കോടതി നടപടി ഭയന്ന് പത്തനംതിട്ട ജില്ലാ കളക്ടറുടെ ഔദ്യോഗിക വാഹനം ഒളിപ്പിച്ചു. കളക്ടർ ദിവ്യ എസ് അയ്യരുടെ കാർ മാത്രമല്ല, എ ഡി എം, ഹുസൂർ ശിരസ്തേദാർ, ഡെപ്യൂട്ടി കളക്ടർ എൽ എ, ഡെപ്യൂട്ടി കളക്ടർ ഇലക്‌ഷൻ എന്നിവരുടെ വാഹനങ്ങളും കളക്ട്രേറ്റ് മുറ്റത്ത് നിന്നും അപ്രത്യക്ഷമായിട്ടുണ്ട്. ഹൈക്കോടതി നിർദ്ദേശപ്രകാരം പത്തനംതിട്ട സബ് കോടതിയുടെ ജപ്തി നടപടിയിൽ നിന്ന് ഒഴിവാക്കാനാണ് ജില്ലാ കളക്ടറുടെ പേരിലുള്ള അഞ്ച് വാഹനങ്ങൾ ഒളിപ്പിച്ചത്. കോടതി അമീൻ കളക്ട്രേറ്റ് പരിസരത്ത് രണ്ട് തവണ വന്നുവെന്നാണ് സൂചന.

വാഹനങ്ങള്‍ മാത്രമല്ല, കളക്ടറുടെ ഔദ്യോഗിക അക്കൗണ്ടിൽ കിടന്ന പണവും പിൻവലിച്ചിട്ടുണ്ട്. പത്തനംതിട്ട റിങ് റോഡിനുവേണ്ടി 2008-ൽ ഏറ്റെടുത്ത മൂന്ന് സെന്റ് സ്ഥലത്തിന്റെ നഷ്ടപരിഹാരമായി 38 ലക്ഷം രൂപ കോടതി നഷ്ടപരിഹാരമായി വിധിച്ചിരുന്നു. പലിശയടക്കമുള്ള ഈ തുക നല്‍കിയില്ലെങ്കില്‍ കളക്ടറുടേതുൾപ്പെടെ വാഹനങ്ങൾ ജപ്തിചെയ്യാനും കോടതി ഉത്തരവിട്ടു. നഷ്ടപരിഹാരം നല്‍കാത്തതിനെ തുടർന്ന് കോടതി ജപ്തി നടപടിയുമായി മുന്നോട്ട് പോകുന്ന വിവരം കിട്ടിയതോടെയാണ് കാറും അക്കൗണ്ടിലെ പണവും മാറ്റിയത്.

വാഹനം മാറ്റിയതോടെ ജില്ലാ കളക്ടർ ദിവ്യ എസ് അയ്യർ ഇപ്പോൾ തിരുവല്ല സബ്‌ കളക്ടറുടെ വാഹനത്തിലാണ് യാത്ര. ബോർഡ് ഉള്‍പ്പടെ ഔദ്യോഗിക വാഹനമാണ് എന്നതിന്റെ ഒരു സൂചനയും ഈ വാഹനത്തിലില്ല. ജില്ലാ മജിസ്‌ടേറ്റിന്റെ ചുമതലയുള്ള കളക്ടർ തന്നെ നീതിന്യായ പീഠത്തിന്റെ ഉത്തരവിനെ കബളിപ്പിക്കുന്നത് ഏറെ ചർച്ചയാകുന്നുണ്ട്. കളക്ടറുടെ അടക്കം അഞ്ച് ഔദ്യോഗിക വാഹനങ്ങൾ ജപ്തി ചെയ്യാൻ കഴിഞ്ഞദിവസം രണ്ട് പ്രാവശ്യം കോടതിയുടെ ആമീൻ കളക്ടറേറ്റിലെത്തിയപ്പോൾ വാഹനങ്ങൾ കണ്ടെത്താൻ കഴിഞ്ഞില്ല.

പത്തനംതിട്ട റിംഗ് റോഡിനു വേണ്ടി 2008ൽ ഏറ്റെടുത്ത മൂന്ന് സെന്റ് സ്ഥലത്തിന്റെ നഷ്ടപരിഹാരമായി പലിശ ഉൾപ്പെടെ 38 ലക്ഷം ഭൂ ഉടമക്ക് നൽകാൻ വൈകിയതാണ് ജപ്തിയിലേക്ക് നീണ്ടത്. ഹൈക്കോടതി ഉത്തരവ് പ്രകാരം അടുത്ത മാസം 23ന് മുമ്പ് ഉടമയ്ക്ക് പൊതുമരാമത്ത് വകുപ്പും ജില്ലാ ഭരണകൂടവും പണം കൈമാറണം. ഭൂമിയേറ്റെടുത്തതിനു നഷ്ടപരിഹാരം നൽകേണ്ടത് മരാമത്ത് വകുപ്പാണ്.

