റയിൽവേയുടെ ഗ്രൂപ്പ് ഡി പരീക്ഷ മലയാളത്തിൽ എഴുതാമെന്നു റിപ്പോർട്ടുകൾ. മലയാള ഭാഷയെ ഒഴിവാക്കിയുള്ള നടപടിയാണ് റെയിൽവേ പിൻവലിച്ചത്. ഓൺലൈനിലൂടെ അപേക്ഷിക്കുമ്പോൾ മലയാള ഭാഷ കൂടി തിരഞ്ഞെടുക്കാവുന്ന വിധത്തിൽ വെബ്സൈറ്റ് പരിഷ്കരിക്കുകയായിരുന്നു. തിങ്കളാഴ്ച രാവിലെ പത്തു മണി വരെ മലയാള ഭാഷ തിരഞ്ഞെടുക്കാനാവാതെ അപേക്ഷ സമര്‍പ്പിച്ചവര്‍ക്കു തിരുത്തുന്നതിനു സംവിധാനമൊരുക്കിയിട്ടുണ്ട്.

ഇന്ത്യന്‍ റെയില്‍വെയുടെ 'ഗ്രൂപ്പ് ഡി' തസ്തികകളിലേക്കുളള പരീക്ഷയ്ക്ക് മലയാളം ഒഴിവാക്കിയ നടപടി തിരുണമെന്നാവശ്യപ്പെട്ട് മുഖ്യമന്ത്രി പിണറായി വിജയന്‍ റെയില്‍വെ മന്ത്രി പിയൂഷ് ഗോയലിന് കത്തയച്ചതിന്റെ പിന്നാലെയാണ് ഇത്തരത്തിലൊരു മാറ്റം.

റെയില്‍വെ ഗ്രൂപ്പ് ഡി തസ്തികയിലേക്കുള്ള റിക്രൂട്ട്മെന്റ് പരീക്ഷയില്‍ പ്രാദേശിക ഭാഷകളില്‍ മലയാളത്തെ മാത്രം ഒഴിവാക്കിയതു മലയാള ഭാഷയോടും ജനങ്ങളോടുമുള്ള കടുത്ത അനീതിയാണ്. റെയില്‍വേ നടപടി ഒരുതരത്തിലും നീതികരിക്കാനാവില്ല. മലയാളികളുടെ ജോലിസാധ്യത ഇല്ലാതാക്കുന്ന വിവാദ തീരുമാനം അടിയന്തിരമായി പിന്‍വലിക്കണമെന്നും മുഖ്യമന്ത്രി ആവശ്യപ്പെട്ടിരുന്നു.

ഇംഗ്ലിഷ്, ഹിന്ദി, ഉറുദു എന്നിവയ്ക്കു പുറമെ, ഗുജറാത്തി, മറാഠി, പഞ്ചാബി, കന്നഡ, തെലുങ്ക്, തമിഴ്, കൊങ്ങിണി, ഒഡിയ, അസമീസ്, മണിപ്പുരി ഭാഷകളിലെല്ലാം പരീക്ഷയെഴുതാന്‍ അവസരമുണ്ട്.