ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ സണ്‍റൈസേഴ്‌സിന്റെ വില്യംസന്‍ ഐപിഎല്‍ 13-ാം സീസണിലെ തന്റെ ആദ്യ മത്സരത്തില്‍ 'ക്ലാസ്' ബാറ്റിങ്ങ് പ്രകടനം പുറത്തെടുത്തപ്പോള്‍ അര്‍ധസെഞ്ചുറിയുമായി ബെയര്‍‌സ്റ്റോയും അര്‍ധസെഞ്ചുറിയുടെ വക്കിലെത്തിയ പ്രകടനവുമായി വാര്‍ണറും കരുത്തുകാട്ടിയതോടെ സണ്‍റൈസേഴ്‌സ് ഹൈദരാബാദ് ഡല്‍ഹി ക്യാപിറ്റല്‍സിനു മുന്നില്‍ ഉയര്‍ത്തിയത് 163 റണ്‍സ് വിജയലക്ഷ്യം. നിശ്ചിത 20 ഓവറില്‍ നാലു വിക്കറ്റ് നഷ്ടത്തിലാണ് സണ്‍റൈസേഴ്‌സ് 162 റണ്‍സെടുത്തത്. 48 പന്തില്‍ രണ്ടു ഫോറും ഒരു സിക്‌സും സഹിതം 53 റണ്‍സെടുത്ത ബെയര്‍‌സ്റ്റോയാണ് സണ്‍റൈസേഴ്‌സിന്റെ ടോപ് സ്‌കോറര്‍.

26 പന്തില്‍ അഞ്ച് ഫോറുകള്‍ സഹിതം 41 റണ്‍സെടുത്ത് വില്യംസന്‍ പുറത്തായി. വാര്‍ണര്‍ 33 പന്തില്‍ മൂന്നു ഫോറും രണ്ടു സിക്‌സും സഹിതം 45 റണ്‍സെടുത്തു. അരങ്ങേറ്റ മത്സരം കളിക്കുന്ന അബ്ദുല്‍ സമദ് ഏഴു പന്തില്‍ ഓരോ ഫോറും സിക്‌സും സഹിതം 12 റണ്‍സുമായി പുറത്താകാതെ നിന്നു. അഞ്ച് പന്തില്‍ മൂന്നു റണ്‍സുമായി പുറത്തായ മനീഷ് പാണ്ഡെ മാത്രമാണ് നിരാശപ്പെടുത്തിയത്. അഭിഷേക് ശര്‍മ ഒരു റണ്ണുമായി പുറത്താകാതെ നിന്നു. ഡല്‍ഹിക്കായി കഗീസോ റബാദ, അമിത് മിശ്ര എന്നിവര്‍ രണ്ടു വിക്കറ്റ് വീതം വീഴ്ത്തി.

163 റണ്‍സ് വിജയലക്ഷ്യവുമായി മറുപടി ബാറ്റിങ് ആരംഭിച്ച ഡല്‍ഹിയുടെ സ്‌കോര്‍ ബോര്‍ഡില്‍ രണ്ട് റണ്‍സ് മാത്രമുള്ളപ്പോള്‍ കഴിഞ്ഞ മത്സരത്തിലെ ഹീറോ പൃഥ്വി ഷാ പുറത്ത്. ഭുവനേശ്വര്‍ കുമാര്‍ ബോള്‍ ചെയ്ത ആദ്യ ഓവറിലെ അഞ്ചാം പന്തില്‍ ബെയര്‍‌സ്റ്റോയുടെ ക്യാച്ചില്‍ പുറത്താകുമ്പോള്‍ ഷാ നേടിയത് അഞ്ച് പന്തില്‍ രണ്ട് റണ്‍സ്. രണ്ടാം വിക്കറ്റില്‍ ക്യാപ്റ്റന്‍ ശ്രേയസ് അയ്യരെ കൂട്ടുപിടിച്ച് ശിഖര്‍ ധവാന്‍ 40 റണ്‍സിന്റെ കൂട്ടുകെട്ട് തീര്‍ത്തു. റാഷിദ് ഖാന്‍ ബോള്‍ ചെയ്യാനെത്തിയതോടെ മത്സരം സണ്‍റൈസേഴ്‌സിന്റെ നിയന്ത്രണത്തിലായി. എട്ടാം ഓവറില്‍ ശ്രേയസ് അയ്യരെയും (21 പന്തില്‍ രണ്ടു ഫോറുകള്‍ സഹിതം 17) 12-ാം ഓവറില്‍ ശിഖര്‍ ധവാനെയും (31 പന്തില്‍ നാലു ഫോറുകള്‍ സഹിതം 34) റാഷിദ് ഖാന്‍ പുറത്താക്കി.

ഖലീല്‍ അഹമ്മദിനെ തുടര്‍ച്ചയായി രണ്ടു പന്തുകളില്‍ സിക്‌സര്‍ പറത്തിയ ഷിംറോണ്‍ ഹെറ്റ്‌മെയറിനും അധികം ആയുസ്സുണ്ടായില്ല. തൊട്ടടുത്ത ഓവറിലെ ആദ്യ പന്തില്‍ ഭുവനേശ്വര്‍ കുമാര്‍ ഹെറ്റ്‌മെയറിനെ പുറത്താക്കി. 12 പന്തില്‍ ഇരട്ടസിക്‌സുകള്‍ സഹിതം 21 റണ്‍സുമായി ഹെറ്റ്‌മെയര്‍ മടങ്ങി. അഞ്ചാമനായെത്തിയ മാര്‍ക്കസ് സ്റ്റോയ്‌നിസ് നേരിട്ട ആദ്യ പന്തുതന്നെ ബൗണ്ടറി കടത്തിയാണ് തുടക്കമിട്ടത്.

തന്റെ അവസാന ഓവര്‍ എറിയാനെത്തിയ റാഷിദ്, നാലാം പന്തില്‍ ഋഷഭ് പന്തിനെ പ്രിയം ഗാര്‍ഗിന്റെ കൈകളിലെത്തിച്ചു. 27 പന്തില്‍ ഒരു ഫോറും രണ്ടു സിക്‌സും സഹിതം 27 റണ്‍സുമായി പന്ത് മടങ്ങി. 18ാം ഓവറിന്റെ അവസാന പന്തില്‍ മാര്‍ക്കസ് സ്റ്റോയ്‌നിസും (ഒന്‍പത് പന്തില്‍ 11) പുറത്തായതോടെ ഡല്‍ഹിയുടെ പ്രതീക്ഷയറ്റു. അക്‌സര്‍ പട്ടേലിനെ അവസാന ഓവറില്‍ ഖലീല്‍ അഹമ്മദും മടക്കിയതോടെ ഡല്‍ഹിയുടെ തകര്‍ച്ച പൂര്‍ണം.

15 റണ്‍സിനാണ് സണ്‍റൈസേഴ്‌സിന്റെ വിജയം. ആദ്യ രണ്ടു മത്സരങ്ങളില്‍ പുറത്തിരുന്ന കെയ്ന്‍ വില്യംസന്‍ ടീമിലെത്തിയതും സ്പിന്നര്‍ റാഷിദ് ഖാന്‍ ഫോമിലേക്ക് തിരിച്ചെത്തിയതുമാണ് സണ്‍റൈസേഴ്‌സിന്റെ തലവര മാറ്റിയത്.