കളക്ടറേറ്റിൽനിന്ന് പണം ആവശ്യപ്പെട്ടു. പൊതുമരാമത്ത് സെക്രട്ടറിക്കു കത്തയച്ചെങ്കിലും പണം ലഭിച്ചിട്ടില്ല. പണംകൈമാറാതെ വന്നതോടെ മേൽ കോടതി ഉത്തരവ് നടപ്പാക്കാൻ പത്തനംതിട്ട സബ്‌കോടതി ജഡ്ജി എസ്.ഷാനവാസ് ജപ്തി നിർദ്ദേശംനൽകി. വാഹനങ്ങൾ ജപ്തി ചെയ്യാൻ ആമീൻ അനീഷ് കഴിഞ്ഞദിവസം കളക്ടേറ്റിൽ എത്തിയതോടെയാണ് വാഹനങ്ങൾ കടത്തിയതായി അറിഞ്ഞത്.

കളക്ടർ ദിവ്യ.എസ്.അയ്യർ ഉപയോഗിക്കുന്ന ഔദ്യോഗിക വാഹനമായ കെ.എൽ 03 ഡബ്ള്യൂ. 3636 ഇന്നോവ, എ.ഡി.എം രാധാകൃഷ്ണൻ ഉപയോഗിക്കുന്ന കെ.എൽ. 03 വി.5135 ഇന്നോവ, ഹുസൂർ ശിരസ്തദാറിന്റെ കെ.എൽ.03ആർ 8001 ബൊലേറോ, ഭൂമി ഏറ്റെടുക്കൽ ഡെപ്യൂട്ടി കളക്ടർ കെ.എൽ.03 ഡബ്ള്യൂ.9999, ഇലക്ഷൻ ഡെപ്യൂട്ടി കളക്ടറുടെ സിഫ്റ്റ് ഡിസയർ കെ.എൽ.03റ്റി 8400 എന്നീ വാഹനങ്ങൾ ജപ്തിചെയ്യാനാണ് എത്തിയത്. വാഹനങ്ങളെല്ലാം ഡ്രൈവർമാരുടെ വീടുകളിലേക്ക് മാറ്റിയതായാണ് അറിയുന്നത്.

ഭൂമിയേറ്റെടുത്തതിനു നഷ്ടപരിഹാരം നൽകേണ്ടത് പി ഡബ്ലൂ ഡിയാണെങ്കിലും കളക്ടറേറ്റിൽനിന്നു പണം ആവശ്യപ്പെട്ടു പൊതുമരാമത്ത് സെക്രട്ടറിക്കു കത്തയച്ചെങ്കിലും പണം ലഭിച്ചില്ല. കേസ് എപ്രില്‍ 14 ന് മുമ്പ് തീർക്കണമെന്നും ഹൈക്കോടതി നിർദേശിച്ചിട്ടുണ്ട്. സർക്കാർ പണം കെട്ടിവെച്ചാല്‍ ജപ്തി നടപടി ഒഴിവാകുമെന്നാണ് പ്രതീക്ഷ.

സ്ഥലം മാറിപ്പോയ സബ്കളക്ടർക്ക് പകരം നിയമനം ഇല്ലാതായതോടെയാണ് തിരുവല്ലയിലെ വാഹനം കളക്ടർക്ക് ഉപയോഗിക്കാന്‍ സാധിച്ചത്. ജനുവരി ആറിനാണ് സബ് കളക്ടർ ശ്വേത നാഗർകോട്ടി സ്ഥലം മാറിപ്പോയത്. പുതിയ ആള്‍ എത്താതായതോടെ റവന്യു ഡിവിഷൻ ഓഫീസ് ഇൻ ചാർജ് ഭരണത്തിലായിട്ട് 50 ദിവസം പിന്നിട്ടു. സ്ഥിരം ചുമതലയ്ക്ക് ആളില്ലാത്തത് സേവനങ്ങൾക്കെത്തുന്നവരെ ദുരിതത്തിലാക്കുന്നുണ്ട്.