ചരിത്ര നേട്ടവുമായി ഓണ്ലൈന് ഗെയിമിംഗ് വ്യവസായം; വരുമാനത്തിലധികവും മൊബൈല് ഫോണ് വഴി
ഡിജിറ്റല് സാങ്കേതികവിദ്യ വികസിച്ചതോടെ ഓണ്ലൈന് ഗെയിമുകള് വഴി കോടികളുടെ വരുമാനമാണ് രാജ്യത്തിന് ലഭിക്കുന്നത്. 2014ല് ഗെയിമിംഗ് വ്യവസായത്തില് നിന്നുള്ള വരുമാനം 2000 കോടി രൂപയായിരുന്നുവെങ്കില് 2018 ആകുമ്പോഴേക്കും അത് ഇരട്ടിയിലേറെ വര്ദ്ധിച്ച് 4,400 കോടി രൂപയായി. രാജ്യത്ത് ഓണ്ലൈന് ഗെയിമുകളുടെ വളര്ച്ചയില് അടുത്ത ഏതാനും വര്ഷങ്ങള്ക്കുള്ളില് ഒരു കുതിച്ചുചാട്ടം തന്നെയുണ്ടാകുമെന്ന് കണക്കുകൂട്ടല്. 2023 ആകുമ്പോഴേക്കും ഇത് 11,900 കോടി രൂപയായി ഉയരുമെന്നാണ് കണക്കാക്കുന്നത്.
ആക്ഷന് ഗെയിമുകള്, അഡ്വഞ്ചര് ഗെയിമുകള്, പസ്സ്ലുകള് എന്നിവയ്ക്കാണ് രാജ്യത്ത് പ്രചാരം കൂടുതല്. ഫാന്റസി സ്പോര്ട്സും രാജ്യത്ത് വളര്ച്ചയുടെ പാതയിലാണ്. രാജ്യത്തെ ഫാന്റസ് സ്പോര്ട്സ് ഓപ്പറേറ്റര്മാരുടെ എണ്ണം 2010ല് 10 ആയിരുന്നത് 2018 ആയപ്പോഴേക്കും 70 ആയി ഉയര്ന്നു. അതേസമയം ഈ ഗെയിമുകള് കളിക്കുന്നവരുടെ എണ്ണം 2016 ജൂണില് 20 ലക്ഷമായിരുന്നത് 2019 ഫെബ്രുവരിയില് അഞ്ച് കോടിയായാണ് വര്ദ്ധിച്ചത്.
ഫാന്റസി സ്പോര്ട്സ് ഗെയിമുകള് കളിക്കുന്നവരില് ഏറെ പേര്ക്കും ഇഷ്ടം ക്രിക്കറ്റിനോടാണ്. സര്വ്വേയില് പങ്കെടുത്ത 71 ശതമാനം പേരും ഫാന്റസ് ക്രിക്കറ്റാണ് കളിക്കുന്നത്. എന്നാല് ഫുട്ബോള് ഗെയിമുകള് ഇഷ്ടപ്പെടുന്നവരും കുറവല്ല. 54 ശതമാനമാണ് ഫുട്ബോള് കളിക്കുന്നവരുടെ നിരക്ക്. ഈ രീതിയില് പോയാല് 2020 ആകുമ്പോഴേക്കും ഈ ഗെയിം കളിക്കുന്നവരുടെ എണ്ണം 10 കോടി കവിയുമെന്നാണ് വിലയിരുത്തപ്പെടുന്നത്.
ഈ മേഖലയില് നിന്നുള്ള വരുമാനത്തിന്റെ 85 ശതമാനവും മൊബൈല് ഫോണ് വഴിയുള്ള ഗെയിമുകളാണ് നേടിത്തരുന്നത്. സ്മാര്ട്ട് ഫോണുകളുടെ വിലക്കുറവ്, ഇന്റര്നെറ്റിന്റെ വ്യാപനം, ഡാറ്റാ താരിഫിലുണ്ടായ വന് കുറവ് എന്നിവയാണ് ഓണ്ലൈന് ഗെയിമുകളുടെ വളര്ച്ചയ്ക്ക് പ്രധാന കാരണം. ഇതുമായി ബന്ധപ്പെട്ട് നടത്തിയ സര്വേയില് പങ്കെടുത്തവരില് 74 ശമതാനം പേരും ആഴ്ചയില് ഒന്നു മുതല് മൂന്നു വരെ തവണ ഗെയിം കളിക്കുന്നവരാണ്. 20 ശതമാനം പേര് ആഴ്ചയില് അഞ്ചിലേറെ തവണ ഗെയിം കളിക്കുന്നവരാണ്. അതേസമയം, രാജ്യത്തെ വന് നഗരങ്ങളെ അപേക്ഷിച്ച് ചെറു പട്ടണങ്ങളിലാണ് ഗെയിമിന്റെ ആരാധകരില് ഏറ്റവും അധികമുള്ളത്.
https://www.facebook.com/Malayalivartha