഇന്ത്യക്കാരോടുള്ള പ്രധാനമന്ത്രിയുടെ സ്നേഹവും അദ്ദേഹം വ്യക്തമാക്കി.

രണ്ടു രാജ്യങ്ങൾ തമ്മിലുള്ള സൗഹൃദവും അവിടുത്തെ ജനങ്ങൾ തമ്മിലുള്ള സാംസ്‌കാരികവും സാമ്പത്തികവുമായ ബന്ധം ദൃഢപ്പെടുത്തുന്നതിനും യുഎഇയിൽ താമസിക്കുന്ന എല്ലാ കമ്മ്യൂണിറ്റികളുടെ ഗണ്യമായ സംഭാവനയെയും അദ്ദേഹം പ്രശംസിച്ചു.

ഷെയ്ഖ് മുഹമ്മദ് ബിൻ സായിദ് അൽ നഹ്യാൻ അബുദാബി വിമാനത്താവളത്തിൽ നേരിട്ടെത്തിയാണ് മോദിയെ സ്വീകരിച്ചത്. അദ്ദേഹത്തിന്റെ ഈ പ്രവൃത്തിയ്ക്ക് നന്ദി പറഞ്ഞ് മോദിയും ട്വീറ്റ് ചെയ്തു. ‘പ്രിയ സഹോദരൻ’ എന്നാണ് മോദി പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനെ വിശേഷിപ്പിച്ചത്.

‘അബുദാബി വിമാനത്താവളത്തിലെത്തി എന്നെ സ്വീകരിച്ച പ്രിയ സഹോദരൻ ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ പ്രവൃത്തി ഏറ്റവും ഹൃദ്യമായിരുന്നു. അദ്ദേഹത്തിന് എന്റെ ഹൃദയം നിറഞ്ഞ നന്ദി എന്നാണ് മോദി ട്വിറ്ററിൽ കുറിച്ചത്.