ഇന്തോനേഷ്യയില്‍ വെച്ച്‌ നടക്കുന്ന പതിനെട്ടാമത് ഏഷ്യന്‍ ഗെയിംസിലെ വെങ്കല മെഡല്‍ കേരളത്തിന് സമര്‍പ്പിച്ച്‌ സീമ പൂനിയ. ഹരിയാനയുടെ ഡിസ്‌കസ് ത്രോ താരമായ സീമ പൂനിയ ഏഷ്യന്‍ ഗെയിംസില്‍ പോക്കറ്റ് മണിയായി ഐഒഎ നല്‍കിയ 700 ഡോളറും കേരളത്തിന് സംഭാവന നല്‍കും. ഒരു ലക്ഷം രൂപ വേറെയും ദുരിതാശ്വാസത്തിന് നല്‍കുമെന്നും സീമ പറഞ്ഞു. പ്രളയക്കെടുതിയില്‍ അകപ്പെട്ട കേരളത്തിനായി മറ്റു താരങ്ങളോടും സഹായം താരം അഭ്യര്‍ത്ഥിച്ചു. ഇന്ത്യയില്‍ തിരിച്ചെത്തിയ ഉടനെ കൂടുതല്‍ ദുരിതാശ്വസ പ്രവര്‍ത്തങ്ങളുമായി താന്‍ സഹകരിക്കുമെന്നും പൂനിയ കൂട്ടിച്ചെര്‍ത്തു.

2014 ഏഷ്യന്‍ ഗെയിംസിലെ സ്വര്‍ണ്ണ മെഡല്‍ ജേതാവായ സീമ പൂനിയയ്ക്ക് ജക്കാര്‍ത്തയില്‍ തിരിച്ചടി നേരിട്ടിരുന്നു. 62.26 മീറ്റര്‍ ദൂരം എറിഞ്ഞുവെങ്കിലും ചൈനീസ് താരങ്ങള്‍ക്ക് പിന്നില്‍ മൂന്നാം സ്ഥാനത്തെത്തുവാനെ സീമയ്ക്ക് ആയുള്ളു. 65.12 മീറ്റര്‍ ദൂരം എറിഞ്ഞ യാംഗ് ചെന്‍ ആണ് സ്വര്‍ണ്ണം നേടിയത്. ചൈനയുടെ തന്നെ ബിന്‍ ഫെംഗ് 64.25 മീറ്റര്‍ എറിഞ്ഞ് വെള്ളിയും സ്വന്തമാക്കി.