108-ന്റെ ഡ്രൈവര് ആംബുലന്സിലെത്തി, ഒരു വയസ്സു മാത്രം പ്രായമുള്ള കണ്മണിയെ ദൂരത്തുനിന്ന് ഒരുനോക്ക് കണ്ടു; സേവനത്തിന് നിറഞ്ഞ കയ്യടി
കോതമംഗലം താലൂക്ക് ആശുപത്രി കേന്ദ്രീകരിച്ച് സര്വീസ് നടത്തുന്ന 108 ആംബുലന്സിന്റെ ഡ്രൈവര് കായംകുളം പുള്ളിക്കണക്ക് പുളിമൂട്ടില് ഫൈസല് മന്സിലില് ഫൈസല് കബീര് (29) മാസങ്ങള്ക്കു ശേഷം ഒരു വയസ്സു മാത്രം പ്രായമുള്ള മകളെ ഒരുനോക്കു കണ്ടു. അകലെ വണ്ടിയിലിരുന്നു കൊണ്ട് റോഡിന്റെ മറുവശം നില്ക്കുന്ന വാവയെ കണ്ടു സംതൃപ്തിയടഞ്ഞു. പിന്നീട് കോവിഡ് ഡ്യൂട്ടിയിലേക്ക് മടങ്ങി.
9 മാസമായി എറണാകുളത്ത് 108 ആംബുലന്സില് ജോലി ചെയ്യുന്ന ഫൈസല് 4 മാസമായി കോവിഡ് ഡ്യൂട്ടി കാരണം ഭാര്യയെയും കുഞ്ഞിനെയും കാണാന് പോയിരുന്നില്ല. ഭാര്യയും കുഞ്ഞും അമ്പലപ്പുഴയിലെ വീട്ടിലായിരുന്നു.
തിരുവനന്തപുരം രാജീവ് ഗാന്ധി സെന്റര് ഫോര് ബയോ ടെക്നോളജിയില് രക്തസാംപിളുകള് പരിശോധനയ്ക്കു നല്കാന് 3-ാം തീയതി രാത്രിയാണ് ഫൈസല് പെരുമ്പാവൂരില് നിന്ന് പോയത്. അന്നുതന്നെ തിരികെ മടങ്ങിയെങ്കിലും കുഞ്ഞിനെ കാണണമെന്ന ആഗ്രഹത്തില് രാത്രി കായംകുളത്ത് റോഡരികില് വാഹനം നിര്ത്തിയിട്ട് ഉറങ്ങി.
പുലര്ച്ചെ അമ്പലപ്പുഴയിലെത്തുമെന്നും കുഞ്ഞിനെ കാണിച്ചുതരണമെന്നും അറിയിച്ചിരുന്നതിനാല് ഭാര്യ തന്സില കുഞ്ഞിനെയും കൊണ്ട് റോഡരികില് കാത്തുനിന്നു. ഏഴു മണിയോടെ ഫൈസല് അവിടെയെത്തി.
മാസങ്ങള്ക്കു ശേഷം കുഞ്ഞു നൂറയെ ഒരുനോക്കു കണ്ട സന്തോഷത്തില് ഫൈസല് കബീര് ആംബുലന്സുമായി മുന്നോട്ടു പാഞ്ഞു. ഈ ദൃശ്യങ്ങള് ഒരു ബന്ധു പകര്ത്തി പ്രചരിപ്പിച്ചതോടെ ആംബുലന്സ് ഡ്രൈവര്മാരുടെ സേവനത്തിനു നിറഞ്ഞ കയ്യടികളാണ്.
https://www.facebook.com/Malayalivartha