തിയറ്ററിന്റെ ഔദ്യോഗിക ഫേസ് ബുക്ക് പേജില് മമ്മൂട്ടിക്കെതിരേ അസഭ്യ വര്ഷം, തിയറ്റര് ഉടമ പോലീസില് പരാതി നല്കി
തിയറ്ററിന്റെ ഔദ്യോഗിക ഫേസ് ബുക്ക് പേജില് മമ്മൂട്ടിക്കെതിരേ അസഭ്യ വര്ഷം നടത്തുന്നതായി മുക്കം പിസി തിയറ്റര് ഉടമ ഷിംജി മുക്കം പോലീസില് പരാതി നല്കി. തിയറ്റര് ഉടമയുടെ ഫേസ്ബുക്ക് പേജ് എഡിറ്റ് ചെയ്ത് തിയറ്റര് ഉടമയുടെ വ്യക്തിപരമായ അഭിപ്രായം എന്ന രീതിയിലാണ് ഇത് പോസ്റ്റ് ചെയ്തിരുന്നത്.
തിയറ്ററിന്റെ ഔദ്യോഗിക പേജില്, മുക്കത്തെ പിസി തിയറ്റര് മോഹന്ലാല് സിനിമകള്ക്ക് മുന്ഗണന നല്കുന്നുവെന്നും മമ്മൂട്ടി സിനിമകളെ അവഗണിക്കുന്നുവെന്നും കാണിച്ച് ഒരു യുവാവ് പോസ്റ്റ് ഇട്ടതോടെയാണ് സംഭവങ്ങളുടെ തുടക്കം. പോസ്റ്റിട്ട യുവാവിനെ കണ്ടെത്തി തിയറ്റര് ജീവനക്കാര് സത്യാവസ്ഥ ബോധ്യപ്പെടുത്തി.
മോഹന്ലാലിന്റേയും മമ്മൂട്ടിയുടെയും സിനിമകളുടെ കളക്ഷന് ബുക്കും സിസിടിവി ദൃശ്യങ്ങളും കാണിച്ചാണ് യുവാവിന് സത്യാവസ്ഥ ബോധ്യപ്പെടുത്തിക്കൊടുത്തത്. എന്നാല് യുവാവിന്റെ പോസ്റ്റിനെ അനുകൂലിച്ചും പ്രതികൂലിച്ചും ഔദ്യോഗിക പേജില് പോസ്റ്റുകള് വന്നു.
ഇതിനു പിന്നാലെയാണ് ഫോട്ടോഷോപ്പിന്റെ സഹായത്തോടെ തിയറ്റര് ഉടമയുടെ ഫേസ് ബുക്ക് പേജ് എഡിറ്റ് ചെയ്ത് മമ്മൂട്ടിക്കും മറ്റു സിനിമാ പ്രവര്ത്തര്ക്കുമെതിരെ അസഭ്യ വാക്കുകള് അടങ്ങിയ പോസ്റ്റുകള് പ്രചരിപ്പിച്ചത്.
ഇതിന്റെ സത്യാവസ്ഥയറിയാതെ നിരവധി പേര് സമൂഹമാധ്യമങ്ങള് വഴിയും അല്ലാതെയുമായി തനിക്കും കുടുംബത്തിനുമെതിരെ അസഭ്യ വര്ഷവുമായി രംഗത്തെത്തിയതായി തിയറ്റര് ഉടമ ഷിംജി പറഞ്ഞു. സംഭവം വിവാദമായതോടെ സിനിമാ മേഖലയിലെ വിവിധ സംഘടനകളും വിഷയത്തില് ഇടപെട്ടു.
ഇവരുടെ നിര്ദ്ദേശ പ്രകാരമാണ് പോലീസില് പരാതി നല്കിയത്. എല്ലാ നല്ല സിനിമകളെയും പരമാവധി പ്രോത്സാഹിപ്പിക്കാറുണ്ടെന്നും കുറ്റക്കാരെ കണ്ടെത്തി നിയമത്തിന് മുന്നില് കൊണ്ടുവരണമെന്നും ഷിംജി പറഞ്ഞു.
https://www.facebook.com/Malayalivartha