അസംഘടിത മേഖലയിലെ തൊഴിലാളികള്ക്ക് പെന്ഷന്; 60 കഴിഞ്ഞവര്ക്ക് 3000 രൂപ; നിങ്ങള്ക്കും പദ്ധതിയില് അംഗമാകാം
15,000 രൂപവരെ മാസവരുമാനമുള്ള അസംഘടിത മേഖലയിലെ തൊഴിലാളികള്ക്ക് പെന്ഷന് നല്കുന്ന പദ്ധതി നടപ്പിലാക്കാനുള്ള ശ്രമത്തിലാണ് കേന്ദ്ര സര്ക്കാര്. അസംഘടിത മേഖലയിലെ തൊഴിലാളികളെ ലക്ഷ്യം വച്ചുള്ള പദ്ധതിയാണ് പ്രധാനമന്ത്രി ശ്രാം യോഗി മാന് ധന് യോജന (പി എം എസ് വൈ എം). അഞ്ചുവര്ഷം കൊണ്ട് അസംഘടിതമേഖലയിലെ 10 കോടി പേര്ക്ക് പദ്ധതിയുടെ ആനുകൂല്യം ലഭ്യമാക്കുകയാണ് കേന്ദ്ര സര്ക്കാരിന്റെ ലക്ഷ്യം.
പ്രതിമാസ വരുമാനം 15,000 രൂപയോ അതില് താഴെയോ ഉള്ള 18 നും 40 നും ഇടയില് പ്രായമുള്ള അസംഘടിത മേഖലയിലെ തൊഴിലാളികള്ക്ക് ഈ പദ്ധതിയില് അംഗമാകാം. ഇതില് അംഗങ്ങളാകുന്നവര് ഇ പി എഫ്/ഇ എസ് ഐ സി/എന് പി എസ് അംഗങ്ങളോ നികുതിദായകരോ ആയിരിക്കരുത്.
പദ്ധതി പ്രകാരം ഒരാള്ക്ക് 60 വയസ്സ് കഴിയുമ്പോള് മുതലാണ് പെന്ഷന് ലഭിച്ചു തുടങ്ങുക. പ്രതിമാസം 3000 രൂപയാണ് പെഷന് ലഭിക്കുക. കാലാവധി പൂര്ത്തിയാകും മുമ്പ് വരിക്കാരന് മരിച്ചാല് ജീവിത പങ്കാളിക്ക് കുടുംബ പെന്ഷന് ലഭിക്കും.
29 വയസ്സുമുതല് പദ്ധതിയില് ചേരുന്ന അസംഘടിത മേഖലയിലുള്ളവര് 60 വയസ്സുവരെ മാസം 100 രൂപയും 18 വയസ്സുമുതല് ചേരുന്നവര് 55 രൂപയും പ്രീമിയം അടക്കണം. തത്തുല്യ തുക കേന്ദ്ര സര്ക്കാരും പെന്ഷന് അക്കൗണ്ടിലേക്ക് അടയ്ക്കും. പദ്ധതിയില് ചേര്ന്ന് 10 വര്ഷത്തിന് മുമ്പാണ് പിന്മാറുന്നതെങ്കില് അടച്ച തുക മാത്രമാണ് തിരിച്ചു കിട്ടുക. എന്നാല് പത്തുവര്ഷം കഴിഞ്ഞോ അപേക്ഷകന് 60 വയസ്സ് ആകുന്നതിന് മുമ്പോ പിന്മാറുകയാണെങ്കില് നിക്ഷേപിക്കുന്ന തുകയും പലിശയും തിരികെ ലഭിക്കും.
ഇതിനായി രാജ്യത്തെമ്പാടുമുള്ള കോമണ് സര്വീസ് സെന്ററുകള് വഴി തങ്ങളുടെ ആധാര് കാര്ഡ്, ബാങ്ക് അക്കൗണ്ട് വിവരങ്ങള് എന്നിവ നല്കി സ്വയം സാക്ഷ്യപ്പെടുത്തലിലൂടെ ഈ പദ്ധതിയില് അംഗങ്ങളാകാം.
https://www.facebook.com/Malayalivartha