ഇപ്പോള്‍ ചന്ദ്രന്റെ ഭ്രമണപഥത്തിലുള്ള ചന്ദ്രയാന്‍ 2 ഓര്‍ബിറ്ററാണ് ചന്ദ്രയാന്‍ 3 ദൗത്യത്തില്‍ ചന്ദ്രോപരിതലത്തില്‍ പേടകമിറക്കാനുള്ള സ്ഥലം കണ്ടെത്തുന്നത്.

ഓര്‍ബിറ്റര്‍ ചന്ദ്രന്റെ 100 കിലോമീറ്റര്‍ അകലെയുള്ള ഭ്രമണപഥത്തില്‍ ഒരു വര്‍ഷം പൂര്‍ത്തിയാക്കിക്കഴിഞ്ഞു. ഒരു വര്‍ഷം പൂര്‍ത്തിയാക്കിയ ഓര്‍ബിറ്ററിന് 7 വര്‍ഷം കൂടി ചന്ദ്രന്റെ ഭ്രമണപഥത്തില്‍ തുടരാനുള്ള ഇന്ധനം ബാക്കിയുണ്ടെന്നാണ് ഐഎസ്ആര്‍ഒയുടെ വിലയിരുത്തല്‍. ചന്ദ്രയാന്‍ 2 ദൗത്യത്തിലെ ഓര്‍ബിറ്റര്‍ അടക്കം ഉപകരണങ്ങള്‍ ഒരു വര്‍ഷത്തെ പ്രവര്‍ത്തനത്തിന് അനുയോജ്യമായാണ് രൂപകല്‍പന ചെയ്തിരുന്നത്.

ഏറ്റവും ഉയര്‍ന്ന റെസല്യൂഷന്‍ ഉള്ള (25 സെന്റിമീറ്റര്‍), ഓര്‍ബിറ്റര്‍ ഹൈ റെസല്യൂഷന്‍ ക്യാമറ (ഒഎച്ച്ആര്‍സി) ഉപയോഗിച്ചു ചന്ദ്രോപരിതലത്തിലെ 1056 ചതുരശ്ര കിലോമീറ്റര്‍ പ്രദേശത്തെ 22 ദൃശ്യങ്ങള്‍ അയച്ചുകഴിഞ്ഞു. ഇവ വിശകലനം ചെയ്താണു ചന്ദ്രയാന്‍ 3-ന്റെ ലാന്‍ഡിങ് പോയിന്റ് തീരുമാനിക്കുക. മറ്റു രാജ്യങ്ങളുടെ ചാന്ദ്രദൗത്യങ്ങള്‍ക്കും ഈ ദൃശ്യങ്ങള്‍ക്ക് വഴികാട്ടാനാവും.

അടുത്ത വര്‍ഷമാണു ചന്ദ്രയാന്‍ 3 ദൗത്യം. അന്തിമ രൂപരേഖ തയാറായെങ്കിലും തുടര്‍പ്രവര്‍ത്തനങ്ങള്‍ കോവിഡ് പ്രതിസന്ധി മൂലം വൈകുകയാണ്. പുതിയ ഓര്‍ബിറ്ററും ലാന്‍ഡറും റോവറും ഉപയോഗിച്ചായിരിക്കും ദൗത്യം.

ചന്ദ്രയാന്‍ 2 ഓര്‍ബിറ്റര്‍ ചന്ദ്രോപരിതലത്തിലെ 40 ലക്ഷം ചതുരശ്ര കിലോമീറ്റര്‍ മേഖലകളുടെ ചിത്രങ്ങള്‍ പകര്‍ത്തി ഭൂമിയിലേക്ക് അയച്ചു. ചന്ദ്രയാന്‍ 2 ഓര്‍ബിറ്റര്‍ 4600-ലേറെ തവണ ചന്ദ്രനെ വലം വച്ചു. 17 തവണ ഓര്‍ബിറ്ററിന്റെ ഭ്രമണപഥം കൃത്യപ്പെടുത്തല്‍ ദൗത്യങ്ങള്‍ ഐഎസ്ആര്‍ഒ പൂര്‍ത്തിയാക്കി.

നേരത്തെ ഐഎസ്ആര്‍ഒ 6 മാസം ലക്ഷ്യമിട്ടു രൂപകല്‍പന ചെയ്ത മംഗള്‍യാന്‍ പേടകം 5 വര്‍ഷത്തിലേറെ ചൊവ്വയുടെ ഭ്രമണപഥത്തില്‍ തുടര്‍ന്നിരുന്നു.