അമിത്ഷായുടേയും മോദിജിയുടേയും കിടുക്കാച്ചി ഐഡിയ, ഹിമാലയത്തില്‍ എഴുത്ത് പരിശീലനത്തിന് തുടക്കമായി
26 NOVEMBER 2022 01:46 PM IST
മലയാളി വാര്‍ത്ത
അതുകൊണ്ടാണ് അമിത്ഷാ പറയുന്നത് ചരിത്രം മാറ്റി എഴുതണം. കേന്ദ്രഭരണം കയ്യിലുള്ളപ്പോള്‍ ആരെക്കൊണ്ട് എങ്ങനെ വേണമോ എഴുതിക്കാമല്ലോ. മിടുക്കന്‍ കളിയൊക്ക പഠിച്ചു കളഞ്ഞു. ഇപ്പോഴിതാ സാക്ഷാല്‍ മോദിജിയും രംഗത്തിറങ്ങി. ചരിത്രത്തെ ചവിട്ടി കുഴയ്ക്കണം. കുഴച്ച് മറിച്ച് നമ്മുടെ ആള്‍ക്കാരെ മാന്യന്‍മാരുടെ പട്ടികയിലെത്തിക്കണം. വിദേശികളും, അറബികളും, മുഗളന്‍മാരും കൂടെ ഇവിടത്തെ ചരിത്രത്തെ എഴുതി നശിപ്പിച്ചിരിക്കുന്നെന്നാണ് ഇവരുടെ പക്ഷം. പഴയ നൂറ്റാണ്ടുകളില്‍ ഇത്തരം കൂശ്മാണ്ഡങ്ങള്‍ ഇല്ലാതെ പോയത് നന്നായി. സിന്ധൂനദീതട സംസ്‌കാരം മുതലേ ഹിന്ദുവും ഹിന്ദുമതവും ഉണ്ടെന്ന് അണികളെ പഠിപ്പിച്ചു കൊണ്ടിരിക്കുന്നവരാണിവര്‍. വേദങ്ങളേക്കാള്‍ പ്രായം ഈ മതത്തിനുണ്ടോ. വെറുതെ ഒരു സംശയം. ദയവു ചെയ്ത് സംവാദത്തിനൊന്നും വിളിക്കരുത്. പതിനഞ്ച് ശതമാനനം വരുന്ന ന്യൂനപക്ഷങ്ങളെയാണിവര്‍ ഭയക്കുന്നത്. ഭയം മൂത്ത് മൂത്ത് ഇപ്പോള്‍ ഒരു തരം ആവേശമായി മാറിയിരിക്കുകയാണ്.
മോദിജിയ്ക്കാണെങ്കില്‍ ഇന്‍ഡ്യയുടെ നാലതിര്‍ത്തിക്കുള്ളില്‍ മാത്രമാണ് ഹിന്ദു പ്രേമം. അതിര് വിട്ടാലോ തികഞ്ഞ മതേതരവാദി. ഏത് രാജ്യത്തും പോയി ആരെയും കെട്ടിപിടിക്കും. ലോകത്തിലെ അത്യുന്നത നേതാവാകാനാണ് പുള്ളിക്കാരന്റെ ഉലകം ചുറ്റല്‍. ഭൂമിയില്‍ ഇനി വേറെ രാജ്യമൊന്നുമില്ല ബാലിബന്‍ കറങ്ങാത്തതായി. അപ്പോ പറഞ്ഞു വന്നത് ചരിത്രം മാറ്റണം. കുട്ടികളൊക്കെ ഇനി പഠിക്കാനുള്ളത് ഹിന്ദു ചരിത്രം മാത്രം. ഗാന്ധിയും സഹനസമരങ്ങളുമൊന്നും പഠിക്കണ്ട. അതൊക്കെ പഠിച്ച് സമരത്തിനൊന്നും ഇറങ്ങാന്‍ പാടില്ല.
പൂജയും മന്ത്രവുമായി വീട്ടില്‍ ഒതുങ്ങിക്കോണം. വിദ്യാഭ്യാസം തീരെ പാടില്ല. അഞ്ച് വര്‍ഷത്തിലൊരിക്കല്‍ താമരയില്‍ കുത്താനുള്ള അറിവ് മതി , ധാരാളം. ഹിന്ദിയില്‍ പഠിച്ച് ഡോക്ടറാകുന്നവന് വിദേശത്ത് പോയി ജോലി നോക്കാന്‍ കഴിയില്ല. അതുകൊണ്ട് ഒള്ള ചക്കയും കഞ്ഞിയും കുടിച്ച് കോപ്പും തൂക്കി ഇവിടെ കിടന്നു കൊള്ളും. വിദേശത്ത് പോയി പഠിച്ചു വന്നാലോ ഹിന്ദിയില്‍ തുണ്ടെഴുതണം. മെഡിക്കല്‍ സ്‌റ്റോറുകാരെല്ലാം ഹിന്ദി പഠിച്ചു തുടങ്ങിയെന്നാണ് കേള്‍വി. ചരിത്രത്തിലെ വിഡ്ഡിയാസുരന്മാരുടെ കൂട്ടത്തില്‍ ഇവരുടെ ഭരണകാലം എഴുതി ചേര്‍ക്കേണ്ടി വരുമോ ആവോ. കൗപീനത്തിലും അല്ലാതെയും യാത്ര ചെയ്യുന്ന സ്വാമിമാരുടെ കാലില്‍ വീണ് എന്തിനുള്ള അനുഗ്രഹമാണിക്കൂട്ടര്‍ വാങ്ങുന്നതെന്ന സംശയം ബാക്കിയാണ്. ഗുജറാത്തിലിപ്പോള്‍ എന്തു കൊണ്ടും ശോഭനമാണ് .കേന്ദ്രം മൊത്തം അവിടെ ഇളക്കി മറിക്കുകയാണ്. പാവം ഗ്രാമീണരുണ്ടോ ഇതൊക്കെ ശ്രദ്ധിക്കാന്‍. പൊരിവെയിലത്ത് കഷ്ടപ്പെടുന്നവന്റെ പണം വാങ്ങി കൊണ്ട് അവരെ തമ്മിലടിപ്പിക്കാന്‍ ഓരോ ഉടായിപ്പുമായിട്ട് ഇറങ്ങിയിരിക്കുകയാണ് ബിജെപിയും ആര്‍ എസ് എസും സംഘപരിവാരങ്ങളും. തല്ലല്ലമ്മാവാ.. ഓന്‍ നന്നാവില്ല എന്നുറപ്പുള്ളതു കൊണ്ട് ആ വഴിയ്ക്ക് ആരും പോകാറില്ല. ആ ഒരു കാര്യം പറയാന്‍ വിട്ടു പോയി ചരിത്രം മാറ്റുമ്പോള്‍ ആ ഗോഡ്‌സയെ അല്ലെങ്കില്‍ സര്‍വക്കറെ മിനിമം ഒരു രാഷ്ട്ര പിതാവെങ്കിലുമാക്കാന്‍ മറക്കരുത് . പ്ലീസ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെ ഫേസ്‌ബുക്ക്‌ പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
