ഓള്‍ ഇന്ത്യ കൗണ്‍സില്‍ ഫോര്‍ ടെക്നിക്കല്‍ എജുക്കേഷന്‍ (എ.ഐ.സി.ടി.ഇ) അംഗീകാരമുള്ള മാനേജ്മെന്‍റ് കോഴ്സുകളിലെ പ്രവേശത്തിന് എ.ഐ.സി.ടി.ഇ നടത്തുന്ന ദേശീയതല പരീക്ഷയായ കോമണ്‍ മാനേജ്മെന്‍റ് അഡ്മിഷന്‍ ടെസ്റ്റിന് (സിമാറ്റ്) ഇപ്പോള്‍ അപേക്ഷിക്കാം. അപേക്ഷാര്‍ഥികള്‍ക്ക് സിമാറ്റ് പരീക്ഷക്ക് രണ്ട് അവസരങ്ങള്‍ നല്‍കും. സെപ്റ്റംബറിലാണ് ആദ്യ അവസരം. അടുത്ത വര്‍ഷം ഫെബ്രുവരിയിലാണ് രണ്ടാമത്തെ പരീക്ഷ. രണ്ട് പരീക്ഷകളിലെയും മികച്ച സ്കോറാണ് 2015-16 വര്‍ഷത്തെ പ്രവേശത്തിന് പരിഗണിക്കുക. ആദ്യ പരീക്ഷക്കുള്ള അപേക്ഷയാണ് ഇപ്പോള്‍ ക്ഷണിച്ചിരിക്കുന്നത്. പ്രധാന തീയതികള്‍: ഓണ്‍ലൈന്‍ രജിസ്ട്രേഷനുള്ള അവസാന തീയതി ആഗസ്റ്റ് 25. ഹാള്‍ടിക്കറ്റ് പ്രിന്‍റൗട്ട് എടുക്കല്‍-സെപ്റ്റംബര്‍ 12 മുതല്‍. കമ്പ്യൂട്ടര്‍ അധിഷ്ഠിത പരീക്ഷ: സെപ്റ്റംബര്‍ 25 മുതല്‍ 29 വരെ. ഫലപ്രഖ്യാപനം: ഒക്ടോബര്‍ 30. സ്കോര്‍ കാര്‍ഡ് പ്രിന്‍റൗട്ട് എടുക്കല്‍-ഒക്ടോബര്‍ 30 മുതല്‍ നവംബര്‍ 30 വരെ യോഗ്യത: ഏതെങ്കിലും വിഷയത്തില്‍ ബിരുദം. അവസാന വര്‍ഷം പഠിക്കുന്നവര്‍ക്കും അപേക്ഷിക്കാം. 2015ലെ പ്രവേശ നടപടികള്‍ ആരംഭിക്കുന്നതിനുമുമ്പ് ഇവരുടെ ഫലം വന്നിരിക്കണം. രജിസ്ട്രേഷന്‍: www.aicte-cmat.in എന്ന വെബ്സൈറ്റ് വഴിയാണ് രജിസ്ട്രേഷന്‍ നടത്തേണ്ടത്.

പരീക്ഷ എഴുതുന്നതിന് മൂന്ന് നഗരങ്ങളും മൂന്ന് തീയതികളും ചോയ്സ് നല്‍കാം. പ്രവേശ നടപടികള്‍: വിശദമായ മെറിറ്റ് ലിസ്റ്റ് സംസ്ഥാന സര്‍ക്കാറുകള്‍ക്ക് നല്‍കും. ഈ ലിസ്റ്റ് ഉപയോഗിച്ചായിരിക്കും എ.ഐ.സി.ടി.ഇ അംഗീകാരമുള്ള സ്ഥാപനങ്ങളിലെയും യൂനിവേഴ്സിറ്റി വകുപ്പുകളിലെയും പ്രവേശം. പരീക്ഷാ ഫീസ്: ജനറല്‍, ഒ.ബി.സി വിഭാഗത്തിന് 1400 രൂപ. എസ്.സി/എസ്.ടി/ശാരീരിക വെല്ലുവിളി നേരിടുന്നവര്‍ എന്നിവര്‍ക്ക് 700 രൂപ. ബാങ്ക് ചാര്‍ജ് പുറമെ നല്‍കണം. ഫീസടക്കേണ്ട വിധം: www.aicte-cmat.in എന്ന വെബ്സൈറ്റ് വഴി നെറ്റ് ബാങ്കിങ്/ക്രെഡിറ്റ്/ഡെബിറ്റ് കാര്‍ഡ് രീതിയില്‍ ഫീസടക്കാം. അല്ളെങ്കില്‍, ഓണ്‍ലൈനായി ലഭിക്കുന്ന ചലാന്‍ ഉപയോഗിച്ച് എസ്.ബി.ഐയുടെ ഏതെങ്കിലും ശാഖയില്‍ നേരിട്ടും ഫീസടക്കാം. പരീക്ഷാ കേന്ദ്രങ്ങള്‍: കോഴിക്കോട്, കൊച്ചി, തിരുവനന്തപുരം എന്നിവയാണ് കേരളത്തിലെ പരീക്ഷാ കേന്ദ്രങ്ങള്‍. ഇതുള്‍പ്പെടെ 62 പരീക്ഷാ കേന്ദ്രങ്ങളാണ് രാജ്യത്തുള്ളത്.