'ഇരട്ടക്കുട്ടികളുടെ അച്ഛന്' സുരക്ഷയോര്ത്ത് മക്കളെ കാണാനുള്ള ആശയടക്കുന്നു!
ഹരിപ്പാട് ജനമൈത്രി പൊലീസ് സ്റ്റേഷനിലെ സിവില് പൊലീസ് ഓഫിസറായ ആറാട്ടുപുഴ പറശേരി വീട്ടില് വി.വിനോദ് ഫെബ്രുവരി 3-ന് ആണ് ഇരട്ട ആണ്കുട്ടികളുടെ പിതാവായത്. ജനമൈത്രി ബീറ്റ് ഓഫിസറാണ് വിനോദ്.
ആശുപത്രിയില് ഒരുനോക്കു കണ്ടതാണ്. പിന്നെ വിനോദ് അവരെ കാണാന് പോയില്ല. കഴിഞ്ഞ 29-ന് നടത്താനിരുന്ന പേരിടീല് ചടങ്ങു മാറ്റി. ഇനിയെല്ലാം കോവിഡ് 19 ഡ്യൂട്ടി കഴിഞ്ഞിട്ട്.
വിനോദിന്റെ പ്രധാന ചുമതല കോവിഡ് 19 നിരീക്ഷണത്തിലുള്ളവരുടെ വിവരങ്ങള് അന്വേഷിക്കുക, അതിഥി തൊഴിലാളികളുടെ കണക്കെടുക്കുക തുടങ്ങിയവയാണ്. ഇതിനിടയില് എല്ലാവരുടെയും സുരക്ഷയെക്കരുതിയാണ് കുഞ്ഞുങ്ങളെ കാണാന് പോകാത്തതെന്നു വിനോദ് പറയുന്നു.
ആശുപത്രിയില് കണ്ടിരുന്നു. ആശുപത്രി വിട്ടതോടെ ഭാര്യ മിനിയും കുഞ്ഞുങ്ങളും അമ്പലപ്പുഴയിലെ മിനിയുടെ വീട്ടിലേക്കു പോയി. പിന്നെ അവരെ കണ്ടിട്ടില്ല. നേരിട്ടു കാണാന് കഴിയുന്നില്ലെങ്കിലും മിനി ദിവസവും അവരെ ഫോണിലൂടെ കാട്ടിക്കൊടുക്കുന്നുണ്ട്.
ഡ്യൂട്ടി കഴിഞ്ഞ് എത്തിയാലുടന്, അച്ഛനും അമ്മയ്ക്കുമൊപ്പം കുടുംബ വീട്ടില് താമസിക്കുന്ന വിനോദ് വീടിനു പുറത്തുള്ള കുളിമുറിയില് യൂണിഫോം കഴുകി കുളിച്ചിട്ടേ വീട്ടില് കയറൂ.
ബന്ധുക്കളില് മറ്റു രണ്ടു സിവില് പൊലീസ് ഓഫിസര്മാര് കൂടിയുണ്ട്. ഭാര്യാസഹോദരന് ഓമനക്കുട്ടനും സഹോദരീഭര്ത്താവ് മനീഷും. കോവിഡ് - 19 ജാഗ്രത കാരണം അവരും കുട്ടികളെ കാണാന് എത്തിയിട്ടില്ല.
https://www.facebook.com/Malayalivartha