ഇന്ത്യന്‍ ടീമില്‍ നിന്ന് പി.യു.ചിത്രയെ ഒഴിവാക്കിയ സംഭവത്തില്‍ ഇടപെടാനാകില്ലെന്ന് കേന്ദ്ര സര്‍ക്കാര്‍
ലോക അത്‌ലറ്റിക്‌സ് ചാമ്പ്യന്‍ഷിപ്പിനുള്ള ഇന്ത്യന്‍ ടീമില്‍ നിന്ന് പി.യു.ചിത്രയെ ഒഴിവാക്കിയ സംഭവത്തില്‍ ഇടപെടാനാകില്ലെന്ന് കേന്ദ്ര സര്‍ക്കാര്‍. അത്‌ലറ്റിക്‌സ് ഫെഡറേഷന്‍ സ്വതന്ത്രമായി പ്രവര്‍ത്തിക്കുന്ന സംഘടനയാണെന്നും അതിന്റെ പ്രവര്‍ത്തനത്തിലിടപെടാന്‍ കേന്ദ്ര സര്‍ക്കാരിന് അധികാരമില്ലെന്നും സര്‍ക്കാര്‍ ഹൈക്കോടതില്‍ സമര്‍പ്പിച്ച സത്യവാങ്മൂലത്തില്‍ പറയുന്നു.
ലോക അത്‌ലറ്റിക്‌സ് ചാമ്പ്യന്‍ഷിപ്പിനുള്ള ഇന്ത്യന്‍ ടീമില്‍ നിന്ന് ഒഴിവാക്കിയതിനെ ചോദ്യം ചെയ്ത് ചിത്ര സമര്‍പ്പിച്ച ഹര്‍ജിയിന്മേലുള്ള വാദത്തിലാണ് കേന്ദ്രം നിലപാടറിയിച്ചത്.
ഇന്നലെ കേസ് പരിഗണിച്ച കോടതി കേന്ദ്ര സര്‍ക്കാരിനോട് ഈ വിഷയത്തില്‍ വിശദീകരണം ആവശ്യപ്പെട്ടിരുന്നു.ചാമ്പ്യന്‍ഷിപ്പിന് പോകുന്ന ഇന്ത്യന്‍ കായിക താരങ്ങളുടെ യാത്രാ ചിലവ് ആരാണ് വഹിക്കുന്നതെന്നും ഇന്ത്യന്‍ അത്‌ലറ്റിക്‌സ് ഫെഡറേഷനെ നിയന്ത്രിക്കുന്നതാരാണെന്നും കേന്ദ്ര സര്‍ക്കാരിന് കായിക സംഘടനകളുടെ പ്രവര്‍ത്തനത്തില്‍ ഇടപെടാന്‍ സാധിക്കുമോയെന്നും കേന്ദ്രം വ്യക്തമാക്കണമെന്ന് കോടതി ആവശ്യപ്പെട്ടിരുന്നു. കേസില്‍ വാദം തുടരുകയാണ്.
https://www.facebook.com/Malayalivartha
