വിമാനത്താവളത്തിന്‍റെ തത്സമയ ദൃശ്യംവരെ കിട്ടും, പ്രവാസികൾ അറിഞ്ഞോ?...ഇനി ഇത് സ്മാര്‍ട്ട് എയര്‍പോര്‍ട്ട്, ഹമദ് എയര്‍പോര്‍ട്ടില്‍ അതിനൂതന ഡിജിറ്റല്‍ ട്വിന്‍ സംവിധാനം ആരംഭിച്ചു
നേട്ടത്തിന്റെ തിളക്കത്തില്‍ നിൽക്കുന്ന ഖത്തറിലെ ഹമദ് വിമാനത്താവളത്തിന് മറ്റൊരു നേട്ടം കൂടി. 2022ലെ ലോകത്തിലെ ഏറ്റവും മികച്ച എയര്‍പോര്‍ട്ടായി ഹമദ് തെരഞ്ഞെടുക്കപ്പെട്ടിരുന്നു. ഇതിന് പിന്നാലെയിതാ സ്മാര്‍ട്ട് എയര്‍പോര്‍ട്ട് പ്രോഗ്രാമിന്‍റെ ഭാഗമായി ഹമദ് രാജ്യാന്തര വിമാനത്താവളത്തില്‍ അതിനൂതന ഡിജിറ്റല്‍ ട്വിന്‍ സംവിധാനം ആരംഭിച്ചിരിക്കുകയാണ്.
ഇതോടെ ഡിജിറ്റല്‍ ട്വിന്‍ പ്രവര്‍ത്തനക്ഷമമാക്കുന്ന ചുരുക്കം ചില വിമാനത്താവളങ്ങളിലൊന്നായി ഹമദ്. ഇന്‍റുറ്റീവ് ത്രീഡി ഇന്‍റര്‍ഫേസ് ഉപയോഗിച്ച്‌ വിമാനത്താവളത്തിന്‍റെ തത്സമയദൃശ്യം ഡിജിറ്റല്‍ ട്വിന്‍ വഴി ലഭ്യമാകും.വിമാനത്താവളത്തിലെ വ്യത്യസ്ത സംവിധാനങ്ങളില്‍നിന്നുള്ള വിവരങ്ങള്‍ സമഗ്രമാക്കുന്ന ശക്തമായ അനലിറ്റിക്കല്‍ എന്‍ജിനാണ് ഡിജിറ്റല്‍ ട്വിന്‍.
വിമാനത്താവളത്തിന്‍റെ പ്രവര്‍ത്തനം ഏറ്റവും മികവുറ്റതാക്കുന്നതിനുള്ള ബൗദ്ധിക നിര്‍ദേശങ്ങള്‍ നല്‍കാനും ഡിജിറ്റല്‍ ട്വിന്‍ സംവിധാനത്തിന് സാധിക്കും. ത്രീഡി മോഡലിങ് സാങ്കേതികവിദ്യ, ഡേറ്റ അനലിറ്റിക്സ്, ആര്‍ട്ടിഫിഷ്യല്‍ ഇന്‍റലിജന്‍സ് എന്നിവ സമന്വയിപ്പിച്ചാണ് അതിനൂതന ഡിജിറ്റല്‍ ട്വിന്‍ വികസിപ്പിച്ചിരിക്കുന്നത്.
എയര്‍ക്രാഫ്റ്റ് സ്റ്റാന്‍ഡ് പ്രശ്നങ്ങള്‍ കൈകാര്യം ചെയ്യാനും വിമാനത്താവളത്തിലെ നിര്‍ണായക സംവിധാനങ്ങളുടെ സുരക്ഷിതത്വം പരിശോധിക്കാനും മുന്നറിയിപ്പുകളില്‍ കാര്യക്ഷമമായ പ്രതികരണം ഉറപ്പുവരുത്താനും ഡിജിറ്റല്‍ ട്വിന്നിന് സാധിക്കും.കൃത്യസമയത്ത് കൃത്യമായ വിവരം ഉപയോഗപ്പെടുത്താനും ഇതിന് കഴിയും.
ഹമദ് രാജ്യാന്തര വിമാനത്താവളത്തിന്‍റെ ഡിജിറ്റല്‍ ട്വിന്‍ സംവിധാനം ഖത്തര്‍ ഐ.ടി ബിസിനസ് അവാര്‍ഡ്സില്‍ സ്മാര്‍ട്ട് സൊലൂഷ്യന്‍ ഓഫ് ദ ഇയര്‍ അംഗീകാരവും കരസ്ഥമാക്കിയിരുന്നു.ആഗോള തലത്തില്‍ നേട്ടത്തിന്റെ തിളക്കത്തില്‍ നിൽക്കുന്ന ഖത്തറിലെ ഹമദ് അന്താരാഷ്ട്ര വിമാനത്താവളം ഇതോടെ വീണ്ടും ശ്രദ്ധ നേടുകയാണ്.
ലോകത്തിലെ ഏറ്റവും മികച്ച വിമാനത്താവളം എന്ന നേട്ടം തുടര്‍ച്ചയായ രണ്ടാം തവണയാണ് ഹമദ് സ്വന്തമാക്കിയത്. പാരിസില്‍ നടന്ന പാസഞ്ചര്‍ ടെര്‍മിനല്‍ എക്‌സ്‌പോയില്‍ വിതരണം ചെയ്ത വേള്‍ഡ് എയര്‍പോര്‍ട്ട്‌സ് അവാര്‍ഡിലാണ് ഖത്തര്‍ ലോകത്തിലെ ഏറ്റവും മികച്ച എയര്‍പോര്‍ട്ടിനുള്ള അവാര്‍ഡ് കരസ്ഥമാക്കിയത്.
ലോകത്തെ മറ്റ് വിമാനത്താവളങ്ങള്‍ കൊവിഡ് പ്രതിസന്ധിയെ തുടര്‍ന്ന് വലിയ പ്രായസങ്ങള്‍ അനുഭവിച്ചപ്പോള്‍ പ്രതിസന്ധി മുതലെടുത്ത് മുന്നേറിയാണ് ഹമദ് എയര്‍പോര്‍ട്ട് നേട്ടം സ്വന്തമാക്കിയതെന്ന് സ്‌കൈട്രാക്‌സ് പ്രതിനിധി എഡ്വാര്‍ഡ് പ്ലെയിസ്റ്റെഡ് പറയുകയുണ്ടായി. പ്രതിസന്ധി ഏറ്റവും രൂക്ഷമായ 2021ല്‍ 17.1 ദശലക്ഷം യാത്രക്കാര്‍ക്കാണ് എയര്‍പോര്‍ട്ട് സേവനം നല്‍കിയത്. അതോടൊപ്പം പുതിയ ഇടങ്ങളിലേക്ക് സര്‍വീസുകള്‍ തുടങ്ങാന്‍ എയര്‍പോര്‍ട്ടിന് സാധിച്ചത് വലിയത് നേട്ടമാണെന്നും അദ്ദേഹം ചൂണ്ടിക്കാട്ടുകയുണ്ടായി.
https://www.facebook.com/Malayalivartha
