കള്ളനോട് പറയാനുള്ളത് പരസ്യമായി പറഞ്ഞൊരു കത്ത്, കുറിപ്പിന്റെ പ്രസക്ത ഭാഗങ്ങള്‍ ഇങ്ങനെ..
നാലുകോടി ആലഞ്ചേരി ജോസഫ് മാത്യു സമൂഹമാധ്യമങ്ങളില്‍ ഒരു കുറിപ്പ് എഴുതി. അത് എഴുതാനുണ്ടായ കാരണവും ആ കുറിപ്പിന്റെ ഉള്ളടക്കവും അതിനെ ശ്രദ്ധേയമാക്കുകയാണ്. തുടര്‍ച്ചയായി 2 ദിവസം രാത്രിയില്‍ വീട്ടില്‍ മോഷണശ്രമം നടത്തിയ കള്ളന്റെ പേര്‍ക്കാണ് കത്ത്.
ലോക്ഡൗണ്‍ സമയത്ത് വീട്ടിലിരിക്കാതെ മോഷണത്തിനിറങ്ങിയയാള്‍ക്ക് കൊറോണയെ സംബന്ധിച്ച കണക്കുകളും ആശങ്കയും സുരക്ഷാ മുന്‍കരുതല്‍ സ്വീകരിക്കേണ്ട ആവശ്യകതയും ഒക്കെ വ്യക്തമാക്കുന്നതാണ് കുറിപ്പ്.
നിര്‍മാണ കരാറുകാരനായ ജോസഫ് എഴുതിയ കുറിപ്പിന്റെ പ്രസക്ത ഭാഗങ്ങള്‍ ഇങ്ങനെ : 'പ്രിയപ്പെട്ട കള്ളാ, ഈ കൊറോണക്കാലത്ത് ലോകം മുഴുവന്‍ പട്ടിണിയും പരിവട്ടവുമായി കഴിയുന്ന ഘട്ടത്തില്‍ , നീ ജീന്‍ വാല്‍ ജീനെപ്പോലെ, വിശപ്പ് സഹിക്കാനാകാതെ ഒരു റൊട്ടിക്കഷണത്തിനായി ഏതോ ബോര്‍മയെന്നു കരുതിയാകും എന്റെ ഭവനത്തില്‍ കയറിയത്.
അലിവുള്ളവരാണെങ്കിലും അസമയത്തുള്ള നിന്റെ വരവ് കുടുംബത്തെ ഭയചകിതരാക്കും. ചിലപ്പോള്‍ നിന്നെ ഉപദ്രവിക്കാനും കാരണമാകും.അതുകൊണ്ട് നിനക്ക് എന്താണ് വേണ്ടതെന്നും എപ്പോള്‍ വേണമെന്നും അറിയിക്കുക. ഞാന്‍ അത് എന്റെ വീടിന്റെ തിണ്ണയില്‍ വയ്ക്കാം. ക്വാറന്റീന്‍ ആയതുകൊണ്ടു ഞങ്ങള്‍ വെളിയില്‍ ഇറങ്ങില്ല.
നീയും, കോവിഡ് പിടിക്കാതിരിക്കാനും ആരെയും പിടിപ്പിക്കാതിരിക്കാനും വീട്ടില്‍ ഇരിക്കുക'. ഈ ഗുരുതര ദിനങ്ങള്‍ കഴിയുമ്പോള്‍ വിശദമായി കാണണമെന്നും കതകില്‍ മുട്ടുന്ന ശബ്ദം കേട്ടിരുന്നെങ്കിലും ഗൃഹനാഥനും നായികയും തമ്മിലുള്ള ആശയപ്പിശകാണ് കള്ളനെ പിടിക്കാന്‍ കഴിയാതെ പോയതിനു കാരണമെന്നും പറഞ്ഞാണ് കത്ത് അവസാനിപ്പിക്കുന്നത്.
https://www.facebook.com/Malayalivartha
