കുവൈത്തിൽ ആരോഗ്യമേഖലയിൽ കൂടുതൽ വിദേശികളെ ഉൾപ്പെടുത്താൻ ഒരുങ്ങി മന്ത്രാലയം. പ്രധാന ആശുപത്രികളുടെ വിപുലീകരണവും രാജ്യത്തെ വർദ്ധിച്ച മെഡിക്കൽ സേവനങ്ങളിലെ ആവശ്യകതയും കണക്കിലെടുത്താണ് കൂടുതൽ വിദേശികളെ റിക്രൂട്ട് ചെയ്യന്നത്. കുവൈത്തിൽ കൂടുതൽ വിദേശ ആരോഗ്യ ജീവനക്കാരെ എത്തിക്കുന്നതിന്റെ ഭാഗമായി പ്രത്യേക റിക്രൂട്ട്‌മെന്റ് നടത്തും.ഡോക്ടർമാർ, നഴ്‌സുമാർ എന്നിവരെയാണ് റിക്രൂട്ട് ചെയ്യുന്നത് ..നിലവിൽ ആരോഗ്യ മന്ത്രാലയത്തിലെ മൊത്തം ജീവനക്കാരിൽ പകുതിയിലേറെയും വിദേശികളാണ്.
നേരത്തെ സമ്പൂർണ സ്വദേശിവൽക്കരണം ലക്ഷ്യമിട്ട് സിവിൽ സർവീസ് കമ്മീഷൻ വിദേശി നിയമനത്തിനു വിലക്കേർപ്പെടുത്തിയിരുന്നു. എന്നാൽ യോഗ്യരായ വേണ്ടത്ര സ്വദേശികളെ ലഭ്യമല്ലാത്തത് കാരണം തീരുമാനം മരവിപ്പിക്കുകയായിരുന്നു.

കേരളസർക്കാർ സ്ഥാപനമായ ഓവർസീസ് ഡെവലപ്‌മെന്റ് ആൻഡ് എംപ്ലോയ്‌മെന്റ് പ്രൊമോഷൻ കൺസൽട്ടന്റ് (ഒഡേപെക്) മുഖേന കുവൈത്ത്‌ ആരോഗ്യമേഖലയിലേക്ക് നിയമിക്കുന്നതിന് ഡോക്ടർമാരിൽനിന്ന് അപേക്ഷ ക്ഷണിച്ചു. ഫിസിഷ്യൻ, കൺസൽട്ടന്റ്, സ്പെഷ്യലിസ്റ്റ്, സീനിയർ രജിസ്ട്രാർ, രജിസ്ട്രാർ തസ്തികകളിലാണ് നിയമനം.

ഉദ്ദേശം 100 ഒഴിവുണ്ട്. എം.ബി.ബി.എസ്., എം.ഡി., പിഎച്ച്.ഡി. തുടങ്ങിയ യോഗ്യതയുള്ളവർക്കാണ് അവസരം. ആറുമുതൽ 15 വരെ വർഷം പ്രവൃത്തിപരിചയം നിർബന്ധം. പ്രായം 55 വയസ്സിൽ താഴെ.

കുവൈത്തിലെ സ്വകാര്യമേഖലയിൽ കൂടുതൽ ആരോഗ്യസ്ഥാപനങ്ങൾക്ക് അനുമതി ആരോഗ്യമന്ത്രാലയം നൽകിയിട്ടുണ്ട് . ആശുപത്രികൾ, ക്ളിനിക്കുകൾ, ഹെൽത്ത് സെന്ററുകൾ എന്നിവയ്ക്കായിഅന്ന് അനുമതി . സ്വകാര്യമേഖലയിൽ മലയാളികൾ അടക്കമുള്ളവർക്ക് പ്രതീക്ഷ നൽകുന്ന തീരുമാനമാണിത്

ശമ്പളത്തിന്‌ പുറമേ താമസസൗകര്യം, വിസ, എയർ ടിക്കറ്റ് എന്നിവ തികച്ചും സൗജന്യമായിരിക്കും. ബയോഡേറ്റ, പാസ്‌പോർട്ട്, പ്രവൃത്തിപരിചയം എന്നിവയുടെ പകർപ്പ് സഹിതം ജൂൺ 25-നുമുൻപായി kuwait@odepc.in എന്ന ഇ-മെയിൽ വിലാസത്തിൽ അപേക്ഷിക്കണം.

വിവരങ്ങൾക്ക്: www.odepc.kerala.in | 0471-2329440/41/42/43/45, 7736496574

ഇതേ സമയം കുവൈത്തിലെ കോഓപ്പറേറ്റീവ് സൊസൈറ്റികളിൽ ജോലി ചെയ്യുന്ന മലയാളികൾ ഉൾപ്പെടെ 150 വിദേശികൾക്ക് ജൂലൈയിൽ തൊഴിൽ നഷ്ടമാകും. സീനിയർ സൂപ്പർവൈസർ, സൂപ്പർവൈസർ തസ്തികകളിൽ സ്വദേശികളെ നിയമിക്കാൻ തീരുമാനിച്ചതിനെ തുടർന്നാണിത്.

ഭാവിയിൽ മറ്റു തസ്തികകളിലേക്കും സ്വദേശിവൽക്കരണം വ്യാപിപ്പിക്കാനാണ് പദ്ധതി. സാമൂഹിക കാര്യ മന്ത്രാലയം, പബ്ലിക് അതോറിറ്റി ഫോർ മാൻപവർ എന്നിവയുമായി സഹകരിച്ചാണ് പദ്ധതി നടപ്പാക്കുന്നത്.വിദേശ തൊഴിലാളികൾക്ക് പകരം വിവിധ മേഖലകളിൽ യോഗ്യതയുള്ള കുവൈത്ത് പൗരന്മാരെ നിയമിക്കുന്ന പദ്ധതിയുമായി മുന്നോട്ടുപോകുമെന്ന് അധികൃതർ അറിയിച്ചു. പൗരന്മാർക്ക് കൂടുതൽ തൊഴിലവസരങ്ങൾ സൃഷ്ടിക്കുക, പ്രവാസി തൊഴിലാളികളെ ആശ്രയിക്കുന്നത് കുറയ്ക്കുക, പ്രാദേശിക തൊഴിലാളികളുടെ മത്സരശേഷി വർധിപ്പിക്കുക എന്നിവയാണ് ലക്ഷ്യം.