സെര്‍ബിയന്‍ ടെന്നീസ് താരം അന ഇവാനോവിച്ച് വിരമിച്ചു. 29-ാം വയസിലാണ് ലോക മുന്‍ ഒന്നാം നമ്പര്‍ താരമായ ഇവാനോവിച്ച് വിരമിക്കുന്നത്. ഫേസ്ബുക്കിലൂടെയാണ് താരം വാര്‍ത്ത പുറത്തുവിട്ടത്. ദീര്‍ഘകാലമായി അലട്ടുന്ന പരിക്കിനെ തുടര്‍ന്നാണ് വിരമിക്കലെന്ന് താരത്തോട് അടുത്ത വൃത്തങ്ങള്‍ സൂചന നല്‍കി.

2008 ഫ്രഞ്ച് ഓപ്പണ്‍ ജേതാവ് കൂടിയാണ് ഇവാനോവിച്ച്. ഇതിനുപിന്നാലെയാണ് അന ഒന്നാം റാങ്കിലെത്തിയത്. പിന്നീട് റാങ്കിംഗില്‍ അന പിന്നാക്കം പോയി. എന്നാല്‍ 2014ല്‍ ആദ്യ അഞ്ചിലേക്ക് അന തിരിച്ചുവന്നു. തൊട്ടടുത്ത വര്‍ഷം ഫ്രഞ്ച് ഓപ്പണ്‍ സെമിയില്‍ എത്താനും കഴിഞ്ഞു. നിലവില്‍ 63-ാം റാങ്കിലാണ് അന. ജര്‍മന്‍ ഫുട്‌ബോള്‍ താരം ബാസ്റ്റിന്‍ ഷെയ്ന്‍സ്‌റ്റൈഗറുമായി അനയുടെ വിവാഹം ഈ വര്‍ഷം നടത്തിയിരുന്നു.