ബോളിവുഡ് നടിമാരായ ദീപിക പദുകോണിനും ശ്രദ്ധ കപൂറിനും ലഹരിമരുന്നു കേസില്‍ ചോദ്യം ചെയ്യലിന് ഹാജരാകാന്‍ നാര്‍കോട്ടിക്‌സ് കണ്‍ട്രോള്‍ ബ്യൂറോ നിര്‍ദേശം നല്‍കിയത് ഫോണില്‍ നിന്നും കണ്ടെത്തിയ വാട്‌സാപ് ചാറ്റിന്റെ അടിസ്ഥാനത്തിലാണ്. സുശാന്ത് സിങ് രാജ്പുത്തിന്റെ മുന്‍ ടാലന്റ് മാനേജരായ ജയ സഹയുടെ ഫോണില്‍നിന്നാണ് ഇവരിലേക്ക് നയിക്കുന്ന വാട്‌സാപ് ചാറ്റുകള്‍ കണ്ടെത്തിയത്. 2017 മുതലുള്ള ചാറ്റ് കണക്കിലെടുത്താണ് നടിമാര്‍ക്ക് സമന്‍സ് അയച്ചത്. ഇവരുടെ ചാറ്റ് പുറത്തുവന്നു. നടി റിയ ചക്രവര്‍ത്തിയുടെ വാട്‌സാപ് ചാറ്റിന്റെ അടിസ്ഥാനത്തില്‍ നടത്തിയ ചോദ്യം ചെയ്യലിനിടെയാണ് ജയ സഹ ഇക്കാര്യങ്ങള്‍ വ്യക്തമാക്കിയത്.

ഒരു ദേശീയ മാധ്യമം, രണ്ടു പേര്‍ തമ്മില്‍ ലഹരിമരുന്ന് കണ്ടെത്തുന്നതിനെ ചൊല്ലി നടത്തിയ സംഭാഷണം പുറത്തുവിട്ടു. ദീപിക പദുകോണും അവരുടെ ബിസിനസ് മാനേജര്‍ കരിഷ്മ പ്രകാശുമാണിതെന്നാണ് ആരോപണം. 2017 ഒക്ടോബര്‍ 28-ന് രാത്രി പത്തോടെ ഒരു ഗ്രൂപ്പില്‍നടത്തിയ ചാറ്റിന്റെ വിവരങ്ങളാണ് പുറത്തുവന്നിരിക്കുന്നത്.

ചാറ്റ് ഇങ്ങനെ:

ദീപിക പദുകോണ്‍: ചരക്ക് നിന്റെ കൈവശമുണ്ടോ?

കരിഷ്മ: എന്റെ കൈയിലുണ്ട്, പക്ഷേ അതു വീട്ടിലാണ്. ഞാനിപ്പോള്‍ ബാന്ദ്രയിലാണ്. നിങ്ങള്‍ക്ക് ആവശ്യമുണ്ടെങ്കില്‍ ഞാന്‍ അമിത്തിനോട് ചോദിക്കാം.

ദീപിക: വേണം.

കരിഷ്മ: അമിത്തിന്റെ കയ്യിലുണ്ട്

ദീപിക: ഹഷീഷ് അല്ലേ, കഞ്ചാവ് അല്ലല്ലോ

കരിഷ്മ: അതേ ഹാഷ് ആണ്. എപ്പോഴാണ് നിങ്ങള്‍ കോകോയിലെത്തുന്നത്.? (മുംബൈ പരേലിലെ റസ്റ്ററന്റാണ് കോകോ)

ദീപിക: 11.30/12. എത്ര മണിവരെ അവര്‍ അവിടുണ്ടാകും.

കരിഷ്മ: 11.30 എന്ന് അവര്‍ പറഞ്ഞുവെന്നാണ് തോന്നുന്നത്. കാരണം അവര്‍ക്ക് 12 മണിയോടെ മറ്റൊരിടത്ത് പോകേണ്ടതുണ്ട്.

പുറത്തുവന്ന മറ്റൊരു ചാറ്റില്‍ ശ്രദ്ധ കപൂറും ജയ സഹയുമാണെന്നാണ് വിശ്വസിക്കപ്പെടുന്നത്. നടിമാരായ സാറ അലിഖാനെയും രാകുല്‍ പ്രീത് സിങ്ങിനെയും നര്‍കോട്ടിക്‌സ് ബ്യൂറോ ചോദ്യം ചെയ്യാന്‍ വിളിപ്പിച്ചിട്ടുണ്ട്. ദീപിക പദുകോണിനോട് നാളെയും നടി രാകുല്‍ പ്രീത് സിങ്, ഫാഷന്‍ ഡിസൈനര്‍ സിമോന്‍ ഖംബാട്ട എന്നിവരോട് ഇന്നും നടിമാരായ ശ്രദ്ധ കപൂര്‍, സാറ അലി ഖാന്‍ എന്നിവരോട് 26-നും ഹാജരാകാനാണ് ആവശ്യപ്പെട്ടിരിക്കുന്നത്.

നടന്‍ സെയ്ഫ് അലിഖാന്റെ ആദ്യ ഭാര്യയിലെ മകള്‍ സാറ, തെലുങ്ക്, തമിഴ് സിനിമയിലൂടെ ബോളിവുഡിലെത്തിയ രാകുല്‍, സമൂഹമാധ്യമങ്ങളില്‍ സജീവമായ സിമോന്‍ എന്നിവരുടെ പേരുകള്‍ റിയ വെളിപ്പെടുത്തിയതാണെന്ന് എന്‍സിബി അറിയിച്ചിരുന്നു. സുശാന്തിന്റെ മാനേജര്‍മാരായ ശ്രുതി മോദി, ജയ സഹ എന്നിവരുമായുള്ള റിയയുടെ ചാറ്റുകളില്‍ ദീപികയുടെ പേരുണ്ടെന്നു പറയുന്നു. നിര്‍മാതാവ് മധു മന്ദേനയില്‍ നിന്ന് അന്വേഷണസംഘം മൊഴിയെടുത്തു.