ക്രിസ്റ്റ്യാനോ പൊരുതി ജയം നേടി; പക്ഷേ യുവെന്റസ് യുവേഫ ചാമ്പ്യന്സ് ലീഗില് നിന്നും പുറത്ത്; എന്നാല് പുതിയ റെക്കോര്ഡ് സ്വന്തമാക്കി ക്രിസ്റ്റ്യാനോ റൊണാള്ഡോ; ഇനി ഊഴം മെസിക്ക്
ഇരട്ടഗോളുകളുമായി ക്രിസ്റ്റ്യാനോ റൊണാള്ഡോ മിന്നിത്തിളങ്ങിയ മത്സരത്തില് സ്വന്തം തട്ടകത്തില് ജയിച്ചിട്ടും ഇറ്റാലിയന് ചാംപ്യന്മാരായ യുവെന്റസ് ചാംപ്യന്സ് ലീഗില്നിന്ന് പുറത്ത്. യുവേഫ ചാമ്പ്യന്സ് ലീഗ് വിന്നേഴ്സ് മെഡല് അഞ്ച് തവണ കഴുത്തിലണിഞ്ഞ ഇതിഹാസ താരം ക്രിസ്റ്റ്യാനോ റൊണാള്ഡോക്ക് യുവെന്റസിനൊപ്പം യൂറോപ്പ് കീഴടക്കാന് ഇത്തവണയും സാധിച്ചില്ല. ഫ്രഞ്ച് ക്ലബ്ബ് ഒളിമ്പിക് ലിയോണിനോട് എവേ ഗോളില് പരാജയപ്പെട്ട യുവെന്റസ് ക്വാര്ട്ടര് കാണാതെ മടങ്ങി. അതോടെ, കോവിഡ് കാലത്ത് കാണികളില്ലാതെ നടക്കുന്ന ചാമ്പ്യന്സ് ലീഗിന്റെ ഗ്ലാമറിന് വീണ്ടും കോട്ടം തട്ടി. ഇതിഹാസ താരങ്ങളില് ലയണല് മെസി അവശേഷിക്കുന്നു.
ബാഴ്സലോണ ഇന്ന് നാപോളിയെ പ്രീക്വാര്ട്ടറിന്റെ രണ്ടാം ലെഗില് നേരിടുന്നത് ഭയവും ജാഗ്രതയും നിലനിര്ത്തിക്കൊണ്ടാണ്. മെസി ഭാരങ്ങള് ഒറ്റക്ക് ചുമലിലേറ്റുകയാണ്, ബാഴ്സ ആഭ്യന്തര പ്രശ്നങ്ങളുടെ കൂത്തമ്പലമായി മാറിയിരിക്കുന്നു. ആദ്യപാദം 11ന് സമനിലയായത് വഴി ബാഴ്സക്ക് എവേ ഗോളിന്റെ ആനുകൂല്യമുണ്ട്. എന്നാല്, കോച്ചും മെസിയും കളിക്കാരും തമ്മിലുള്ള അസ്വാരസ്യങ്ങള് ബാഴ്സയെ എവിടെ ചെന്നെത്തിക്കും എന്നറിയില്ല. മറ്റൊരു കളിയില് രണ്ടാം പാദ പ്രീക്വാര്ട്ടറിലും തോറ്റ് റൊണാള്ഡോയുയെ മുന് ക്ലബ് കൂടിയായ റയല് മഡ്രിഡും പുറത്ത്. വ്യത്യസ്ത മത്സരഫലങ്ങളെങ്കിലും ഇരുപാദങ്ങളിലുമായി 'ഒരേ ഫല'വുമായി ഇംഗ്ലിഷ് ക്ലബ് മാഞ്ചസ്റ്റര് സിറ്റിയും ഫ്രഞ്ച് ക്ലബ് ഒളിംപിക് ലയോണും ചാംപ്യന്സ് ലീഗ് ക്വാര്ട്ടറില് കടന്നു. കോവിഡ് വ്യാപനത്തിന്റെ പശ്ചാത്തലത്തില് ഒരു പാദമാക്കി ചുരുക്കിയ ക്വാര്ട്ടര് പോരാട്ടങ്ങള്ക്കായി ഇരു ടീമുകളും ഇനി പോര്ച്ചുഗല് തലസ്ഥാനമായ ലിസ്ബണിലേക്ക് പറക്കും. അവിടെ സിറ്റിക്ക് എതിരാളി ലയോണ് തന്നെ.
ചാമ്പ്യന്സ് ലീഗില് ലിയോണിനെതിരെ ഇരട്ട ഗോളുകള് നേടിയ ക്രിസ്റ്റിയാനോ യുവെന്റസിനായി സീസണില് 37 ഗോളുകള് നേടി ചരിത്രം സൃഷ്ടിച്ചു. ഒരു സീസണില് യുവെന്റസിനായി കൂടുതല് ഗോളുകള് നേടുന്ന താരമായി ക്രിസ്റ്റിയാനോ. 80 വര്ഷം പഴക്കമുള്ള റെക്കോര്ഡാണ് തകര്ന്നത്. 1933-34 സീസണില് ക്ലബ്ബ് ഇതിഹാസം ഫെലിസെ ബോറെല് നേടിയ 36 ഗോളുകളുടെ റെക്കോര്ഡാണ് കഴിഞ്ഞ രാത്രിയില് ക്രിസ്റ്റിയാനോ പഴങ്കഥയാക്കിയത്. യുവേഫ ചാമ്പ്യന്സ് ലീഗില് അഞ്ചാം ഗോള് നേടിയതോടെയാണ് ക്രിസ്റ്റിയാനോ യുവെയുടെ ചരിത്ര പുരുഷനായത്. ഇറ്റാലിയന് സീരി എ ലീഗില് 31 ഗോളുകളുമായി ടോപ് സ്കോറര് ചാര്ട്ടില് രണ്ടാംസ്ഥാനത്തെത്തിയ പോര്ച്ചുഗല് താരം ഇറ്റാലിയന് കപ്പില് രണ്ട് ഗോളുകള് നേടിയിരുന്നു.
മാഞ്ചസ്റ്റര് യുനൈറ്റഡ്, റയല് മാഡ്രിഡ്, യുവെന്റസ് എന്നിങ്ങനെ മൂന്ന് ക്ലബ്ബുകള്ക്കായി ചാമ്പ്യന്സ് ലീഗ് കളിച്ചപ്പോഴും ക്രിസ്റ്റിയാനോ ഫ്രഞ്ച് ക്ലബ്ബ് ലിയോണിനെതിരെ സ്കോര് ചെയ്തു. ഒരു ക്ലബ്ബിനെതിരെ വ്യത്യസ്ത മൂന്ന് ക്ലബ്ബുകള്ക്കൊപ്പം ഗോളടിച്ച മൂന്നാമത്തെ താരമായി ക്രിസ്റ്റ്യാനോ. യുവെന്റസിനെതിരെ മൂന്ന് ക്ലബ്ബുകള്ക്കൊപ്പം ഗോളടിച്ച ജോര്ഗ് ബട്, ബയേണ് മ്യൂണിക്കിനെതിരെ മൂന്ന് ക്ലബ്ബുകള്ക്കൊപ്പം ഗോളടിച്ച റുഡ് വാന് നിസ്റ്റല് റൂയി എന്നിവരാണ് മുന്ഗാമികള്.
https://www.facebook.com/Malayalivartha