ദുബായിലേക്ക് പുറപ്പെട്ട സ്‌പൈസ് ജെറ്റ് വിമാനം തകരാറിനെ തുടര്‍ന്ന് പാ​കി​സ്ഥാനിൽ  ഇറക്കി. തകരാറിനെ തുടര്‍ന്ന് ഡല്‍ഹിയില്‍ നിന്ന് ഇന്ന് രാവിലെ  ദുബായിലേക്ക് പോയ സ്‌പൈസ് ജെറ്റ് വിമാനം യാത്രക്കിടെ കറാച്ചി വിമാനത്താവളത്തിൽ ഇറക്കുകയായിരുന്നു.ഇന്‍ഡിക്കേറ്റര്‍ ലൈറ്റിന്‍റെ തകരാറിനെ തുടര്‍ന്ന് കറാച്ചിയിലേക്ക് തിരിച്ചുവിടുകയായിരുന്നു എന്നാണ് വിമാന കമ്പനി നൽകിയ വിശദീകരണം.

സംഭവത്തിൽ സിവിൽ ഏവിയേഷൻ ഡയറക്ടർ ജനറൽ അന്വേഷണത്തിന് ഉത്തരവിട്ടു. എമർജൻസി ലാന്റിങായിരുന്നില്ലെന്നും സാധാരണ നിലയിലുള്ള ലാന്റിങായിരുന്നുവെന്നും വിമാനക്കമ്പനി വക്താവ് വിശദീകരിച്ചു. തകരാർ കണ്ടെത്തിയ സാഹചര്യത്തിലായിരുന്നു വിമാനം കറാച്ചിയിലേക്ക് അയച്ചത്. കമ്പനിയുടെ ഭാഗത്ത് നിന്ന് ഔദ്യോഗിക അറിയിപ്പ് വന്നതിന് പിന്നാലെയാണ് ഡിജിസിഎ അന്വേഷണത്തിന് ഉത്തരവിട്ടിരിക്കുന്നത്.

കറാച്ചി വിമാനത്താവളത്തില്‍ ഇറക്കിയ വിമാനത്തില്‍നിന്ന് യാത്രക്കാരെ സുരക്ഷിതരായി പുറത്തെത്തിച്ചു. വിമാനം ലാന്റ് ചെയ്തതിന് പിന്നാലെ യാത്രക്കാരെ കറാച്ചി വിമാനത്താവളത്തിലെ ട്രാൻസിറ്റ് ലോഞ്ചിലേക്ക് മാറ്റിയിരുന്നു. എഞ്ചിനീയർമാർ പരിശോധിച്ച് ക്ലിയറൻസ് നൽകിയ ശേഷം മാത്രമേ ഈ വിമാനം ഇനി കറാച്ചിയിൽ നിന്ന് ദുബൈക്ക് പറക്കുകയുള്ളൂ.

അല്ലെങ്കിൽ യാത്രക്കാരെ മറ്റൊരു വിമാനത്തില്‍ ദുബായിലേക്ക് കൊണ്ടുപോകും.തകരാറിലായ വിമാനത്തിന് പകരം വിമാനം കറാച്ചിയിലേക്ക് അയച്ചിട്ടുണ്ടെന്ന് സ്പൈസ് ജെറ്റ് അധികൃതര്‍ അറിയിച്ചു.വിമാനത്തിന്റെ തകരാറ് എഞ്ചിനീയർമാർ പരിശോധിക്കുകയാണെന്നാണ് വിവരം.

അതേസമയം കഴിഞ്ഞ ദിവസം പറക്കുന്നതിനിടെ സ്‌പൈസ് ജെറ്റ് വിമാനത്തിന്‍റെ ക്യാബിനിൽ പുക കണ്ടെത്തിയതിനെ തുടർന്ന് അടിയന്തരമായി ഡൽഹി വിമാനത്താവളത്തിൽ തിരിച്ചിറക്കിയ സംഭവം ഉണ്ടായി. ഡൽഹിയിൽനിന്ന് ജബൽപൂരിലേക്ക് പോകുകയായിരുന്ന വിമാനത്തിലാണ് പുക കണ്ടത്. 5,000 അടി ഉയരത്തിൽ പറക്കുമ്പോഴായിരുന്നു സംഭവം.

ക്യാബിനിൽ പുക കണ്ടെത്തിയതിനെ തുടർന്ന് വിമാനം ഡൽഹിയിൽ തിരിച്ചിറക്കുകയായിരുന്നു. യാത്രക്കാരെ സുരക്ഷിതമായി പുറത്തിറക്കി. ജൂൺ 19 ന്, പക്ഷി ഇടിച്ചതിനെ തുടർന്ന് ഇടത് എഞ്ചിന് തീപിടിച്ചതിനാൽ സ്പൈസ് ജെറ്റ് വിമാനം പാറ്റ്നയിൽ അടിയന്തരമായി നിലത്തിറക്കിയിരുന്നു. വിമാനത്തിൽ 185 യാത്രക്കാരാണ് ഉണ്ടായിരുന്നത്. പറന്ന് ഉയർന്ന് ഉടനെയായിരുന്നു സംഭവം.