വിവാഹദിനത്തില്‍ സമൂഹ അടുക്കളയിലൂടെ നാടിന് സദ്യ ഒരുക്കാനായതിന്റെ ആഹ്ലാദത്തില്‍ വധൂവരന്മാര്‍!
ആലപ്പുഴ കരളകം വാര്‍ഡ് വിവേക് നിവാസില്‍ ശശികുമാറിന്റെയും ശോഭയുടെയും മകന്‍ വിവേകും (അപ്പു), തിരുമല വാര്‍ഡില്‍ പോഞ്ഞിക്കര പുതുവേലില്‍ വീട്ടില്‍ പ്രദീപ് കുമാറിന്റെയും സിന്ധുവിന്റെയും മകള്‍ പ്രസീതയും (പൊന്നു) വിവാഹം കഴിഞ്ഞ് നേരെ സമൂഹ അടുക്കളയിലേക്കാണ് എത്തിയത്.
ആള്‍ക്കൂട്ടവും ആഘോഷവും ഒഴിവാക്കി വിവാഹം നടത്തിയെങ്കിലും വിവാഹ സദ്യ ഒഴിവാക്കിയില്ല. ആ വിഭവങ്ങള്‍ സമൂഹ അടുക്കളയില്‍ നിന്ന് പൊതിച്ചോറുകളായി മുന്നൂറില്‍പരം ആളുകളെ തേടിയെത്തി. പായസവും ഉപ്പേരിയും പഴവും പുളിശേരിയും ഉള്‍പ്പെടെ 14 ഇനങ്ങള്‍ പൊതിയില്‍ നിരന്നു.
രാവിലെ കിടങ്ങാംപറമ്പ് ഭുവനേശ്വരി ക്ഷേത്ര നടയില്‍ ലളിതമായ വിവാഹച്ചടങ്ങ്. മസ്‌കത്തില്‍ സ്വകാര്യ സ്ഥാപനത്തില്‍ മാനേജരായ വിവേക് മാര്‍ച്ച് ഒന്നിനാണ് നാട്ടിലെത്തിയത്. ആലപ്പുഴയില്‍ സ്വകാര്യ സ്ഥാപനത്തില്‍ എന്‍ജിനീയറാണ് പ്രസീത. വിവേകിന്റെയും പ്രസീതയുടെയും അച്ഛന്മാര്‍ മാത്രം പങ്കെടുത്ത വിവാഹത്തിനു ശേഷം വധൂവരന്മാര്‍ നേരെ കരളകം വാര്‍ഡിലെ വടികാട് ടൗണ്‍ എല്‍പി സ്‌കൂളിലെ സമൂഹ അടുക്കളയിലേക്ക് എത്തി.
സ്‌കൂളിലെത്തിയ വധൂവരന്‍മാരെ നഗരസഭാധ്യക്ഷന്‍ ഇല്ലിക്കല്‍ കുഞ്ഞുമോന്‍, കരളകം വാര്‍ഡ് കൗണ്‍സിലര്‍ ആര്‍.ആര്‍.ജോഷിരാജ് എന്നിവരുടെ നേതൃത്വത്തില്‍ സ്വീകരിച്ചു.
https://www.facebook.com/Malayalivartha
