ചൈനയിലെ നാൻജിങിൽ നടക്കുന്ന ലോക ബാഡ്മിന്‍റൺ ചാമ്പ്യൻഷിപ്പിൽ ഇന്ത്യയുടെ താരം പി.വി. സിന്ധു ഫൈനലിലേയ്ക്ക്. ജപ്പാന്റെ ലോക രണ്ടാം നമ്പർ താരം അകാനെ യമഗുച്ചിയെ നേരിട്ടുള്ള രണ്ട്​ ഗെയിമുകൾക്ക്​ പരാജയപ്പെടുത്തിയാണ് സിന്ധു ഫൈനൽ യോഗ്യത നേടിയത്.

ആദ്യ ഗെയിം സിന്ധു 21 -16 ന് സ്വന്തമാക്കി. രണ്ടാം ഗെയിം 24 – 22 ന് സ്വന്തമാക്കിയ സിന്ധു ഫൈനൽ ബർത്ത് ഉറപ്പിച്ചു. ചാമ്പ്യൻഷിപ്പിൽ അവശേഷിച്ച ഏക ഇന്ത്യൻ താരമായിരുന്നു സിന്ധു. രണ്ടു ഗെയിമുകളിലും പോയിൻറു നിലയിൽ പിന്നിൽ നിന്ന സിന്ധു ആവേശകരമായ കുതിപ്പോടു കൂടിയാണ്​ രണ്ടു ഗെയിമുകളിലും വിജയം കൈവരിച്ചത്​.

കലാശപ്പോരാട്ടത്തിൽ സ്പെയിന്‍റെ കരോലിന മാരിനാണ് സിന്ധുവിന്‍റെ എതിരാളി. ആദ്യ സെമിയിൽ ചൈനയുടെ ഹി ബിൻജിയോ സെമിയിൽ കീഴടക്കിയാണ് കരോലിന മാരിൻ ഫൈനലിൽ പ്രവേശിച്ചത്. ആദ്യ ഗെയിമിൽ പിന്നിട്ട് നിന്ന ശേഷമാണ് മാരിൻ ജയം നേടിയത്. സ്കോർ 13 – 21, 21 -16, 21 – 13.