രാജ്യത്തെ മുന്‍നിര താരങ്ങളുടെ സ്മാഷുകള്‍കൊണ്ട് നിറയാന്‍ വി.കെ. കൃഷ്ണമേനോന്‍ ഇന്‍ഡോര്‍ സ്‌റ്റേഡിയവും സ്വപ്ന നഗരിയിലെ കാലിക്കറ്റ് ട്രേഡ് സെന്ററും ഒരുങ്ങി. 66ാമത് ദേശീയ സീനിയര്‍ പുരുഷ, വനിത വോളിബാള്‍ ചാമ്പ്യന്‍ഷിപ് ചൊവ്വാഴ്ച വൈകീട്ട് ഉദ്ഘാടനം ചെയ്യും. എട്ട് ദിവസം നീളുന്ന വോളിയുത്സവത്തിലെ മത്സരങ്ങള്‍ക്ക് ബുധനാഴ്ചയാണ് തുടക്കമാവുക. ഉദ്ഘാടന സമ്മേളനത്തിന് മുന്നോടിയായി ഇന്‍ഡോര്‍ സ്‌റ്റേഡിയത്തില്‍നിന്ന് സ്വപ്നനഗരിയിലേക്ക് ദീപശിഖ പ്രയാണത്തോടൊപ്പം ഘോഷയാത്രയും നടക്കും.

സ്വപ്നനഗരിയിലെ കാലിക്കറ്റ് ട്രേഡ് സന്റെറില്‍ താല്‍ക്കാലിക ഗാലറിയുടെ നിര്‍മാണം പൂര്‍ത്തിയായി. പുരുഷ വിഭാഗത്തില്‍ 28ഉം വനിതകളില്‍ 26ഉം ടീമുകളും ചാമ്പ്യന്‍ഷിപ്പില്‍ പങ്കെടുക്കും. നിലവിലെ ജേതാക്കളായ കേരളത്തിന്റെയും റെയില്‍വേ, തമിഴ്‌നാട്, ഉത്തരാഖണ്ഡ്, പഞ്ചാബ്, കര്‍ണാടക, സര്‍വിസസ്, പശ്ചിമ ബംഗാള്‍, ആന്ധ്രപ്രദേശ് തുടങ്ങിയ ടീമുകളുടെ മത്സരങ്ങള്‍ക്ക് സ്വപ്നനഗരിയാണ് വേദി. പ്രാഥമിക ഗ്രൂപ് മത്സരങ്ങളില്‍ ബുധനാഴ്ച വൈകീട്ട് 4.30ന് കേരളത്തിന്റെ പുരുഷ ടീം രാജസ്ഥാനെയും വൈകീട്ട് ഏഴിന് വനിതകള്‍ തെലങ്കാനയെയും നേരിടും.