പി.എസ്.സിയുടെ പരിഷ്കരിച്ച പരീക്ഷ സംവിധാനം 2018ഓടെ പ്രാബല്യത്തില്
പി.എസ്.സിയുടെ പരിഷ്കരിച്ച പരീക്ഷ സംവിധാനം പുതുവര്ഷത്തില് പ്രാബല്യത്തില് വരും. സര്ക്കാര് ജോലിക്ക് ഒറ്റ പരീക്ഷയും ഒറ്റവാക്കിലുത്തരവും എന്ന പരമ്പരാഗത സമ്പ്രദായം അവസാനിപ്പിക്കുകയാണ് പരിഷ്കാരത്തിന്റെ കാതല്. പി.എസ്.സി തത്ത്വത്തില് അംഗീകരിച്ച പരിഷ്കാര നിര്ദേശം 2018 മാര്ച്ചോടെ നടപ്പാക്കുകയാണ് ലക്ഷ്യം.
വിവരണാത്മക പരീക്ഷക്ക് ഓണ്ലൈന് മൂല്യനിര്ണയം നടത്തുന്നതിനുള്ള സോഫ്റ്റ്വെയര് വികസിപ്പിക്കുന്നതിനു മുന്നോടിയായി ഡിസംബര് അഞ്ചിന് സംസ്ഥാന െഎ.ടി സെക്രട്ടറി എം. ശിവശങ്കറുമായി പി.എസ്.സി അധികൃതര് കൂടിക്കാഴ്ച നടത്തും. സോഫ്റ്റ്വെയര് വികസിപ്പിക്കുന്നതിന് ചുമതലയുള്ള സിഡിറ്റ് അധികൃതരും ചര്ച്ചയില് പങ്കെടുക്കും. ഒ.എം.ആര് പരീക്ഷക്ക് മാത്രമാണ് നിലവില് ഓണ്ലൈന് മൂല്യനിര്ണയമുള്ളത്.
വിവരണാത്മക പരീക്ഷക്കും ഓണ്ലൈന് മൂല്യനിര്ണയം സാധ്യമാക്കിയ രാജസ്ഥാന് സര്ക്കാറിന്റെ മാതൃകയാണ് പി.എസ്.സി മാതൃകയാക്കുന്നത്. ഇതിനായി പി.എസ്.സി അംഗങ്ങളായ പ്രഫ. ലോപസ് മാത്യു, പി. സുരേഷ്കുമാര്, ഡോ. എം.ആര്. ബൈജു എന്നിവര് അടങ്ങുന്ന ഉപസമിതി രാജസ്ഥാന് സന്ദര്ശിച്ചിരുന്നു. ഓണ്ലൈന് മൂല്യനിര്ണയം നടപ്പാവുന്നതോടെ ഉയര്ന്ന തസ്തികകളില് വിവരണാത്മക പരീക്ഷ നിര്ബന്ധമാക്കും. കേരള അഡ്മിനിസ്ട്രേറ്റിവ് സര്വിസ്, അസി. പ്രഫസര്, വൈദ്യുതി വകുപ്പിലെ അസി. എന്ജിനീയര്, ബി.ഡി.ഒ തുടങ്ങി ബിരുദ യോഗ്യതയുള്ള മിക്ക തസ്തികകള്ക്കും രണ്ടാംഘട്ട പരീക്ഷയില് വിവരണാത്മക ചോദ്യങ്ങള് ഉള്പ്പെടുത്തും.
കാണാപ്പാഠം പഠിച്ച് ഒറ്റവാക്കില് ഉത്തരമെഴുതുന്ന രീതി ഉദ്യോഗാര്ഥിയുടെ നൈപുണ്യമളക്കാന് പ്രാപ്തമല്ലെന്നാണ് പി.എസ്.സി വിലയിരുത്തല്. പരീക്ഷ സംവിധാനം അടിമുടി മാറുന്ന വിധമാണ് പരിഷ്കാരത്തിലെ നിര്ദേശങ്ങള്. ഏറെക്കുറെ മിക്ക തസ്തികകള്ക്കും രണ്ടു ഘട്ട പരീക്ഷയുണ്ടാകുമെന്നതാണ് പ്രധാന സവിശേഷത. അപേക്ഷകരുടെ ബാഹുല്യം കുറക്കാനും നിലവാരം ഉറപ്പാക്കാനുമാണ് രണ്ടുഘട്ട പരീക്ഷകള്.
എസ്.എസ്.എല്.സി, പ്ലസ് ടു, ഡിഗ്രി യോഗ്യതയുള്ള തസ്തികകളിലേക്ക് ഒന്നിച്ചാവും അപേക്ഷ ക്ഷണിക്കുക. ഒരേ യോഗ്യതയുള്ളവര്ക്കായി ആദ്യഘട്ടത്തില് പൊതുവായി പരീക്ഷ നടത്തും. തസ്തികയുടെ സ്വഭാവത്തിന് അനുസരിച്ച് രണ്ടാംഘട്ട പരീക്ഷയും നടത്തും. പ്രായോഗിക പരീക്ഷ വരുന്ന തസ്തികക്കും ഒന്നിച്ചാണ് വിജ്ഞാപനമിറക്കുക.
https://www.facebook.com/Malayalivartha
