'സ്നേഹവും കരുതലും നല്‍കുന്ന സുന്ദരമായ പാദങ്ങള്‍' യു.എസ് പ്രസിഡന്റ് ഡോണള്‍ഡ് ട്രംപിന്റെ മകള്‍ ഇവാന്‍ക ട്രംപ് ട്വീറ്റ് ചെയ്ത വരികളാണ്. അവര്‍ ആ പ്രശംസ 15-കാരി ജ്യോതികുമാരിയ്ക്ക് നല്‍കിയതാണ്.

ലോക്ഡൗണില്‍ ഡല്‍ഹിയില്‍ കുടുങ്ങിപ്പോയ രോഗിയായ പിതാവിനെ ബിഹാറിലെ വീട്ടിലെത്തിക്കാന്‍ 1200 കിലോമീറ്റര്‍ സൈക്കിള്‍ ചവിട്ടിയ 15-കാരിയെ ആര്‍ക്കെങ്കിലും മറക്കാന്‍ കഴിയുമോ?

രോഗിയായ പിതാവിനെ സൈക്കിളിന്റെ പിന്നിലിരുത്തി ഏഴു ദിവസം കൊണ്ട് 1200 കിലോമീറ്ററോളം സഞ്ചരിച്ചാണ് 15 വയസ്സുള്ള ജ്യോതികുമാരി വീട്ടിലെത്തിച്ചത്. കരുതലൂം സ്നേഹവും നിറഞ്ഞ സുന്ദരമായ ആ പാദങ്ങള്‍ ഇന്ത്യന്‍ ജനതയുടെയും സൈക്കളിംഗ് ഫെഡറേഷന്റെയും മനോധര്‍മ്മമാണ് കാണിക്കുന്നതെന്നും അവര്‍ പറഞ്ഞു.

എന്നാല്‍ പട്ടിണിയും ദാരിദ്ര്യവും മൂലം വശംകെട്ട ഒരു 15-കാരിയുടെ ദുരിതത്തെ മഹത്വവല്‍ക്കരിക്കുന്ന ഇവാന്‍ക ട്രംപ് ശരിയായ രീതിയിലല്ല ചിന്തിക്കുന്നതെന്ന് വിമര്‍ശിക്കുന്നവരുമുണ്ട്.

ബീഹാറില്‍ നിന്നും ജ്യോതി കുമാരി മാര്‍ച്ചിലാണ് ഗുഡ്ഗാവില്‍ ഇ-റിക്ഷ തൊഴിലാളിലായ പിതാവിന്റെ താമസ സ്ഥലത്തെത്തിയത്. അപകടത്തില്‍ പരിക്കേറ്റ് ചികിത്സയിലായിരുന്നു അദ്ദേഹം. ലോക്ഡൗണ്‍ വന്നതോടെ ജ്യോതികുമാരിക്ക് പിതാവിനൊപ്പം കഴിയേണ്ടി വന്നു. വീടൊഴിയാന്‍ വീട്ടുടമ ആവശ്യപ്പെട്ടതോടെയാണ് പിതാവിനെയും കൂട്ടി വീട്ടിലേക്ക് മടങ്ങാന്‍ അവള്‍ തീരുമാനിച്ചത്.

ട്രെയിന്‍, ബസ് സര്‍വീസുകള്‍ നിര്‍ത്തിയതോടെ പിതാവിനെ വീട്ടിലെത്തിക്കാന്‍ എന്താണ് വഴിയെന്ന് അവള്‍ ആലോചിച്ചു. അങ്ങനെയാണ് പിതാവിനെ സൈക്കിളിലിരുത്തി കൊണ്ടുപോകാമെന്ന ആശയത്തിലെത്തിയത്. ആദ്യം സൈക്കിള്‍ വാങ്ങുന്നതിനുള്ള പണം കടമായി വാങ്ങി. വലിയ ഭാരം വഹിച്ച് സൈക്കിള്‍ ചവിട്ടുന്നതില്‍ നിന്നും പിതാവ് മകളെ വിലക്കിയെങ്കിലും അവള്‍ വകവച്ചില്ല.

ചില ദിവസങ്ങളില്‍ 30-40 കിലോമീറ്ററുകള്‍ സൈക്കിള്‍ ചവിട്ടിയിരുന്നുവെന്ന് അവള്‍ പറയുന്നു. സൗജന്യമായി ഭക്ഷണം കിട്ടുന്ന സ്ഥലങ്ങളില്‍ നിന്നുമാത്രം ഭക്ഷണം കഴിച്ചായിരുന്നു യാത്ര. അവളുടെ പരിശ്രമം കണ്ട ഒരു ലോറി ഡ്രൈവര്‍ ഇടയ്ക്ക് സഹായവുമായി എത്തി.

ജ്യോതി കുമാരിയുടെ വാര്‍ത്ത അറിഞ്ഞ ഇന്ത്യന്‍ സൈക്കിളിംഗ് ഫെഡറേഷന്‍ അടുത്ത മാസം അവളെ കൂടിക്കാഴ്ചയ്ക്ക് ക്ഷണിച്ചിട്ടുണ്ട്.