ഡ്രൈവിങ് അറിയാവുന്നവർക്ക് കാനഡയിൽ ജോലി ചെയ്യാൻ അവസരം... ട്രക്ക് ഡ്രൈവർമാർക്കായി രാജ്യത്തെ എക്കണോമിക് ഇമിഗ്രേഷൻ പ്രോഗ്രാമിന് കീഴിൽ നിരവധി അവസരങ്ങളാണ് വഴി തുറന്നിരിക്കുന്നത്. വിശദമായി അറിയാം. സർക്കാർ വെബ്സൈറ്റായ ജോബ് ബാങ്കിൽ ട്രക്ക് ഡ്രൈവർമാരുടെ 882 ഒഴിവുകളാണ് റിപ്പോർട്ട് ചെയ്തിരിക്കുന്നത്. ഒന്റാറിയോ പ്രവിശ്യയിലാണ് ഏറ്റവും കൂടുതൽ അവസരങ്ങൾ ഉള്ളത്.

മണിക്കൂറിന് 1,472 രൂപയാണ് വേതനം. ഇത് ചില സമയങ്ങളിൽ 2,147 വരെ ഉയർന്നേക്കും. അതായത് വാർഷിക വരുമാനം 38,69,566 ലക്ഷം വരെ ലഭിച്ചേക്കുമെന്ന് സാരം. അതുമാത്രമോ കിലോമീറ്ററുകൾ കൂടുന്നതിന് അനുസരിച്ച് ബോണസ് വേറേയും. പ്രമുഖ കമ്പനികളിലെ ട്രക്ക് ഡ്രൈവർമാരിൽ ഒരു വലിയ വിഭാഗം വിരമിക്കാനിരിക്കുന്ന ഈ സാഹചര്യത്തിൽ യോഗ്യതയുള്ള വിദേശ തൊഴിലാളികൾക്ക് വർക്ക് പെർമിറ്റും സ്ഥിര താമസവും വേഗത്തിൽ നൽകാനുള്ള നടപടികൾ സർക്കാർ ആരംഭിച്ചിട്ടുണ്ട്.

നാല് വർഷം മുൻപേ ഒന്റാറിയോ ഇമിഗ്രന്റ് നോമിനി പ്രോഗ്രാമിൽ, ജോബ് ഓഫര് ഇൻ ഡിമാന്ഡ് സ്കിൽ സ്ട്രീമിന് കീഴിൽ അന്താരാഷ്ട്ര തലത്തിൽ പരിശീലനം നേടിയ ട്രക്ക് ഡ്രൈവർമാരെ ഇത്തരത്തിൽ നിയമിക്കാൻ കമ്പനികളെ സഹായിക്കുന്നതിൽ പ്രൊവിൻസ് നടപടികൾ സ്വീകരിച്ചിരുന്നു. ജോലി ലഭിക്കുന്നവർക്ക് കനേഡിയൻ പിആർ ലഭിക്കാനുള്ള സാധ്യതയും കൂടുതലായിരുന്നു.

ഒന്റാറിയോ ഗവൺമെന്റ് നാമനിർദ്ദേശം ചെയ്യുന്നതിന് ഓൺലൈനായി അപേക്ഷിക്കുന്നതിന് മുമ്പായി അപേക്ഷകർ ആദ്യം ഒഐഎൻപിയുടെ താൽപ്പര്യ പ്രകടന (EOI) സംവിധാനത്തിൽ (എക്സ്പ്രഷൻ ഓഫ് ഇന്ററ്റ്) രജിസ്റ്റർ ചെയ്യുകയും അപേക്ഷിക്കാനുള്ള ക്ഷണം (ITA) നേടുകയും വേണം. ഇത് പൂർത്തീകരിച്ചാൽ അടുത്ത ഘട്ടം ഇമിഗ്രേഷനാണ്. റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC)യാണ് ആർക്ക് പിആർ നൽകണമെന്നത് സംബന്ധിച്ച് അന്തിമ തീരുമാനം എടുക്കുക.

ട്രക്ക് ഡ്രൈവർ ജോലികൾ ഉൾപ്പെടെ വിദഗ്ധരായ അഭയാർത്ഥികളെയും മറ്റ് നാടുകടത്തപ്പെട്ട വ്യക്തികളെയും നിയമിക്കാൻ തൊഴിലുടമകളെ അനുവദിക്കുന്ന ഇക്കണോമിക് മൊബിലിറ്റി പാത്ത്‌വേസ് പൈലറ്റ് (EMPP) പദ്ധതി നടപ്പാക്കുന്ന ഓസ്ട്രേലിയയിലെ 9 പ്രവിശ്യകളിൽ ഒന്ന് കൂടിയാണ് ഒന്റാറിയോ. വിദഗ്ദരായ അഭയാർത്ഥികൾക്ക് മികച്ച ജോലി കണ്ടെത്തുന്നതിനും കൂടാതെ തുടക്കക്കാർക്ക് തങ്ങളുടെ കരിയർ കെട്ടുപടുക്കാനും അവസരങ്ങൾ ഒരുക്കുന്ന നാടാണ് കാനഡയെന്ന് ഇമിഗ്രേഷൻ മന്ത്രി സീൻ ഫ്രസർ പറഞ്ഞു.

തൊഴിൽ ക്ഷാമം പരിഹരിക്കുന്നതിനും അഭയാർത്ഥികൾക്ക് സുരക്ഷിത ജീവിതം ഉറപ്പാക്കാനും സഹായിക്കുന്ന നൂതനമായ ഇമിഗ്രേഷൻ നടപടികൾ രാജ്യം കൂടുതൽ വിപുലമാക്കുമെന്നും അദ്ദേഹം പറഞ്ഞു. അഭയാർത്ഥികളല്ലാത്ത വിദേശ പൗരന്മാർക്ക് ഫെഡറൽ, എക്സ്പ്രസ് എൻട്രി ഫെഡറൽ സ്കിൽഡ് വർക്കർ (FSW) പ്രോഗ്രാമിലൂടെ ട്രക്ക് ഡ്രൈവർമാരായി ഒന്റാറിയോയിലേക്ക് കുടിയേറാവുന്നതാണ്.