ചെന്നൈ സൂപ്പര്‍ കിംഗ്‌സിനെ ഒരു റണ്‍സിനു പരാജയപ്പെടുത്തി മുംബൈ ഇന്ത്യന്‍സ് ഐപിഎല്‍ കിരീടം സ്വന്തമാക്കി
ആവേശം നിറഞ്ഞ പോരാട്ടത്തിനൊടുവില്‍ ഫൈനലില്‍ ഒരു റണ്‍സിനു ചെന്നൈ സൂപ്പര്‍ കിംഗ്‌സിനെ പരാജയപ്പെടുത്തി മുംബൈ ഇന്ത്യന്‍സ് ഐപിഎല്‍ കിരീടം സ്വന്തമാക്കി. മുംബൈയുടെ 149 റണ്‍സ് പിന്തുടര്‍ന്ന ചെന്നൈ ഒരു റണ്‍ പിന്നില്‍ വീണു. കൈവിട്ട കളി തികഞ്ഞ മികച്ച ബൗളിംഗില്‍ മുംബൈ തിരിച്ചുപിടിക്കുകയായിരുന്നു.
ഹൈവോള്‍ട്ടില്‍ കത്തിനിന്ന ഷെയിണ്‍ വാട്‌സണ്‍ അവസാന ഓവറില്‍ പുറത്തായതും കളിയില്‍ നിര്‍ണായകമായി. അവസാന പന്തില്‍ ചെന്നൈയ്ക്കു ജയിക്കാന്‍ രണ്ടു റണ്‍സ്. മലിംഗയുടെ യോര്‍ക്കര്‍ ശാര്‍ദുല്‍ ഠാക്കൂറിനെ എല്‍ബിയില്‍ കുടുക്കി. അതുവരെ ചെന്നൈയുടെ വിജയം പ്രതീക്ഷിച്ച ഹൈദരാബാദ് സ്‌റ്റേഡിയം മുംബൈയുടെ അവിശ്വസനീയ വിജയത്തില്‍ പൊട്ടിത്തെറിച്ചു.
മുംബൈ നാലാം കിരീടം സ്വന്തമാക്കി ചരിത്രത്തില്‍ ഇടംനേടി. ആദ്യമായാണ് ഒരു ടീം നാല് ഐപിഎല്‍ കിരീടങ്ങള്‍ സ്വന്തമാക്കുന്നത്. ഈ സീസണില്‍ ചെന്നെയ്ക്കു മുംബൈയെ പരാജയപ്പെടുത്താന്‍ കഴിഞ്ഞിട്ടില്ലെന്ന ദുഷ്‌പേരും ധോണിക്കും ടീമിനും മായിക്കാനായില്ല. മലിംഗ എറിഞ്ഞ അവസാന ഓവറില്‍ ഒമ്പത് റണ്‍സായിരുന്നു ചെന്നൈയ്ക്കു ജയിക്കാന്‍ വേണ്ടിയിരുന്നത്.
അര്‍ധസെഞ്ചുറിയുമായി ഷെയിന്‍ വാട്‌സണ്‍ (80) ക്രീസില്‍. മലിംഗയുടെ ഒരു ഓവറില്‍ 20 റണ്‍സ് അടിച്ചുകൂട്ടിയതിന്റെ ആത്മവിശ്വാസത്തില്‍ വാട്‌സണ്‍ ഹൈവോള്‍ട്ടില്‍ കത്തിനില്‍ക്കുമ്പോള്‍ ചെന്നൈ വിജയം ഉറപ്പിച്ചു. എന്നാല്‍ അവസാന ഓവറില്‍ മലിംഗ വേറെ ലെവലായിരുന്നു. ആദ്യ രണ്ടു പന്തുകളില്‍ സിംഗിള്‍. മൂന്നാം പന്തില്‍ വാട്‌സണ്‍ ഡബിള്‍. എന്നാല്‍ നാലാം പന്തില്‍ കളിമാറി. ഡബിള്‍ ഓടിയെടുക്കാനുള്ള ശ്രമത്തിനിടെ വാട്‌സണ്‍ പുറത്ത്. ഇതോടെ കളി എങ്ങോട്ടും തിരിയാമെന്നായി.
അഞ്ചാം പന്തില്‍ വാട്‌സണു പകരമെത്തിയ താക്കൂര്‍ ഡബിള്‍ ഓടിയതോടെ ചെന്നൈയ്ക്കു ജീവനായി. അവസാന പന്തില്‍ ജയിക്കാന്‍ രണ്ട് റണ്‍സ്. ആവേശം കൊടുമുടികയറി. പതിനായിരങ്ങള്‍ തിങ്ങിനിറഞ്ഞ സ്‌റ്റേഡിയത്തില്‍ ആള്‍ക്കൂട്ടത്തിനിടെ വീണ മുട്ടുസൂചികളുടെ ശബ്ദം ഇങ്ങ് ക്രീസുവരെ നീണ്ടുകേട്ടു. ക്യാപ്റ്റന്‍ രോഹിത് ശര്‍മയും മലിംഗയും കൂട്ടിയുംകിഴിച്ചും ആലോചനയില്‍. കിന്റണ്‍ ഡീകോക്കിനെ അടുത്ത് വിളിച്ച് നിര്‍ദേശങ്ങള്‍.
ഒടുവില്‍ മലിംഗ അവസാന പന്തിനായി തയാറെടുത്തു. ഓടിയടുത്ത മലിംഗയുടെ യോര്‍ക്കര്‍ ശാര്‍ദൂലിന്റെ പാഡില്‍ തട്ടിത്തെറിച്ചു. ഹൗസ് ദാറ്റ്.... സ്‌റ്റേഡിയം തൊണ്ടപൊട്ടി. അമ്പയറുടെ ചൂണ്ടുവിരല്‍ ആകാശത്തേക്ക്. മുംബൈ ചരിത്രം സൃഷ്ടിച്ച് കിരീടത്തില്‍ മുത്തമിട്ടു.
59 പന്തില്‍ നാല് സിക്‌സും എട്ടു ബൗണ്ടറിയുമായി അടിച്ചുതകര്‍ത്ത വാട്‌സണ്‍ പുറത്തായതാണ് കളിയില്‍ നിര്‍ണായകമായത്. മൂന്നു തവണ മുംബൈ വാടസണെ കൈവിട്ടതോടെ ഭാഗ്യം ചെന്നൈ പക്ഷത്താണെന്ന് ആരാധകര്‍ വിശ്വസിച്ചു. എന്നാല്‍ നാല് ഓവറില്‍ 14 റണ്‍സ് മാത്രം വിട്ടുനല്‍കി രണ്ടു നിര്‍ണായക വിക്കറ്റുകള്‍ പിഴുത ബുംമ്രയും നാല് ഓവറില്‍ 14 റണ്‍സിന് ഒരു വിക്കറ്റിട്ട ചാഹറും മുംബൈയെ വിജയതീരത്തെത്തിച്ചു.
https://www.facebook.com/Malayalivartha
