വിശുദ്ധ ബൈബിളിന്റെ ലോകത്തിലെ ഏറ്റവും വലിയ കൈയെഴുത്തു പ്രതി തയാറാക്കിക്കൊണ്ട് ഒരു പ്രവാസി മലയാളികുടുംബം ഗിന്നസ് ബുക്കില്‍ കയറിയിരിക്കുകയാണ്.

ഇന്റീരിയര്‍ ഡിസൈനിംഗ് സ്ഥാപന ഉടമയായ മനോജ് വര്‍ഗീസ്, ഭാര്യ സൂസന്‍, മക്കളായ കരുണ്‍, കൃപ എന്നിവര്‍ ചേര്‍ന്നാണ് ബൈബിള്‍ അഞ്ചു മാസംകൊണ്ടു പകര്‍ത്തിയെഴുതിയത്. എഴുതിത്തീര്‍ന്നപ്പോള്‍ അതു ലോകത്തിലെ ഏറ്റവും വലിയ കൈയെഴുത്തു പ്രതിയായി. മാത്രമല്ല, 151 കിലോഗ്രാം ഭാരവും. എ വണ്‍ സൈസ് പേപ്പറില്‍ എഴുതിയുണ്ടാക്കിയ ബൈബിളില്‍ 1,500 പേജുകളുണ്ട്. 85.5 സെന്റിമീറ്റര്‍ നീളവും, 60.7 സെന്റിമീറ്റര്‍ വീതിയുമുണ്ട്.

ഇപ്പോള്‍ ജെബല്‍ അലിയിലെ മാര്‍ത്തോമ പള്ളിയില്‍ സൂക്ഷിച്ചിരിക്കുകയാണ് ഈ ബൈബിള്‍. ഇത് കാണാന്‍ നിരവധി പേര്‍് എത്തുന്നുണ്ട്്. മനോഹരമായ പുറംചട്ടയും ഹോളി ബൈബിള്‍ എന്ന സുവര്‍ണ ലിപിയും ആരുടെയും മനംകവരും. ഗിന്നസ് ബുക്ക് അധികൃതര്‍ എത്തി ബൈബിള്‍ പരിശോധിച്ചു. വലിപ്പവും എഴുത്തും വിദഗ്ധര്‍ പരിശോധിച്ചു. ബൈബിള്‍ എഴുതുന്ന വീഡിയോ ഉള്‍പ്പെടെ അവര്‍ ശേഖരിച്ചിട്ടുണ്ട്. മക്കള്‍ക്ക് സമ്മാനം നല്‍കാന്‍ ഒരു ബൈബിള്‍ പ്രതി എഴുതിയുണ്ടാക്കുകയായിരുന്നു ലക്ഷ്യമെന്നു സൂസന്‍ പറയുന്നു. ഗിന്നസ് ബുക്കും റിക്കാര്‍ഡുമൊന്നും മനസില്‍ ഇല്ലായിരുന്നുവത്രേ.

മനോജ് ആണ് വലിയ പേപ്പറില്‍ തയാറാക്കുക എന്ന ആശയംകൊണ്ടുവന്നത്. കുടുംബം ഒരേ മനസോടെ അത് ഏറ്റെടുത്തപ്പോള്‍ പുതിയ ചരിത്രം പിറന്നു. കഴിഞ്ഞ മേയ് 11-നാണ് എഴുതിത്തുടങ്ങിയത്. ഒക്ടോബര്‍ 10-ന് പൂര്‍ത്തിയാക്കി. ഇക്കഴിഞ്ഞ വെള്ളിയാഴ്ച നടന്ന ചടങ്ങില്‍ മനോജും കുടുംബവും തങ്ങളുടെ ഇടവക കൂടിയായ ജെബല്‍ അലിയിലെ ദേവാലയത്തിനു ബൈബിള്‍ കൈമാറി. അവിടെ പ്രത്യേക പെട്ടകത്തില്‍ ബൈബിള്‍ പ്രദര്‍ശിപ്പിക്കാനാണ് പദ്ധതി.