ഓസ്ട്രേലിയന്‍ ഓപ്പണ്‍ ടെന്നിസിന്റെ കലാശപ്പോരാട്ടത്തില്‍ സെര്‍ബിയന്‍ താരം നൊവാക് ജ്യോകോവിച്ചിന് ഏഴാം കിരീടത്തോടെ ലോക റെക്കാഡ‌്. ലോക രണ്ടാം നമ്ബര്‍ താരം സ്പെയിനിന്റെ റാഫേല്‍ നദാലിനെയാണ് തികച്ചും ഏകപക്ഷീയമെന്ന് തോന്നിയ മത്സരത്തില്‍ ജ്യോകോവിച്ച്‌ പരാജയപ്പെടുത്തിയത്. ആദ്യം മുതല്‍ കളത്തില്‍ വ്യക്തമായ ആധിപത്യം പുലര്‍ത്തിയ ജ്യോകോവിച്ച്‌, 6-3, 6-2, 6-3 എന്ന സ്കോറിനാണ് നദാലിനെ വീഴ്‌ത്തിയത്.

ജ്യോകോവിച്ചിന്റെ കരിയറിലെ ഏഴാം ഓസ്ട്രേലിയന്‍ ഓപ്പണ്‍ കിരീടമാണിത്. ആറു വീതം കിരീടങ്ങള്‍ നേടിയിട്ടുള്ള ഇതിഹാസ താരങ്ങളായ റോയ് എമേഴ്സണ്‍, റോജര്‍ ഫെഡറര്‍ എന്നിവരെ മറികടന്ന് ജ്യോകോവിച്ച്‌ മെല്‍ബണ്‍ പാര്‍ക്കില്‍ പുതിയ ചരിത്രവുമെഴുതി. അതു മാത്രമല്ല, കരിയറില്‍ 15ആം ഗ്രാന്‍സ്ലാം കിരീടമെന്ന നേട്ടവും അദ്ദേഹം സ്വന്തമാക്കി. ഇക്കാര്യത്തില്‍ അമേരിക്കയുടെ പീറ്റ് സാംപ്രസിനെ മറികടന്ന് സെര്‍ബിയന്‍ താരം മൂന്നാമതെത്തി. 20 കിരീടങ്ങളുള്ള റോജര്‍ ഫെഡറര്‍, 16 കിരീടമുള്ള നദാല്‍ എന്നിവര്‍ മാത്രമാണ് ഇനി ജ്യോകോവിച്ചിന്റെ മുന്നിലുള്ളത്.