കുടുംബത്തിന്റെ പ്രതീക്ഷകള് 'കാലിലേറ്റി' സഹദ്... സകലപിന്തുണയും സഹായവുമായി ഉമ്മയൊപ്പം...!
കൂലിവേലക്കാരനായ അച്ചനമ്പലം പെരണ്ടക്കല് ചുക്കന് അബൂബക്കര് സിദ്ദീഖിന്റെ മകനായ മുഹമ്മദ് സഹദ് എന്ന പതിനേഴു വയസ്സുകാരന്റെ മോഹം വലിയൊരു ഫുട്ബോള് താരമാകണമെന്നാണ്.
മൂന്നു പെണ്മക്കളെ വിവാഹം കഴിപ്പിച്ചയയ്ക്കാന് ഉണ്ടായിരുന്ന വീടു വരെ പിതാവ് അബൂബക്കര് സിദ്ദീഖിനു വില്ക്കേണ്ടി വന്നു. എങ്കിലും ഒരുനാള് സഹദ് മികച്ചൊരു ഫുട്ബോള് താരമാകുമെന്ന പ്രതീക്ഷയില് പ്രതിസന്ധികളെ ഒരുമിച്ചു നേരിടുകയാണ് ഈ കുടുംബം. വാടക വീടിന്റെ ടെറസില് മുഹമ്മദ് സഹദിന്റെ ഹെഡറുകള്ക്ക് പന്തിട്ടുകൊടുക്കുന്ന ഉമ്മ ഹാജറയുടെ വിഡിയോ സമൂഹമാധ്യമങ്ങളില് വൈറലാണിപ്പോള്.
അച്ചനമ്പലം ചെള്ളിവളപ്പിലെ തെങ്ങിന്തോപ്പില് പന്തുതട്ടിക്കളിച്ച സഹദ് അച്ചനമ്പലം ജിയുപി സ്കൂള് ടീം, ചെള്ളിവളപ്പ് യങ് സ്റ്റാര് ക്ലബ് എന്നിവയിലും കളിച്ചു. സുബ്രതോ കപ്പ് മത്സരത്തില് ചേറൂര് പിപിടിഎംവൈ ഹയര് സെക്കന്ഡറി സ്കൂളിനു വേണ്ടിയും മാറ്റുരച്ചു. എറണാകുളം സ്കോര് ലൈന് എഫ്സിയുടെ അണ്ടര് 15 ടീമിന് വേണ്ടിയും കളിക്കിറങ്ങിയിരുന്നു.
ഇപ്പോള് കൊണ്ടോട്ടി തുറക്കല് ഇഎംഇഎ ഹയര് സെക്കന്ഡറി സ്കൂളില് പ്ലസ്ടു വിദ്യാര്ഥിയാണ്.
https://www.facebook.com/Malayalivartha