സ്പാനിഷ് ലാ ലിഗ ഫുട്‌ബോളില്‍ ബാഴ്‌സലോണയ്ക്ക് വന്‍ ജയം. ക്യാമ്പ് നൂവില്‍ നടന്ന മത്സരത്തില്‍ എതിരില്ലാത്ത നാലു ഗോളുകള്‍ക്ക് സെവിയ്യയെ കീഴടക്കി. മെസിയുടെ ഗോളിനായുള്ള ബാഴ്‌സലോണ ആരാധകരുടെ കാത്തിരിപ്പും ഈ മത്സരത്തോടെ അവസാനമായി. 27ാം മിനിറ്റില്‍ ബാഴ്‌സ ഗോള്‍ വേട്ട തുടങ്ങി. സെമെഡോയുടെ ക്രോസില്‍ നിന്ന് ഒരു ബൈസൈക്കിള്‍ കിക്കിലൂടെ സുവാരസാണ് ആദ്യ ഗോള്‍ നേടിയത്. പിന്നീട് വിദാല്‍(32ാം മിനിറ്റ്), ഉസ്മാന്‍ ഡെംബലെ(35ാം മിനിറ്റ്), മെസി(78ാം മിനിറ്റ്) എന്നിവരും ഗോള്‍ നേടി.

മത്സരത്തിന്റെ അവസാനം റൊണാള്‍ഡും ഡെംബലയും ചുവപ്പ് കാര്‍ഡുകള്‍ കണ്ട് പുറത്തുപോയെങ്കിലും ബാഴ്‌സ ഗോള്‍ വഴങ്ങാതെ പിടിച്ച് നിന്നു. ജയത്തോടെ എട്ടു മത്സരങ്ങളില്‍ 16 പോയിന്റുമായി ബാഴ്‌സലോണ ലീഗില്‍ രണ്ടാമത് എത്തി. 18 പോയിന്റുള്ള റയലാണ് ഒന്നാമത്.