നിരയായി നിര്‍ത്തിയിട്ട അഞ്ച് ഓട്ടോറിക്ഷകള്‍ക്കിടയില്‍ നിന്ന് ഒരു ഓട്ടോ മാത്രം കാട്ടാന തിരഞ്ഞുപിടിച്ചു തകര്‍ത്തു.

മൂന്നാര്‍ ടൗണിലെ നല്ലയപ്പന്റെ ഓട്ടോ ആണ് ഇന്നലെ പുലര്‍ച്ചെ ഒറ്റയാന്‍ തകര്‍ത്തത്. കെഡിഎച്ച്‌പി നയമക്കാട് എസ്റ്റേറ്റ് ചോളമല ഡിവിഷനില്‍ ഒന്‍പത് മുറി ലയത്തിലാണ് നല്ലയപ്പന്‍ താമസിക്കുന്നത്.

തൊഴിലാളി ലയത്തിലെ വീടുകള്‍ക്കു മുന്നില്‍ അഞ്ച് ഓട്ടോകള്‍ അടുത്തടുത്തായി നിര്‍ത്തിയിട്ടിരുന്നു.

രാത്രി ഒന്നരയോടെ എത്തിയ ഒറ്റയാന്‍ ഈ ഓട്ടോ മാത്രം പൂര്‍ണമായി അടിച്ചു തകര്‍ക്കുകയായിരുന്നു. ശബ്ദം കേട്ട് വീടിനു പുറത്ത് ഇറങ്ങിയവരെ വിരട്ടുകയും ചെയ്തു.

തകര്‍ന്ന ഓട്ടോയ്ക്കു സമീപം അര മണിക്കൂറോളം നിലയുറപ്പിച്ച ശേഷമാണ് ആന മടങ്ങിയത്. വനപാലകര്‍ ഇന്നലെ രാവിലെ സ്ഥലത്ത് എത്തി പരിശോധന നടത്തി.